“Aunke Boso No A Mir’e Nunca, Boso Ta Stim’e”
“Aunke boso no a mir’é nunca, boso ta stim’é. Aunke boso no ta mirando e actualmente, tog boso ta ehercé fe den dje i ta alegrá mashá.”—1 PEDRO 1:8.
1. Aunke ningun hende riba tera awe no a mira Jesus, con algun hende religioso ta trata na mustra debocion na dje?
NINGUN hende na bida riba tera awe a yega di mira Jesucristo. Tog, miyones di hende ta profesá di ta stim’é. Tur aña riba 9 di januari, na Manila, Filipínas, un estatua di Jesucristo tamaño real cargando un crus ta ser halá dor dje cayanan den loke a ser describí como e manifestacion mas masal i mas espectacular di religion popular den e pais. E multitud excitá ta pusha i perta riba otro; hende asta ta subi riba otro den un esfuerso frenético pa mishi cu e imágen. Hopi persona cu ta presente pa observá esaki ta ser atraé principalmente dor dje procesion festivo. Sin embargo, algun di nan sin duda ta hende cu ta sinti nan sinceramente atraí na Jesus. Como evidencia di nan debocion na Jesus, kisas nan tin un crucifiho bistí of kisas nan ta bai misa regularmente. Sin embargo, por considerá tal idolatria como adoracion berdadero?
2, 3. (a) Ken entre Jesus su siguidornan realmente a mir’é i tend’é? (b) Ken mas den e promé siglo a stima Jesus i a pone fe den dje, aunke nan nunca a mir’é personalmente?
2 Den e promé siglo, tabatin hopi miles di hende den e provincianan romano di Hudea, Samaria, Perea i Galilea cu personalmente sí a mira i tende Jesucristo. Nan a scucha ora el a splica e berdadnan emocionante tocante e Reino di Dios. Nan tabata testigo ocular dje milagernan cu el a haci. Algun di esakinan a bira su disipelnan dedicá, convencí di cu e tabata “e Cristo, e Yu di e Dios bibu.” (Mateo 16:16) Sin embargo, esnan na ken apostel Pedro a skirbi su promé carta inspirá no tabata entre esakinan.
3 Esnan na ken Pedro a dirigí su carta tabata situá den e provincianan romano di Ponto, Galacia, Capadocia, Asia i Bitinia—tur den e área di Turkia dje tempu actual. Na nan Pedro a skirbi: “Aunke boso no a mir’é nunca, boso ta stim’é. Aunke boso no ta mirando e actualmente, tog boso ta ehercé fe den dje i ta alegrá mashá cu un goso inexpresabel i glorificá.” (1 Pedro 1:1, 8) Con nan a yega di conocé Jesucristo te cu nan por a stim’é i ehercé fe den dje?
4, 5. Con e hendenan ei cu no a mira Jesus nunca a siña suficiente tocante dje pa stim’é i pone fe den dje?
4 Evidentemente, algun tabata na Jerusalem ora apostel Pedro a duna testimonio n’e multitud cu a asistí n’e festival di Pentecoste na 33 E.C. Despues dje festival hopi disipel a keda den Jerusalem afin di ricibí mas instruccion for dje apostelnan. (Echonan 2:9, 41, 42; compará cu 1 Pedro 1:1.) Durante vários biahe misionero, apostel Pablo a hiba a cabo un ministerio celoso tambe entre e hendenan cu a biba den e área na cua Pedro despues a manda e promé carta bíblico cu ta carga su nomber.—Echonan 18:23; 19:10; Galationan 1:1, 2.
5 Pakico e hendenan ei, cu no a mira Jesus nunca, tabata asina fuertemente atraí na dje? Den nos tempu, pakico miyones di hende mas, rond mundu, ta stim’é asina tantu?
E Cosnan cu Nan A Tende
6. (a) Si bo a tende Pedro duna testimonio tocante Jesus na Pentecoste di 33 E.C., kico lo bo por a siña? (b) Con esaki a afectá rond di 3.000 persona cu tabata presente?
