Sigui Satisfasé Bo “Nesesidat Spiritual”

1. Kiko ta algun kos ku hende mester pa keda na bida? (Mateo 5:3)

YEHOVA a krea nos ku algun nesesidat básiko. Pa nos por keda na bida, nos mester di kuminda, paña i un dak riba nos kabes. Si nos falta algun di e kosnan ei, bida por bira hopi duru i nos por asta muri. Tin un otro kos ku Yehova sa ku nos tin mester di dje tambe. E sa ku nos tin un nesesidat pa kos spiritual, sí, un nesesidat pa nos tin un amistat kuné i pa nos haña su guia. (Lesa Mateo 5:3.) Si nos ke ta felis, nos mester satisfasé e nesesidat ei.

2. Ki komparashon ta yuda nos komprondé kiko ta nifiká ku nos ta konsiente di nos “nesesidat spiritual”?

² Kiko ke men ku un hende ta ‘konsiente di su nesesidat spiritual’? Na e idioma original, e ta kompará un hende asina ku un persona riba kaya ku ta kana pidi sèn. Purba di visualis’é: E persona ei su pañanan ta tur kibrá, i e no tin muchu ko’i kome. Den dia, solo ta kim’é, i anochi e ta sinti hopi friu. Hopi hende ta evit’é. E ta infelis i fadá di su situashon. E sa ku pa drecha su situashon, e mester di yudansa. Den un sentido spiritual, nos ta meskos ku e persona ei. Ora nos ta konsiente ku nos mester di Dios, nos ta buska tur manera pa haña e yudansa i guia ku Dios ta ofresé na hende ku ta stim’é.

3. Kiko nos lo trata den e artíkulo akí?

³ Den e artíkulo akí, nos lo bai wak kiko nos por siña di un señora di Fenisia ku a roga Hesus pa yud’é. E señora ei tabatin tres kualidat ku nos ke imitá. E kualidatnan ei lo yuda nos satisfasé nos nesesidat spiritual. Despues, nos lo trata e ehèmpelnan di Pedro, Pablo i David, kendenan tabata konsiente ku nan tabatin mester di Yehova su guia.

TRES KUALIDAT IMPORTANTE KU NOS MESTER TIN

4. Kiko un señora di Fenisia tabata ke pa Hesus hasi p’e?

⁴ Riba un dia, un señora di Fenisia a bai serka Hesus. E señora su yu muhé tabata “kruelmente poseí pa demoño.” (Mat. 15:​21-28) E señora a bai na rudia i roga Hesus pa yuda su yu muhé. Laga nos ban wak tres kualidat di e señora ku nos por imitá.

5. Ki kualidat e señora a demostrá, i kiko esei a pone Hesus hasi? (Wak e plachi.)

⁵ E señora di Fenisia a mustra hopi humildat. Kiko ta mustra esei? Dado momento, Hesus a usa un ilustrashon kaminda el a kompará e señora ei ku no tabata hudiu ku un kachó chikitu. Kisas el a hasi esei pasobra hopi bes hende ku no tabata hudiu tabatin kachó den kas. I e komparashon ei lo a laga e señora pensa riba un kachó chikitu ku ta stimá pa su doñonan i ku ta hunga ku e muchanan. Kon abo lo a reakshoná riba loke Hesus a bisa? Lo bo a sinti bo ofendí i kana bai laga Hesus? Wèl, e señora sí no a rabia. Anto komo ku e tabata humilde, e no a entregá, i el a sigui pidi Hesus pa yudansa. Dikon el a hasi esei? Pasobra e tabatin fe den Hesus. Ora Hesus a mira kuantu fe e tabatin, el a disidí di yuda e señora. Aunke ku Hesus a kaba di bisa ku el a bini pa yuda solamente “e karnénan pèrdí di Israel,” tòg el a yuda e señora i saka e demoño for di su yu muhé.

6. Kon nos por imitá e señora di Fenisia?

⁶ Pa nos por satisfasé nos nesesidat spiritual, nos mester imitá e señora di Fenisia. Nos tambe mester ta humilde i sigui pidi Dios pa su yudansa, sin entregá. Tambe nos mester tin fe fuerte den Kristu Hesus i konfia esnan ku el a skohe pa dirigí su siguidónan. (Mat. 24:​45-47) Yehova i Hesus ta keda kontentu ora nan mira ku nos tin e kualidatnan ei. Komo resultado, ku mil amor, nan lo yuda nos i guia nos. (Kompará ku Santiago 1:​5-7.) Awor, laga nos wak kon Yehova ta guia nos i duna nos tur loke nos tin mester pa nos ta felis. Ademas, nos lo wak kon nos por imitá Pedro, Pablo i David.

