Yehova Por Yuda Bo Trata ku Desanimashon!

1-2. Kon Apòstel Pablo tabata sintié tin biaha, i kon su ehèmpel por yuda nos? (Romanonan 7:​21-24)

ORA bo pensa riba Apòstel Pablo, kiko ta bini na mente? Kisas ku el a prediká na vários pais, ku el a skirbi hopi buki di Beibel i ku e tabata un bon maestro. Sin duda, e tabata un persona ku tabata fiel na Dios i ku tabatin hopi kurashi. Pero tòg tin biaha e tabata sintié tristu, desanimá i preokupá. E tabata un hende meskos ku nos.

² Lesa Romanonan 7:​21-24. Den Pablo su karta pa e romanonan, Pablo a papia tokante su sintimentunan, sintimentunan ku nos tambe tin awe. Ta bèrdat ku Pablo tabata fiel na Dios, i e tabatin masha gana di obedesé Dios. Pero komo ku e tabata imperfekto, no ta semper el a logra hasi loke e tabata deseá di hasi. I esei tabata desanim’é. Un otro kos ku tabata desanimá Pablo ta ora e tabata pensa riba tur e kosnan malu ku el a hasi promé ku e tabata kristian. Ademas, e tabatin un problema den su bida ku e mester a sigui lucha kuné i esei tambe tabata hasié tristu.

3. Kiko nos lo trata den e artíkulo akí? (Wak nota.)

³ Maske tabatin vários kos ku a hasi Pablo tristu,a el a hasi su esfuerso pa e no keda pensa riba e kosnan ei. Den e artíkulo akí, nos lo trata e siguiente preguntanan: Dikon Pablo a bisa e palabranan “pober di mi”? Kiko a yud’é trata ku e sintimentunan ku tabata molesti’é? I kon nos tambe por trata ku sintimentu asina?

E KOSNAN KU A PONE PABLO SINTIÉ TRISTU

4. Kiko ta un di e kosnan ku a pone Pablo sintié tristu?

⁴ Pablo tabata kòrda e kosnan malu ku el a hasi den pasado. Promé ku Pablo a bira kristian, el a hasi hopi kos malu. Por ehèmpel, Pablo a para wak kon nan a mata Esteban, i el a aprobá loke nan a hasi. (Echo. 7:58; 8:1) Ademas, Pablo a persiguí e kristiannan na un manera masha kruel.—Echo. 8:3; 26:​9-11.

5. Kon e kosnan ku Pablo a hasi ántes a sigui molesti’é?

⁵ Despues ku Pablo a bira kristian, el a sintié tristu tokante e kosnan ku el a hasi den pasado. I segun ku tempu a pasa, mas malu e tabata sintié tokante e kosnan ku el a hasi. Bo por ripará esei na su kartanan. Por ehèmpel den su promé karta ku el a skirbi pa e korintionan na aña 55 D.K., el a bisa: “Mi no ta meresé mes di ser yamá apòstel, pasobra mi a persiguí e kongregashon di Dios.” (1 Kor. 15:9) Sinku aña despues, den su karta pa e efesionan, el a bisa ku e tabata “e persona di mas insignifikante di tur e rumannan santu.” (Efe. 3:8) Mas despues, den su karta pa Timoteo, Pablo a bisa: “Mi tabata blasfemá Dios i persiguí su pueblo, i mi tabata un hòmber arogante i ònbeskòp.” (1 Tim. 1:13) Bo por imaginá bo kon Pablo a sinti ora el a bishitá e kongregashonnan i topa ku e rumannan ku el a persiguí? Òf ora ku el a topa ku nan famianan?

6. Kiko tabata un otro kos ku tabata preokupá Pablo? (Wak nota.)

⁶ Pablo tabatin un problema ku tabata preokup’é mashá. El a bisa ku e problema tabata manera “un sumpiña den karni.” (2 Kor. 12:7) E no a bisa presis ta kiko su problema tabata. Pero, for di loke el a bisa, nos por saka afó ku kisas tabata trata di un malesa òf algu otro ku tabata pon’é sufri.b

7. Kiko tabata stroba Pablo di hasi loke ta bon? (Romanonan 7:​18, 19)

⁷ Pablo su imperfekshonnan tabata kans’é. Pablo tabata hasi su bèst pa e hasi loke ta bon. (Lesa Romanonan 7:​18, 19.) Pero no ta semper e tabata logra hasi esei. Maske e tabatin e deseo di hasi loke ta bon, konstantemente, e tabata lucha kontra su imperfekshonnan ku tabata dun’é gana di hasi malu. (1 Kor. 9:27) Nos por djis imaginá kon malu Pablo tabata sintié ora el a bisa òf hasi algu ku e tabata traha duru pa no hasi!

