Hasi Esfuerso pa Kultivá Rèspèt Profundo pa Dios Meskos ku Abdías

Abdías tabata na enkargo di e palasio di Rei Ákab. Rei Ákab a permití pa Israel bira pèstá ku adorashon di Baal. For di chikitu, Abdías a traha duru pa e tin rèspèt profundo pa Yehova; e no tabata ke hasi nada ku lo hasi Yehova tristu. (1 Rei. 18:​1-13) Dado momento, Reina Yézabèl a duna òrdu pa mata e profetanan di Yehova. Komo ku Abdías tabatin rèspèt profundo pa Yehova, el a sintié motivá pa mustra kurashi i hasi algu pa yuda e profetanan. Pa un persona skonde djis un profeta so lo tabata peligroso kaba. Pero Abdías a skonde 100 profeta di Yehova i a duna nan tur di kome den un periodo ku tabatin skarsedat di kuminda. Pa kolmo, tabatin sientos di profeta falsu ta sirbi Ákab ku Yézabèl. Pues Abdías mester a tene masha kuidou pa nan no gar’é.—1 Rei. 18:19.

Kiko nos por siña for di Abdías? Aunke Abdías tabatin miedu di Ákab, e rèspèt profundo ku e tabatin pa Yehova a surpasá e miedu ei. Su rèspèt profundo pa Yehova a dun’é kurashi pa riska su bida pa protehá e profetanan. Nos tambe mester hasi esfuerso pa kultivá rèspèt profundo pa Yehova, spesialmente si nos ta biba un kaminda ku nos no por adorá Yehova libremente. Rèspèt profundo pa Yehova lo motivá nos pa yuda nos rumannan ku ta pasa den difikultat.