IMITÁ PEDRO I SIGUI STUDIA PALABRA DI DIOS

7. (a) Kiko Hesus a pidi Pedro pa hasi? (b) Pero kiko mas Pedro mes mester a hasi? (Hebreonan 5:14–6:1)

⁷ Wak e ehèmpel di Apòstel Pedro. E tabata un di e promé hudiunan ku a rekonosé Hesus komo e Mesías. Anto e tabata sa ku Yehova tabata usando Hesus pa siña hende “kon pa haña bida eterno.” (Huan 6:​66-68) Promé ku Hesus a bai shelu bèk, el a bisa Pedro: “Alimentá mi lamchinan.” (Huan 21:17) Pedro a kumpli ku loke Hesus a pidié. I Yehova a asta usa Pedro pa skirbi dos karta ku despues a bira parti di Beibel. Pero Pedro tabata sa ku e mes tambe mester a studia Palabra di Dios. Por ehèmpel, el a studia e kartanan ku Pablo a skirbi ku ya kaba tabata parti di e Skrituranan. Ta bèrdat sí ku Pedro mes a bisa ku algun di e kosnan ku Pablo a skirbi tabata “difísil pa komprondé.” (2 Ped. 3:​15, 16) Apesar di esei, Pedro no a entregá; el a sigui studia e kosnan ei. E tabatin fe ku Yehova lo a yud’é komprondé e “kuminda sólido” ku tabatin den Pablo su kartanan i apliká loke el a siña.—Lesa Hebreonan 5:14–6:1.

8. Kiko Pedro a hasi ora el a haña algun instrukshon ku a pone ku e mester a kambia su manera di pensa?

⁸ Kon nos sa ku Pedro tabatin un fe fuerte? Pasobra e tabata kla pa obedesé e instrukshonnan ku el a risibí di Yehova. Por ehèmpel, riba un dia, ora Pedro tabata na Yope, el a haña un vishon. Den e vishon ei, un angel a bis’é pa kome bestia ku, segun Lei di Moises, hudiu no tabatin mag di kome. Pues, pa Pedro, lo tabata difísil pa sigui e instrukshon ei. P’esei, na promé instante, Pedro a kontestá: “Nò Señor, mi no por hasi esei! Nunka mi no a kome nada kontaminá ni impuru.” Pero despues e angel a bisa Pedro: “Stòp di yama kontaminá loke Dios a hasi limpi.” (Echo. 10:​9-15) Pedro a obedesé loke e angel a bis’é i kambia su manera di pensa. Kon nos por sa esei? Poko despues ku Pedro a haña e vishon, tres hòmber a bin buska Pedro. Nan a bisa Pedro ku nan shon, Kornelio, tabata ke pa Pedro bini serka dje. Normalmente, Pedro lo no a pensa mes pa drenta kas di un hende ku no tabata hudiu, esta, un hende di e nashonnan. Pasobra e hudiunan tabata pensa ku tabata robes pa drenta kas di un hende di e nashonnan. (Echo. 10:​28, 29) Pero awor ku Pedro a komprondé ku Yehova tabata ke pa tur hende skucha e bon notisia, mesora Pedro a ahustá su manera di pensa pa e por a obedesé Yehova. (Pro. 4:18) Pedro a prediká na Kornelio i na e hendenan di su kas. Debí na esei, nan tur a pone fe den Hesus, risibí spiritu santu i batisá.—Echo. 10:​44-48.

9. Menshoná dos motibu dikon ta importante pa nos studia kosnan profundo ku por ta difísil pa komprondé.

⁹ Meskos ku Pedro, nos mester studia e Palabra di Dios regularmente. Den mayoria di kaso, nos ta komprondé loke nos ta studia, i nos ta disfrutá di esei. Pero, tin biaha nos por topa ku kos ku ta un poko mas difísil pa komprondé. Nos mester saka tempu i hasi esfuerso pa komprondé e kosnan profundo di Beibel tambe. Dikon? Pa por lo ménos dos motibu: Di promé, nos lo haña mas amor i rèspèt pa Yehova ora nos siña kos profundo tokante dje. Di dos, nos lo sinti nos mas motivá pa konta otro hende tokante Yehova debí na e kosnan impreshonante ku nos a siña tokante dje. (Rom. 11:33; Rev. 4:11) Pedro su ehèmpel ta siña nos algu mas: Ora nos haña sierto kambio den nos komprondementu di e Palabra di Dios, nos mester ta lihé pa ahustá nos manera di pensa i di aktua. Si nos hasi esei, Yehova lo por sigui guia nos, i nos lo por sigui sirbié fielmente.