KIKO A YUDA PABLO TRATA KU DESANIMASHON?

8. Kiko ta algun kos ku Pablo a hasi pa traha riba su personalidat?

⁸ Den Pablo su kartanan, nos por mira ku e tabata pensa hopi tokante kon spiritu santu por a yuda e i su rumannan bringa kontra mal deseo i mehorá nan personalidat. (Rom. 8:13; Gal. 5:​16, 17) Pablo a mustra bon kla kiko ta e kosnan ku un kristian mester evitá di pensa òf hasi. (Gal. 5:​19-21, 26) Esei ta mustra ku Pablo a pensa tokante su debilidatnan pa mira kon e por a mehorá. Pa logra esei, e mester a studia e Skrituranan pa wak kiko spesífikamente e mester a hasi pa vense e debilidatnan ei. Nos por tin sigur ku e mes tambe a apliká e kosnan ku el a animá su rumannan pa hasi.

9-10. Kiko a yuda Pablo ora e tabata sintié desanimá? (Efesionan 1:7) (Wak e plachi.)

⁹ Aunke tin biaha Pablo tabata sintié desanimá, tabatin hopi kos ku tabata yud’é keda positivo. Por ehèmpel, e tabata keda kontentu ora e tabata tende e kosnan bon ku e rumannan di e otro kongregashonnan tabata hasi. (2 Kor. 7:​6, 7) E amistatnan ku e tabatin ku otro ruman tambe tabata hasié kontentu. (2 Tim. 1:4) Ademas, e tabata sa ku e tabatin Yehova su aprobashon. E tabata kontentu ku e por a sirbi Dios ku “un konsenshi limpi.” (2 Tim. 1:3) Asta tempu ku Pablo tabata bou di aresto na Roma, el a animá su rumannan pa “alegrá den Señor.” (Flp. 4:4) Loke Pablo a bisa ei ta mustra ku e no tabata pensa henter ora riba su problemanan i su foutnan. Mas bien, ora e tabata hañ’é ku pensamentu ku tabata desanim’é, e tabata hasi esfuerso pa pensa riba kos ku tabata yud’é keda positivo.

¹⁰ Algu otro ku a yuda Pablo keda positivo ta ora e tabata pensa riba e reskate. Esei a yud’é kòrda ku Yehova tabata stim’é i ku e reskate tabata un regalo ku Yehova a dun’é personalmente. (Gal. 2:20; lesa Efesionan 1:7.) P’esei, Pablo tabatin sigur ku, danki na e reskate, Yehova a pordon’é i lo sigui pordon’é. (Rom. 7:​24, 25) Maske Pablo a hasi fout den pasado i e tabatin debilidat, komo ku el a hasi esfuerso pa keda positivo, e por a sirbi Dios ku goso.—Heb. 9:​12-14.

11. Kon e ehèmpel di Pablo por animá nos?

¹¹ Meskos ku Pablo, tin biaha nos por sinti ku ta un lucha grandi pa nos no pensa, bisa òf hasi algu ku ta hasi Yehova tristu. Anto meskos ku Pablo, nos tambe tin biaha por sinti frustrá ora ku tòg nos hasi algu robes. Un ruman den su 20 i piku aña ku yama Elizac a splika kon e ta sinti: “Mi ta sinti mi mihó ora mi pensa ku Pablo tabata sinti meskos ku mi i ku e tambe mester a hasi kambio. Esei ta laga nos mira ku Yehova sa loke su sirbidónan ta pasa aden.” Kon Pablo su ehèmpel por yuda nos sigui agradá Yehova i mantené nos goso apesar di desanimashon?