6 Si abo tabata na Jerusalem ora Pedro a papia cu e multitud n’e festival na 33 E.C., kico lo bo a siña tocante Jesus? Fuera di tur duda e milagernan cu el a haci a mustra cu el a ser mandá dor di Dios. Cu, aunke hende pecaminoso a causa Jesus su morto, e no tabata den e graf mas sino el a ser resucitá i despues halsá na shelu n’e man drechi di Dios. Cu Jesus tabata, en berdad, e Cristo, e Mesías di ken e profetanan a skirbi. Cu mediante Jesucristo, a drama spiritu santu riba su siguidornan di manera cu inmediatamente nan por a duna testimonio na hende for di hopi nacion tocante e cosnan magnífico cu Dios tabata haciendo mediante su Yu. E curason di hopi persona cu a tende Pedro n’e ocasion ei a ser profundamente conmoví, i rond di 3.000 a ser bautisá como disipel cristian. (Echonan 2:14-42) Si abo tabata ei, lo bo a tuma un accion decisivo asina?
7. (a) Si bo tabata na Antiokia ora apostel Pablo a predicá ei, kico lo bo por a siña? (b) Pakico algun persona den e multitud a bira creyente i a compartí e bon nobo cu otronan?
7 Si bo tabata entre esnan presente ei ora apostel Pablo a siña otronan na Antiokia den e provincia romano di Galacia, kico mas lo bo a siña tocante Jesus? Lo bo a tende Pablo splica cu e profetanan a predicí cu Jesus lo a ser condená na morto dor dje gobernantenan den Jerusalem. Lo bo a tende tambe tocante evidencia di testigonan ocular di Jesus su resureccion. Siguramente lo bo a keda impresioná cu e splicacion di Pablo cu dor di resucitá Jesus for di morto, Jehova a confirmá cu esun aki en berdad tabata e Yu di Dios. I bo curason lo no a yena cu gratitud segun cu bo a siña cu pordon di picá hací posibel mediante fe den Jesus lo por hiba na bida eterno? (Echonan 13:16-41, 46, 47; Romanonan 1:4) Reconociendo e importancia di loke nan tabata tendiendo, algun den Antiokia a bira disipel, compartiendo activamente e bon nobo cu otronan, aunke haciendo esei a nificá cu nan lo a enfrentá persecucion intenso.—Echonan 13:42, 43, 48-52; 14:1-7, 21-23.
8. Si bo tabata n’e reunion dje congregacion di Efeso ora nan a ricibí e carta cu Pablo a dirigí na nan, kico lo bo por a siña?
8 Kico si bo tabata asociá cu e congregacion cristian na Efeso, den e provincia romano di Asia, ora e disipelnan ei a ricibí e carta cu Pablo a dirigí na nan? Kico lo bo por a siña for di dje tocante Jesus su papel den e propósito di Dios? Den e carta ei Pablo a splica cu mediante Cristo tur cos den shelu i riba tera lo ser trecé bek na armonia cu Dios, cu e don di Dios mediante Cristo a extendé na hende di tur nacion, cu individuonan cu tabata morto den bista di Dios pa motibu di nan picánan a ser hací bibu mediante fe den Cristo, i cu como resultado di e percuracion aki, tabata posibel atrobe pa hende bira yunan stimá di Dios.—Efesionan 1:1, 5-10; 2:4, 5, 11-13.
9. (a) Kico por yudá bo dicerní si abo personalmente ta capta e nificacion di loke Pablo a skirbi n’e Efesionan? (b) Con e rumannan den e provincianan romano cu Pedro a mencioná a ser afectá pa loke nan tabata siñando tocante Jesus?
9 Aprecio pa tur esaki lo a profundisá bo amor p’e Yu di Dios? E amor ei lo a influenciá bo bida di tur dia, manera apostel Pablo a animá den capítulo 4 pa 6 di Efesionan? Un aprecio asina lo a impulsá bo pa examiná bo propio prioridadnan den bida cuidadosamente? Amor pa Dios i gratitud pa su Yu lo a motivá bo pa haci ahustenan necesario di manera cu hacimentu dje boluntad di Dios tabata berdaderamente e punto focal den bo bida? (Efesionan 5:15-17) Relacioná cu e manera cu e cristiannan na Asia, Galacia i otro provincianan romano a ser afectá pa loke nan tabata siñando, apostel Pedro a skirbi na nan: “Aunke boso no a mira [Jesucristo] nunca, boso ta stim’é. . . . Boso ta ehercé fe den dje i ta alegrá mashá cu un goso inexpresabel i glorificá.”—1 Pedro 1:8.
