Dios Ta Aceptá Tur Clase di Adoracion?

DIOS a crea hende cu un necesidad spiritual—un necesidad pa adorá. Esei no ta algu cu a evolucioná. E tabata un parti di hende desde principio.

Sin embargo, ta tristu pa bisa cu humanidad a desaroyá hopi diferente manera pa adorá, i por lo general, esakinan no a producí un famia humano felis i uní. En bes di esei, ainda tin gueranan sangriento ta ser bringá den nomber di religion. Esaki ta lanta e pregunta importante: Ta relevante con un hende ta adorá Dios?

Adoracion Cuestionabel den Antigwedad

E nacionnan antiguo cu a habitá Medio Oriente ta duna un ehempel histórico cu ta yuda nos contestá e pregunta ei. Hopi di nan tabata adorá un dios yamá Baal. Tambe nan tabata adorá e compañeronan femenino di Baal, manera Asera. E adoracion di Asera a enbolbé e uso di un palu sagrado cu, segun opinion, tabata un símbolo sexual. Arkeólogonan trahando den e region ei, a coba saca un cantidad di imágen di muhernan sunú. E imágennan aki, segun The Encyclopedia of Religion, “tin forma di un diosa cu partinan genital masha bisto, wantando su pechunan na haltu,” i “probablemente ta representá . . . Asera.” Un cos ta sigur, e adoracion di Baal hopi bes tabata masha inmoral.

P’esei, no ta un sorpresa cu e adoracion di Baal a incluí orgianan sexual. (Númeronan 25:1-3) Siquem, un cananeo, a violá e bírgen hóben Dina. Apesar di esaki, el a ser considerá como e homber mas onorabel di su famia. (Génesis 34:1, 2, 19) Incesto, homosexualidad, i actonan sexual cu bestia tabata comun. (Levítico 18:6, 22-24, 27) E palabra “sodomia” mes, un práctica di homosexualnan, ta bin dje nomber di un stad cu a yega di existí den e parti ei di mundu. (Génesis 19:4, 5, 28) Adoracion di Baal a enbolbé dramamentu di sanger tambe. Figurá bo, adoradornan di Baal tabata tira nan yunan bibu den candela cayente como un sacrificio na nan diosnan! (Jeremías 19:5) Tur e prácticanan aki tabata relacioná cu siñansanan religioso. Con asina?

Dr. Merrill Unger ta splica den su buki Archaeology and the Old Testament: “E crueldad, apetit sexual i conducta desenfrená dje mitologia cananeo, ta muchu mas pió cu otro caminda den Cercano Oriente den e tempu ei. I e característica asombroso dje deidadnan cananeo, cu nan no tabatin absolutamente ningun caracter moral, mester a desaroyá e cualidadnan di mas pió den nan debotonan i a encerá hopi dje prácticanan di mas demoralisante dje tempu ei, manera prostitucion sagrado, [i] sacrificio di mucha.”

Dios a aceptá e adoracion dje cananeonan? Naturalmente cu no. El a siña e israelitanan con pa ador’é den un manera puru. Relacioná cu e prácticanan mencioná ariba, el a spierta: “No haci boso mes impuru dor di ningun dje cosnan aki, pasobra dor di tur e cosnan aki e nacionnan cu mi ta manda bai for di dilanti boso a haci nan mes impuru. P’esei e tera ta impuru, i lo mi trece castigu riba dje pa su eror i e tera lo saca su habitantenan afó.”—Levítico 18:24, 25.

Adoracion Puru Ta Bira Contaminá

Hopi israelita no a aceptá Dios su punto di bista tocante adoracion puru. En bes di esei, nan a permití adoracion di Baal continuá den nan tera. Pronto e israelitanan a ser tentá pa purba mescla e adoracion di Jehova cu esun di Baal. Dios a aceptá e clase di adoracion mesclá aki? Considerá loke a pasa durante e reinado di Rey Manases. El a pone altarnan pa Baal, a kima su mes yu homber como un sacrificio i a practicá magia. “Ademas, el a pone e imágen tayá dje palu sagrado [ʼashe·rahʹ na hebreo] cu el a traha den e cas di cua Jehova a bisa . . . : ‘Den e cas aki . . . lo mi pone mi nomber te na tempu indefiní.’ ”—2 Reynan 21:3-7.

E súbditonan di Manases a sigui e ehempel di nan rey. De echo, el “a sigui seducí nan pa haci loke tabata malu, mas cu e nacionnan cu Jehova a anikilá for di dilanti e yunan di Israel.” (2 Reynan 21:9) En bes di haci caso dje spiertamentunan frecuente for di Dios su profetanan, Manases a cometé asesinato te n’e grado di yena Jerusalem cu sanger inocente. Aunke cu tempu Manases a cambia su bida, su yu homber i sucesor, Rey Amon, a bolbe introducí adoracion di Baal.—2 Reynan 21:16, 19, 20.

Cu tempu, hombernan prostituta a cuminsá traha den e tempel. Con Dios a mira e expresion aki di adoracion di Baal? Mediante Moises, el a spierta: “Bo no mag trece e huur di un muher di mala bida ni e prijs di un cachó [probablemente un pederasta] den e cas di Jehova bo Dios pa ningun voto, pasobra nan ta algu detestabel pa Jehova bo Dios, sí, tur dos cos.”—Deuteronomio 23:17, 18, nota.

E nietu di Manases, Rey Hosías, a limpia e tempel dje adoracion inmoral di Baal. (2 Reynan 23:6, 7) Pero ya cosnan a bai muchu leu caba. No muchu tempu despues dje morto di Rey Hosías, adoracion di ídolo atrobe tabata tumando lugá den e tempel di Jehova. (Ezekiel 8:3, 5-17) P’esei Jehova a pone e rey di Babilonia destruí Jerusalem i su tempel. E echo histórico tristu aki ta proba cu algun forma di adoracion no ta aceptabel pa Dios. Kico di nos tempu?