KIKO POR YUDA NOS ORA NOS TA SINTI NOS DESANIMÁ?

12. Kon un bon rutina spiritual por yuda nos keda positivo?

¹² Keda ku un bon rutina spiritual. Ora nos tin un bon rutina spiritual, esei por yuda nos keda positivo. Nos por kompar’é ku loke nos ta hasi pa keda ku un bon salú. Ora nos ta kome saludabel, hasi ehersisio i drumi sufisiente, nos lo sinti nos bon. Di mes manera, ora nos ta studia Beibel tur dia, prediká, prepará pa reunion, bai reunion i duna komentario, nos lo sinti nos bon. E kosnan ei lo yuda nos pensa riba kos positivo en bes di riba kos ku ta desanimá nos.—Rom. 12:​11, 12.

13-14. Kon algun ruman a benefisiá ora ku nan a sigui ku nan rutina spiritual?

¹³ Laga nos wak e ehèmpel di Ruman John. Tempu ku e tabatin 39 aña, nan a konstatá ku e tabatin kanser. Na promé instante, el a sinti hopi miedu i e tabata hopi preokupá. El a keda puntra su mes dikon el a bira malu na un edat asina yòn. Pa kolmo, e tempu ei, su yu tabatin apénas tres aña. Kiko a yuda John keda positivo? El a bisa: “Apesar ku mi tabata hopi kansá, mi a hasi sigur pa nos famia tin un bon rutina spiritual. Nos tabata bai tur reunion, bai sirbishi tur siman i nos tabata hasi adorashon komo famia regularmente. Nos tabata hasi e kosnan ei, asta ora no tabata fásil pa hasi esei.” John a bisa tambe: “Ora un situashon difísil presentá nos por sinti nos hopi anshá. Pero mi a siña ku semper Yehova lo duna nos e forsa ku nos tin mester i laga nos sinti ku e stima nos. Meskos ku Yehova a yuda ami, e por yuda abo tambe.”

¹⁴ Eliza, ku nos a menshoná anteriormente, a bisa: “Kada bes ku mi bai reunion i hasi estudio personal, mi ta haña mas konfiansa ku Yehova ta skucha mi orashonnan i ku e ta stima mi masha hopi mes. I esei ta laga mi sinti bon.” Nolan, un superintendente di sirkuito na Afrika, a bisa: “Ami ku mi kasá Diane semper ta pega na nos rutina spiritual asta ora nos ta sinti nos desanimá. Ora nos hasi esei, semper Yehova ta laga nos sinti mihó. Den e momentonan ei, nos ta purba di kòrda ku Yehova semper lo yuda nos i bendishoná nos. No ta tur biaha nos sa kon e ta bai hasi esei, pero nos sa sí ku e ta bai hasié.”

15. Kiko mas nos por hasi si nos ta sigui sinti nos desanimá? Duna un ehèmpel.

¹⁵ Pero kiko si bo tin un bon rutina spiritual pero tòg bo ta sinti bo desanimá? Kiko mas bo por hasi? Wèl, pensa riba e siguiente ehèmpel. Imaginá ku bo tin doló di lomba. Djis kana tur dia lo no yuda bo. Pa e doló por bai, tin mas kos ku bo tin ku hasi. Bo mester haña sa ta kiko a kousa bo doló. P’esei, kisas lo bo mester buska mas informashon i papia ku un dòkter. Anto den sentido spiritual ta meskos. Ora nos ta desanimá, nos mester buska mas informashon den Beibel i den nos publikashonnan pa haña sa kiko por yuda nos. Ademas, nos por papia ku un ruman ku por duna nos bon konseho tokante nos situashon. Fuera di e sugerensianan akí, tin mas kos ku bo por hasi.

16. Kiko por yuda bo saka afó dikon bo ta sinti bo desanimá? (Salmo 139:​1-4, 23, 24)

¹⁶ Pidi Yehova yuda bo saka afó dikon bo ta sinti bo desanimá. Rei David tabata sa ku Yehova tabata konos’é masha bon mes. P’esei, David a pidi Yehova pa yud’é saka afó kiko tabata preokup’é. (Lesa Salmo 139:​1-4, 23, 24.) Nos tambe por pidi Yehova yuda nos saka afó dikon nos ta sinti nos desanimá, i kiko por yuda nos sinti mihó. Kisas bo por hasi bo mes e siguiente preguntanan: ‘Kiko ta e kos ku ta preokupá mi eigenlijk? Tin algu ku semper ta pone mi kuminsá bira preokupá? Mi ta blo pensa riba loke ta desanimá mi òf mi ta purba di pensa riba kos positivo?’