10. (a) Kico a contribuí indudablemente n’e amor cu e cristiannan di promé tabatin pa Jesus? (b) Con nos tambe por saca beneficio?
10 Tabatin algu mas cu indudablemente a contribuí n’e amor p’e Yu di Dios cu e cristiannan ei tabatin, na kende Pedro a dirigí su carta. Kico esei tabata? Pa e tempu cu Pedro a skirbi su promé carta, por lo ménos dos dje Evangelionan—Mateo i Lucas—ya caba tabata den circulacion. E cristiannan di promé siglo cu no a mira Jesus nunca por a lesa e relatonan aki di Evangelio. Nos tambe por. E Evangelionan no ta cuentanan imaginario; nan tin tur e característicanan dje historia di mas confiabel. Den e registronan inspirá ei, nos ta haña hopi cos cu ta profundisá nos amor p’e Yu di Dios.
E Spiritu cu El A Demostrá
11, 12. Kico tocante e spiritu cu Jesus a demostrá pa cu otro hende ta poné bo stim’é?
11 Ei den e registro skirbí di Jesus su bida, nos ta siña con el a trata cu otro hende. E spiritu cu el a demostrá ta toca curason di hende asta awor, mas cu 1.960 aña despues cu el a muri. Tur hende na bida ta cargá cu e efectonan di picá. Hopi miyones di hende ta víctima di inhusticia, ta lucha cu enfermedad of pa otro motibunan ta sinti un desilusion aplastante. Na tur hende asina, Jesus ta bisa: “Bini cerca mi, boso tur cu ta afaná i cargá, i lo mi refrescá boso. Tuma mi yugo riba boso i siña di mi, pasobra mi ta di genio suave i humilde di curason, i boso lo haña refrescamentu pa boso alma. Pasobra mi yugo ta suave i mi carga ta leve.”—Mateo 11:28-30.
12 Jesus a demostrá interes sensitivo pa esnan pober, esnan hambrá i esnan na pena. Ora circunstancianan a haci esei necesario, el a asta alimentá gran multitudnan milagrosamente. (Lucas 9:12-17) El a libra nan for di tradicionnan cu ta esclabisá hende. Tambe el a edificá nan fe den e percuracion di Dios pa pone fin na opresion político i económico. Jesus no a kibra e spiritu di esnan cu tabata aplastá caba. Cu ternura i amor, e ábilmente a lanta e ánimo dje mansunan. El a refrescá esnan cu tabata manera caña kibrá cu a dobla di dolor i esnan cu tabata manera mecha di linen cu ta huma casi pa paga. For dje tempu ei te awor aki, su nomber ta inspirá speransa, asta den curason di esnan cu no a mir’é nunca.—Mateo 12:15-21; 15:3-10.
13. Pakico e manera cu Jesus a trata cu pecadornan ta atraé hende?
13 Aunke Jesus no a aprobá di malecho, el a mustra comprension pa cu hende cu a cometé fayonan den bida pero cu a manifestá repentimentu i a acudí na dje pa yudansa. (Lucas 7:36-50) E tabata sinta i come cu hende cu a ser despreciá den e comunidad si el a sinti cu esaki lo a dun’é un oportunidad pa yuda nan spiritualmente. (Mateo 9:9-13) Como resultado dje spiritu cu el a desplegá, miyones di hende den circunstancianan similar cu no a mira Jesus nunca a ser impulsá pa siña conoc’é i a pone fe den dje.
