Informe di Proclamadonan di Reino

E Poder Purificador dje Palabra di Dios

SEGUN informe mayoria drogadicto ta bolbe cai bek den nan hábitonan despues di sali for di centronan di rehabilitacion. Pero e Palabra di Dios por logra loke e clínicanan ei generalmente no por haci. (Hebreonan 4:12) E Palabra i spiritu di Dios a yuda hopi hende vence nan adiccion na droga i aplicá e conseho: “Laga nos limpia nos mes di tur contaminacion di carni i di spiritu, perfeccionando santidad den temor di Dios.”—2 Corintionan 7:1.

Un ehempel di esaki ta un experencia for di Myanmar. Un homber cu a lucha cu adiccion na droga pa hopi aña ta conta: “Mi a bira un drogadicto tempu mi tabata tiener. Hopi biaha mi a purba libra di dje, pero mi no tabata por. Pa por a sigui droga, mi a cuminsá horta. Como resultado, na 1988 mi a cai cerá pa un aña.

Despues cu mi a sali for di prizon, mi a reanudá mi contacto cu amigunan bieu. Djis despues di esei, mi a bolbe cuminsá usa droga. E curso auto-destructivo aki a pone mi famia kibra tur contacto cu mi. Ademas, mi actitud rebelde a pone cu hopi hende den e comunidad tabatin miedu di mi, i nan tambe a cuminsá hala leu di mi.

Anto un dia lo inevitabel a sosodé—mi a sufri di un sobredósis di droga. Nan a mandá mi bek prizon, e biaha aki pa tres aña. Bida den prizon tabata masha duru, pero con cu bai bini mi a logra sobrebibí.

Despues di a bolbe cas for di prizon, mi a pidi mi famia pordon pa mi erornan anterior. Misericordiosamente nan a aceptá mi bek, pero un biaha mas, amigunan a hibá mi na mi curso anterior.

Finalmente, mi wela a recomendá un pastor local pa lagá mi asistí na un cierto scol di Bijbel. E pastor a bai eens. Sin embargo, promé cu mi a cuminsá asistí, mi tanta, cu ta un Testigo di Jehova, a bisa cu si di berdad mi kier siña e Bijbel, anto mi mester studia cu e Testigonan.

Mi a bai n’e Salon di Reino i a cera conocí cu un homber cu tabata dispuesto pa studia Bijbel cu mi. Hopi hende presente a cumindá mi calurosamente i a lagá mi sinti bon biní.

Despues cu mi a cuminsá studia Bijbel i asistí na reunionnan cristian, e anhelo intenso pa usa droga a ser reemplasá cu un deseo pa hala cerca Dios. Un aña despues mi a progresá te n’e punto di dedicá mi bida na Jehova Dios, i mi a simbolisá e dedicacion ei mediante bautismo bou di awa.

Recientemente, bayendo di cas pa cas, mi a topa un di mi socionan bieu den droga. E no por a comprendé con mi por a haci cambionan grandi asina. Esaki a habri e caminda pa un testimonio, i mi por a papia cuné tocante e speransa di Reino.

Por fin mi a haña un berdadero propósito i nificacion den bida. Danki n’e yudansa di Dios i conseho for di su Palabra, awor mi por yuda otro hende libra nan mes dje hábito demoralisante di abusu di droga.”