17. Kiko ta algun tópiko ku nos por studia ku por yuda nos pensa riba kos positivo? (Wak e plachi.)

¹⁷ Studia un tópiko ku por yuda bo na e momento ei. Tin biaha ta bon pa nos studia tokante un di Yehova su kualidatnan. Esei lo por ègt animá nos. Por ehèmpel, Apòstel Pablo a sinti hopi bon ora el a meditá riba e reskate i riba e manera ku Yehova ta pordoná nos. Bo tambe por hasi meskos. Bo por usa Guia pa Buska Informashon òf otro publikashon pa haña artíkulo ku ta trata Yehova su kualidatnan, manera su miserikòrdia, pordon i amor leal. Studia e artíkulonan ku bo a haña i traha un lista di e artíkulonan ku a yuda bo. Pone e lista un lugá kaminda bo por hañ’é fásilmente den futuro. I ora bo ta sinti bo desanimá, bo por studia e artíkulonan ei atrobe. Wak kon bo por apliká e sugerensianan ku bo haña den bo situashon.—Flp. 4:8.

18. Kiko ta algun tópiko di estudio ku a yuda algun ruman?

¹⁸ Eliza, ku nos a menshoná anteriormente, a hasi estudio personal tokante Yòb. El a bisa: “Mi ta sinti meskos ku Yòb. Mi tambe a pasa den hopi prueba pareu i tabata sinti mi hopi desanimá. Pero mi a siña algu importante di Yòb. Aunke e tabata sintié desanimá i e no tabata sa dikon e tabata sufri, el a sigui buska Yehova su yudansa.” (Yòb 42:​1-6) Diane, ku nos a menshoná anteriormente, a bisa: “Ami ku mi kasá ta studiando tokante Yehova su kualidatnan usando e buki Hala Serka Yehova. Nos ta kontentu ku Yehova ta moldia nos pa nos pensa i aktua mas manera e. Ora nos ta hasi fout i ta sinti nos desanimá, nos no ta keda pensa riba nos foutnan. Pero nos ta djis kòrda ku Yehova ta formando nos pa nos bira mihó sirbidó di dje. Ora nos wak kon e ta yuda nos, esei ta hala nos mas serka dje.”—Isa. 64:8.

KEDA POSITIVO—YEHOVA LO YUDA BO I BENDISHONÁ BO

19. Kon nos lo sinti de bes en kuando, pero kiko nos por tin sigur di dje?

¹⁹ Asta si bo apliká tur e sugerensianan den e artíkulo akí, lo tin dia ku tòg lo bo sinti bo tristu, anshá òf hopi desanimá. Sinembargo, Yehova por yuda bo ora bo ta sinti asina. E por yuda bo stòp di pensa riba kos ku por desanimá bo i yuda bo sinti bo mas kalmu. Pero no ta tur dia bo ta bai sinti bo desanimá. Bo por tin sigur ku, mayoria di biaha, yùist lo bo sinti bo kontentu i lo bo disfrutá di bida. Dikon? Pasobra bo tin un bon amistat ku Yehova i bo sa ku e ta kontentu ku tur loke bo ta hasi p’e.

20. Kiko abo ta determiná pa hasi?

²⁰ Laga nos ta determiná pa no laga e kosnan malu ku nos a hasi ántes, nos problemanan òf nos imperfekshonnan stroba nos di disfrutá di bida. Yehova por yuda nos trata ku e kosnan ku ta desanimá nos. (Sal. 143:10) Nos ta anhelá pa biba den e mundu nobo, kaminda tur loke nos ta pensa ariba ta hasi nos kontentu. E tempu ei, nos lo no haña pensamentu ku ta desanimá nos. Tur dia nos lo lanta kontentu i yen di ánimo pa sigui sirbi nos amoroso Tata, Yehova!