14. Kico bo ta gusta dje manera cu Jesus a yuda hende enfermo, hendikep of na luto?
14 E manera cu Jesus a trata cu hende cu tabata malu of hendikep ta duna evidencia di su calor i compasion i tambe di su abilidad pa trece alivio pa nan. P’esei, ora un homber enfermo tur na lepra a acerk’é i a rogu’é pa yudansa, Jesus no a hala atras ora el a mir’é. I e no a bisa e homber cu, aunke e tabatin duele di dje, e lepra tabata den un estado muchu avansá i cu no por a haci nada pa yud’é. E homber a rogu’é: “Señor, si bo solamente kier, bo por hací mi limpi.” Sin vacilá, Jesus a saca su man i a mishi cu e homber leproso, bisando: “Mi kier. Sea limpi.” (Mateo 8:2, 3) Na un otro ocasion un señora a trata na ser curá dor di mishi di un manera innotabel cu e rand di su paña. Jesus a trat’é den un manera bondadoso i trankilisante. (Lucas 8:43-48) I ora el a topa un procesion di entiero, el a ser conmoví cu duele pa e biuda na pena kende su único yu a muri. Aunke Jesus a nenga di usa e poder cu Dios a dun’é milagrosamente pa percurá cuminda pa su mes, el a us’é libremente pa resucitá e homber morto ei i dun’é bek na su mama.—Lucas 4:2-4; 7:11-16.
15. Con lesamentu dje relatonan tocante Jesus i meditacion riba nan ta afectá bo?
15 Segun cu nos ta lesa e relatonan aki i meditá riba e spiritu cu Jesus a desplegá, nos amor ta ser profundisá pa esun aki cu a entregá su bida humano pa asina nos por biba pa semper. Maske nos no a mir’é nunca, nos ta sinti nos atraí na dje, i nos kier sigui den su pasonan.—1 Pedro 2:21.
Su Dependencia Humilde Riba Jehova
16. Riba ken Jesus a enfocá atencion principalmente, i kico el a animá nos pa haci?
16 Riba tur cos, Jesus a enfocá su atencion i di nos riba su Tata celestial, Jehova Dios. El a identificá e mandamentu di mas grandi den e Ley, bisando: “Bo tin cu stima Jehova bo Dios cu henter bo curason i cu henter bo alma i cu henter bo mente.” (Mateo 22:36, 37) El a amonestá su disipelnan: “Tene fe den Dios.” (Marco 11:22) Ora nan a enfrentá un prueba serio di nan fe, el a urgi nan: “Haci oracion continuamente.”—Mateo 26:41.
17, 18. (a) Con Jesus a demostrá su dependencia humilde riba su Tata? (b) Pakico loke el a haci ta asina importante pa nos?
17 Jesus mes a pone e ehempel. Oracion tabata un parti importante di su bida. (Mateo 14:23; Lucas 9:28; 18:1) Ora e tempu a yega p’e selectá su apostelnan, Jesus no a simplemente dependé riba su mes huicio, aunke anteriormente tur e angelnan den shelu tabata bou di su supervision. Humildemente el a pasa henter un anochi den oracion na su Tata. (Lucas 6:12, 13) Ora el a enfrentá aresto i un morto doloroso, atrobe Jesus a acudí na su Tata, haciendo oracion di curason. E no tabatin e punto di bista di cu e tabata conocé Satanas bon i cu lo e por a trata fácilmente cu cualkier cos cu e malbado ei lo por a trama. Jesus a realisá ki importante tabata pa e no a faya. Ki un reproche Jesus su fracaso lo tabata pa su Tata! I ki un pérdida pa humanidad, kende su prospectonan di bida a dependé riba e sacrificio cu Jesus tabatin cu ofrecé!
18 Jesus a haci oracion bes tras bes—ora e tabata cu su apostelnan den un sala parti ariba den Jerusalem i asta mas fervientemente den e hofi di Getsémani. (Mateo 26:36-44; Juan 17:1-26; Hebreonan 5:7) Ora e tabata sufri riba e staca di tormento, e no a zundra esnan cu a ridiculis’é. Mas bien, el a haci oracion na fabor di esnan cu tabata actua den ignorancia: “Tata, pordoná nan, pasobra nan no sa kico nan ta haciendo.” (Lucas 23:34) El a tene su mente fihá riba su Tata, ‘encomendando su mes na esun cu ta husga cu husticia.’ E palabranan final cu el a expresá riba e staca di tormento tabata un oracion na su Tata. (1 Pedro 2:23; Lucas 23:46) Ki gradicidu nos ta cu, dependiendo plenamente riba Jehova, Jesus fielmente a completá e asignacion cu su Tata a confi’é cuné! Aunke nos no a mira Jesucristo nunca, cuantu nos ta stim’é pa loke el a haci!