IMITÁ PABLO I BISTI E PERSONALIDAT NOBO

10. Segun Kolosensenan 3:​8-10, kiko nos tin ku hasi pa hasi Yehova kontentu?

¹⁰ Un otro manera pa nos satisfasé nos nesesidat spiritual i hasi Yehova kontentu ta ora nos ta bisti e pañanan spiritual ku e ta duna nos. Kiko esei ke men? Apòstel Pablo a skirbi ku nos mester “kita e personalidat bieu” i bisti “e personalidat nobo.” (Lesa Kolosensenan 3:​8-10.) Pero ta tuma tempu i esfuerso pa nos por hasi kambio den nos personalidat. Pensa riba e ehèmpel di Pablo. For di tempu ku e tabata hopi yòn, el a traha duru pa hasi Yehova kontentu. (Gal. 1:14; Flp. 3:​4, 5) Pero e no a logra hasi esei. Dikon? Pasobra e no tabata sa kon pa adorá Dios na e manera korekto. Ademas, e no tabata sa tampoko di Hesus su siñansanan i e tabata orguyoso. Komo resultado, Pablo tabata “un hòmber arogante i ònbeskòp,” i e tabatin vários otro kualidat ku no tabata agradá Dios.—1 Tim. 1:13.

11. Ki kambio Pablo mester a hasi pa agradá Dios? Splika.

¹¹ Promé ku Pablo a bira kristian, e tabata un persona ku ta rabia lihé. Na Echonan, Beibel ta mustra ku Pablo tabatin asina tantu rabia riba e disipelnan di Hesus ku “e tabata desididu pa kaba ku nan.” (Echo. 9:1) Despues ku Pablo a bira kristian, e mester a hasi hopi esfuerso pa dominá su rabia. El a logra kita e personalidat bieu, i el a bira un persona amabel ku tabatin pasenshi. (Efe. 4:​22, 31) Apesar di esei, el a sigui hasi fout. Por ehèmpel, na un okashon, Pablo i Bárnabas tabatin un desakuerdo ku otro, i nan “a kuminsá pleita pisá ku otro.” (Echo. 15:​37-39) Na e okashon ei, Pablo no a logra dominá su rabia, pero e no a entregá. El a sigui traha riba su kualidatnan pa e por a agradá Yehova.—1 Kor. 9:27.

12. Kiko a yuda Pablo pa sigui traha riba e personalidat nobo?

¹² Kon bin Pablo a logra kita e personalidat bieu i bisti esun nobo? Pasobra e tabata humilde, i e no a pensa ku e por a logra esei ku su mes forsa. (Flp. 4:13) Meskos ku Pedro, Pablo a dependé riba “e forsa ku Dios ta duna.” (1 Ped. 4:11) Tòg, tin biaha, Pablo tabata sintié malu pa motibu di e foutnan ku e tabata hasi. Ora el a sintié asina, e no a keda enfoká riba su foutnan pero riba tur e kosnan bon ku Yehova a hasi p’e. I esei a yud’é pa e sigui hasi kambio pa agradá Yehova.—Rom. 7:​21-25.

13. Kon nos por imitá Pablo?

¹³ Asta si nos ta sirbiendo Yehova pa hopi aña, ta importante pa, meskos ku Pablo, nos sigui hasi esfuerso pa kita e personalidat bieu i bisti esun nobo. Pero tòg por sosodé ku nos ta hasi un fout. Kisas nos ta pèrdè pasenshi i rabia ku un hende òf nos ta papia algu ku ta hùrt un hende. No laga esei desanimá bo. Djis sigui traha duru pa hasi kambio. (Rom. 12:​1, 2; Efe. 4:24) Ora nos ta hasi esfuerso pa bisti e personalidat nobo, nos tin ku kòrda algu importante sí: No ta Yehova mester adaptá su normanan na nos manera di pensa, pero ta nos mester kambia nos manera di pensa i aktua pa por agrad’é.

