El A Sirbi Jehova Humildemente

“NO TA importá asina tantu unda bo ta sirbi sino mas bien ken bo ta sirbi ta loke berdaderamente ta importá.” Eseinan tabata John Booth su palabranan faborito, i el a biba conforme cu nan. Su curso di bida riba tera, cu a terminá dialuna, 8 di januari, 1996, no a laga duda ken el a scoge pa sirbi.

Como un homber hóben aya na 1921, John Booth tabata buscando un propósito den bida. E tabata duna les na ‘zondagschool’ n’e Iglesia Reformá hulandes, pero el a resistí e idea di sigui un entrenamentu pa bira minister pasobra e tabata haña cu cleronan tabata hiba un bida egoista. Ora el a mira un pamfleta cu a anunciá un discurso titulá “Miyones di Hende Na Bida Awor Lo No Muri Nunca,” inmediatamente el a manda busca e literatura cu e pamfleta tabata propagá. Atraí pa loke el a lesa, pronto e tabata core 24 kilometer cu baiskel pa yega n’e reunionnan dje Studiantenan di Bijbel, manera Testigonan di Jehova tabata ser yamá e tempu ei. El a ser bautisá na 1923 i a cuminsá predicá di cas pa cas den e region di Wallkill, New York, unda su famia tabatin un hacienda di productonan di lechi.

Ruman Booth a drenta e ministerio di tempu completo na april di 1928. El a predicá den e teritorio caminda e tabata biba i den e partinan rural di Sur, cambiando literatura bíblico pa cuminda i alohamentu. E tabatin cu confrontá peligernan manera doñonan di destilerianan ilegal di alcohol cu ta menasá cu scopet, di cua un a tira i heridá e partner pionero di John Booth. Na 1935, Ruman Booth a ser nombrá como superintendente biahero i a cuminsá bishitá e congregacionnan i gruponan mas chikitu na tur parti dje pais. El a organisá asambleanan i a yuda e rumannan perseverá apesar di oposicion. Confrontá multitudnan desordená rabiá, tuma un posicion den corte, i ser encarcelá, tur a bira cosnan comun pa Ruman Booth. “Bo por skirbi un buki pa duna detaye dje tempunan excitante ei,” el a skirbi un biaha.

Na 1941, Joseph F. Rutherford, e tempu ei presidente dje Sociedad Watch Tower, a asigná Ruman Booth pa traha n’e Kingdom Farm, cerca di Ithaca, New York. Ei el a sirbi fielmente pa 28 aña. Sin cu su amor p’e ministerio a paga nunca, e tabatin e deleite atrabes di e añanan pa asociá cu miles di studiante dje Scol Bíblico di Galad di Watchtower pa entrená misioneronan, cua tabata situá ei n’e Kingdom Farm te 1961. Na 1970, Ruman Booth a ser pidí pa sirbi n’e Watchtower Farms na Wallkill, New York, i a haña su mes asina den e mésun área unda el a cuminsá traha pionero rond di 45 aña pasá.

Na 1974, Ruman Booth a ser nombrá como miembro dje Cuerpo Gobernante di Testigonan di Jehova na Brooklyn, New York. El a sirbi fielmente den e capacidad ei te na su morto na 93 aña di edad. John Booth tabata mashá kerí pa su personalidad cristian profundamente humilde i bondadoso. E tabata predicá fielmente di cas pa cas i riba e cayanan dje stad te ora su salú i forsa a fay’é.

Aunke esnan cu a sirbi cuné ta lamentá su morto, nan ta haña consuelo den e promesa bíblico relacioná cu cristiannan ungí, cu nan ta ser resucitá pa bida celestial i cu “e cosnan cu nan a haci ta bai huntu cu nan.” (Revelacion 14:13; 1 Corintionan 15:51-54) Siguramente un ambiente nobo, pero unu den cua John Booth lo por sirbi Jehova pa semper!

[Plachi na página 32]

John Booth 1903-1996

[Rekonosementu]

Chicago Herald-American