Nan A Haci e Boluntad di Jehova

Un Tata Cu Ta Cla pa Pordoná

EL A ser yamá e mihó cuenta corticu hamas skirbí, i cu bon motibu. Jesus su comparacion dje amor di un tata pa su yu perdí ta manera un bentana dor di cua nos ta obtené un bista magnífico di Dios su compasion pa pecadónan repentí.

Perdí i Hañá

Un shon tabatin dos yu homber. Esun mas yong di cuné: ‘Mi kier mi herencia awor, en bes di warda te ora bo muri.’ E tata a bai eens, probablemente dunand’e un tercer parti di tur loke e tabatin—e derecho legal di esun menor di dos yu homber. (Deuteronomio 21:17) E hóben purá-purá a recogé su posesionnan i a biaha bai un pais leu caminda el a gasta tur su placa hibando un bida di paranda.—Lucas 15:11-13.

Anto a bini un hamber severo. Desesperá, e yoncuman a aceptá trabou di cuida porco—un ofishi despreciabel pa un hudiu. (Levítico 11:7, 8) Cuminda tabata asina scars cu el a cuminsá deseá e baliñanan di bonchi cu e porconan tabata come! Finalmente, e yoncuman a recobrá su huicio. ‘Mi tata su criánan ta come mihó cu mi!’ el a pensa den su mes. ‘Mi ta bai cas bek, confesá mi picánan i roga pa bira manera un dje trahadónan pagá di mi tata.’a—Lucas 15:14-19.

E yoncuman a lastra bai cas. Sin duda su aparencia a cambia considerablemente. Tog, su tata a reconoc’é “miéntras e tabata leu ainda.” Conmoví, el a core bai cerca su yu, a bras’é i “a sunch’é tiernamente.”—Lucas 15:20.

E bon biní caluroso aki a hacié mas fácil p’e yoncuman deshogá su mes. E di: “Tata, mi a peca contra shelu i contra bo. Mi no ta digno mas di ser yamá bo yu. Hací mi manera un di bo trahadónan pagá.” E tata a yama su esclabonan. “Pura!” el manda nan. “Saca un mantel, esun mihó, i bistié cuné, i pone un renchi na su man i sandalia na su pia. I trece e toro hóben gordá, mat’é i laga nos come i gosa, pasobra mi yu aki tabata morto i a bolbe biba; e tabata perdí i el a ser hañá.”—Lucas 15:21-24.

Un fiesta grandi a start, cu música i bailamentu. E yu homber mayó a tende e conmocion ora e tabata biniendo bek for di cunucu. Ora el a haña sa cu su ruman homber a bini cas i cu esaki tabata e motibu dje festividad, el a bira indigná. El a bai keha cerca su tata: ‘Mi a traha manera catibu pa bo pa hopi aña i nunca mi a desobedecé bo, tog nunca bo a duná mi un cabritu yong pa mi gosa cu mi amigunan. Pero awor, manera cu bo yu homber cu a malgastá bo rikesa ta bolbe bek, bo ta pone un bankete p’e.’ E tata a contestá tiernamente: ‘Yu, abo semper tabata cu mi, i tur loke ta di mi ta di bo. Pero nos simplemente mester a alegrá pasobra bo ruman tabata morto i el a bolbe biba. E tabata perdí i awor a ser hañá.’—Lucas 15:25-32.

Les pa Nos

E tata den Jesus su comparacion ta representá nos Dios misericordioso, Jehova. Mescos cu e yu perdí, algun hende pa un tempu ta bandoná e siguridad di Dios su famia di cas, pero despues ta bolbe. Con Jehova ta mira hende asina? Esnan cu bolbe na Jehova cu berdadero repentimentu por ta sigur cu “lo e no sigui busca falta pa semper, ni keda ofendí pa tempu indefiní.” (Salmo 103:9) Den e comparacion, e tata a core pa yama su yu bon biní. Mescos tambe, Jehova ta, no solamente dispuesto, sino tambe ansioso pa pordoná pecadónan repentí. E ta “cla pa pordoná,” i e ta haci esei “den un gran manera.”—Salmo 86:5; Isaías 55:7; Zacarías 1:3.

Den Jesus su comparacion, e amor genuino dje tata a hacié mas fácil p’e yu tuma e curashi pa bolbe. Pero pensa: Kico lo a sosodé si e tata a nenga e mucha of den un explosion rabiá a bis’é mira pa nunca e bini bek? Probablemente un actitud asina lo a alehá e hóben pa semper.—Compará cu 2 Corintionan 2:6, 7.

Den un sentido, anto, e tata su amor genuino a prepará e caminda p’e regreso di su yu for di ora cu e yu a bai. Tin biaha, ancianonan cristian awe tin cu saca pecadónan cu no repentí for di e congregacion. (1 Corintionan 5:11, 13) Ora di haci esei, nan por cuminsá prepará e caminda p’e regreso dje pecadó dor di indicá amorosamente e pasonan cu e por dal pa ser restorá den futuro. Tabata e caso di hopi persona spiritualmente perdí, cu ora nan a corda despues e súplica sincero di parti dje ancianonan, nan a ser conmové na repentimentu i impulsá pa bolbe na Dios su famia di cas.—2 Timoteo 4:2.

Tambe e tata a mustra compasion ora su yu a bolbe. No a tarda hopi p’e sinti e mucha su repentimentu sincero. E ora ei, en bes di insistí pa tende tur detaye dje yu su picánan, el a djis yam’é bon biní, i a expresá gran placer den haci esei. Cristiannan por imitá e ehempel aki. Nan mester alegrá cu un persona perdí a ser hañá bek.—Lucas 15:10.

E conducta dje tata ta mustra claramente cu pa hopi tempu el a anticipá e regreso di su yu perdí. Naturalmente, esei ta djis un sombra dje anhelo cu Jehova tin pa tur cu a bandoná su famia di cas. E “no ta deseá pa ningun ser destruí, sino ta deseá pa tur alcansá repentimentu.” (2 Pedro 3:9) P’esei, esnan cu repentí di nan picánan por tin sigur cu nan lo ser bendicioná cu “temporadanan di refrescamentu . . . dje persona di Jehova.”—Echonan 3:19.

[Nota]