IMITÁ DAVID I BUSKA PROTEKSHON SERKA YEHOVA

14-15. Kon ta algun manera ku Yehova ta protehá nos awe? (Salmo 27:5) (Wak e plachi.)

¹⁴ Fuera di studia e Palabra di Dios i bisti e personalidat nobo, kiko mas nos mester hasi pa nos ta felis? Nos mester buska Yehova su protekshon. Kon Yehova ta protehá nos, i kon nos por sigui buska su protekshon?

¹⁵ Rei David tabata konvensí ku Yehova lo a proteh’é den tempu difísil. (Lesa Salmo 27:5.) Kon Yehova ta protehá su sirbidónan awe? Yehova no ta laga niun persona ni nada otro daña nos amistat kuné pa semper. Sí, e ta primintí ku lo e no laga ‘niun arma ku ser trahá pa hasi nos daño tin éksito.’ (Sal. 34:7; Isa. 54:17) Ta bèrdat ku Satanas, e demoñonan i hende ku ta persiguí nos ta poderoso, pero nan no ta mas poderoso ku Yehova. Pues, asta si nan kita nos bida, Yehova lo lanta nos bèk for di morto. (1 Kor. 15:​55-57; Rev. 21:​3, 4) Ademas, Yehova ta yuda nos trata ku preokupashon i ansiedat, pasobra e no ke pa e kosnan ei stroba nos di sirbié. (Pro. 12:25; Mat. 6:​27-29) Yehova ta usa nos famia spiritual tambe pa protehá nos. Nos rumannan ta kla pa animá i sostené nos. I e ansianonan tambe ta animá nos i yuda nos pa keda ku un fe fuerte. (Isa. 32:​1, 2) Anto na nos reunionnan, nos ta haña sa di mas manera ku nos por buska Yehova su yudansa i protekshon.—Heb. 10:​24, 25.

16. Kon ta algun manera ku Yehova a protehá David?

¹⁶ Kon Yehova tabata protehá David? Ora David tabata obedesé Yehova, Yehova tabata yud’é tuma bon desishon. I esei a protehá David di e konsekuensianan di piká, sí, e konsekuensianan ku hende ku ta praktiká piká ta haña nan kuné. (Kompará ku Proverbionan 5:​1, 2.) Pero ora David a desobedesé Yehova, el a hañ’é ku konsekuensia di su mal desishonnan. Anto Yehova no a proteh’é di e kosnan ei. (2 Sám. 12:​9, 10) Tabatin biaha ku David a sufri pa motibu di otro hende. Na e okashonnan ei, David tabata bisa Yehova tur loke e tabatin den su kurason. Kon Yehova tabata proteh’é na e momentonan ei? Yehova tabata konsolá David i lag’é sa ku e tabata stim’é. Ademas, el a primintí David ku semper lo e ta kuné.—Sal. 23:​1-6.

17. Kon nos por imitá David?

¹⁷ Nos por imitá David ora nos ta buska konseho serka Yehova promé ku nos tuma desishon. Nos tin ku kòrda tambe ku tin biaha nos ta haña nos ku difikultat, no pasobra Yehova no a protehá nos, sino pasobra nos a tuma mal desishon. (Gal. 6:​7, 8) Pero tin otro biaha, nos por haña nos ku problema ku no ta nos falta. Na e momentonan ei, nos por konta Yehova tur loke ta preokupá nos i pidié yuda nos. Na su turno, Yehova lo konsolá nos i kòrda nos ku e stima nos.—Flp. 4:​6, 7.

SIGUI BUSKA YEHOVA SU GUIA

18. Kiko hopi hende awe ta pensa tokante nan nesesidat spiritual, pero kiko nos tin ku sigui hasi? (Wak e plachinan.)

¹⁸ Nos teksto di aña pa 2026 ta: “Hende ku ta konsiente di nan nesesidat spiritual ta felis.” Foral den nos tempu, nos tin ku tuma e palabranan ei di Hesus masha na serio. Dikon? Pasobra hopi hende awe no ta rekonosé ku nan mester di Dios. Tin otro hende ta kere den Dios, pero nan ta purba di ador’é na nan manera. I tin algun otro hende ku ta preferá di laga idea di hende guia nan. Niun di e hendenan ei no ta felis, p’esei nos no mester imitá nan. Na lugá di esei, nos mester sigui studia Palabra di Dios, bisti e personalidat nobo i buska e protekshon ku Yehova ta ofresé nos.