Expresando Nos Amor pa Jesus
19. Expresando amor pa Jesus, ki prácticanan nos lo evitá como completamente inapropiado?
19 Con nos por duna evidencia di cu e amor cu nos ta profesá ta mas cu simpel palabranan? Siendo cu su Tata, kende Jesus a stima, a prohibí pa traha imágen i despues trata esakinan como obheto di debocion, nos siguramente lo no ta onrando Jesus dor di bisti un imágen asina na un cadena rond di nos garganta of dor di carga un imágen asina dor di cayanan. (Exodo 20:4, 5; Juan 4:24) Nos lo no ta onrando Jesus dor di asistí na servicionan religioso, asta haciendo esei vários bes pa siman, si nos no biba na armonia cu su siñansanan e resto dje siman. Jesus a bisa: “Esun cu tin mi mandamentunan i ta warda nan, esun ei ta esun cu ta stimá mi. En buelta, esun cu ta stimá mi, mi Tata lo stima.”—Juan 14:21, 23; 15:10.
20. Kico ta algun cos cu lo mustra si nos berdaderamente ta stima Jesus?
20 Ki mandamentunan el a duna nos? Como esun principal, adorá e Dios berdadero, Jehova, e so. (Mateo 4:10; Juan 17:3) Debí na su papel den e propósito di Dios, Jesus a siña tambe cu nos tin cu ehercé fe den dje como e Yu di Dios i cu nos tin cu mustra esei dor di rechasá obranan malbado i dor di cana den e lus. (Juan 3:16-21) El a consehá nos pa busca promé e Reino di Dios i su husticia, poniendo esakinan promé cu preocupacion pa necesidadnan físico. (Mateo 6:31-33) El a manda pa nos stima otro mescos cu é a stima nos. (Juan 13:34; 1 Pedro 1:22) I el a comisioná nos pa ta testigonan tocante e propósito di Dios, mescos cu e tabata. (Mateo 24:14; 28:19, 20; Revelacion 3:14) Aunke nan no a mira Jesus nunca, rond di cincu miyon Testigo di Jehova awe ta ser conmoví dor di berdadero amor p’e pa warda e mandamentunan ei. E echo cu nan no a mira Jesus personalmente di ningun manera ta debilitá nan determinacion pa ta obediente. Nan ta corda loke nan Señor a bisa apostel Tomas: “Dor cu bo a mirá mi bo a kere? Felis ta esnan cu no ta mira i tog ta kere.”—Juan 20:29.
21. Con nos ta saca beneficio dor di asistí n’e Memorial dje morto di Cristo, cu lo ser tené e aña aki riba diadomingo, 23 di mart?
21 Nos ta spera cu lo bo ta entre esnan rond mundu cu lo reuní n’e Salonnan di Reino di Testigonan di Jehova despues cu solo baha riba diadomingo, 23 di mart, 1997, pa recordá e mayor expresion dje amor di Dios pa cu humanidad i pa conmemorá e morto di su Yu leal, Jesucristo. Loke ta ser bisá i hací n’e ocasion ei mester profundisá nos amor pa Jehova i pa su Yu i asina aumentá e deseo pa warda e mandamentunan di Dios.—1 Juan 5:3.
Con Lo Bo Contestá?
◻ Con esnan na ken e promé buki di Pedro a ser dirigí a yega na conocé i stima Jesus?
◻ Kico ta algun dje cosnan cu e cristiannan di promé a tende cu ta impresioná bo?
◻ Kico tocante e spiritu cu Jesus a demostrá ta profundisá bo amor p’e?
◻ Pakico Jesus su dependencia humilde riba Dios ta asina importante pa nos?
◻ Con nos por demostrá nos amor pa Jesucristo?
[Plachinan na página 16, 17]
Nos ta sinti nos atraí na Jesus debí n’e spiritu cu el a demostrá