Confia den Jehova i den Su Palabra

“Esnan cu conocé bo nomber lo confia den bo.”—SALMO 9:10.

1. Pakico nos por tin confiansa ainda den Jehova i den su Palabra den nos tempu moderno?

DEN e mundu moderno aki, e invitacion pa confia den Dios i den su Palabra, e Bijbel, por parce impráctico i irealístico. Sin embargo, e sabiduria di Dios a pasa e prueba di tempu. E Creador di homber i muher ta e Originador di matrimonio i famia, I e conocé nos necesidadnan mihó cu cualkier otro persona. Mescos cu e necesidadnan humano básico no a cambia, asina e maneranan fundamental pa percurá pa nan a keda mescos. E conseho sabí di Bijbel, aunke el a ser skirbí siglonan pasá, ainda ta duna e mihó guia pa éxito den bida i den resolvé problemanan. Haciendo caso di dje ta resultá den hopi felicidad—asta den e mundu científico i sofisticá den cua nos ta biba!

2. (a) Ki bon fruta obedencia n’e mandamentunan di Dios a producí den bida di Jehova su pueblo? (b) Kico mas Jehova ta primintí pa esnan cu ta obediente na dje i na su Palabra?

² Confiando den Jehova i aplicando e principionan di Bijbel ta trece beneficionan práctico tur dia. Prueba di esaki ta sinta den e bida di miyones di Testigo di Jehova rond mundu kendenan tabatin e conviccion i curashi pa aplicá e conseho di Bijbel. Pa nan, confiansa den e Creador i den su Palabra a duna bon resultado. (Salmo 9:9, 10) Obedeciendo e mandamentunan di Dios a haci nan mihó hende ora ta toca limpiesa, onrades, diligencia, respet p’e bida i posesionnan di otro hende, i moderacion den cuminda i bibida. Esei a guia na amor apropiado i entrenamentu den e círculo di famia—siendo hospitalario, paciente, misericordioso i pordonador—i tambe un cantidad di otro cosnan. Na un gran midí nan tabata capas pa evitá e mal fruta di rabia, odio, matamentu, envidia, temor, flohera, orguyo, gañamentu, calumnia, promiscuidad i inmoralidad. (Salmo 32:10) Pero Dios ta haci mas cu primintí un bon resultado pa esnan cu ta warda su leynan. Jesus a bisa cu esnan cu ta sigui e curso cristian lo ricibí “cien biaha mas tantu awor den e periodo di tempu aki, .. .mama i yu i cunucu, huntu cu persecucion, i den e binidero sistema di cosnan bida eterno.”—Marco 10:29, 30.

Evitá di Confia den Sabiduria Mundano

3. Ora cristiannan ta sigui pone confiansa den Jehova i den su Palabra, ki problemanan nan ta enfrentá tin biaha?

³ Un problema pa hende imperfecto ta cu nan tin tendencia di minimisá of lubidá loke Dios ta rekerí. Fácilmente nan ta cuminsá pensa cu nan sa mihó of cu sabiduria dje intelectualnan dje mundu aki ta superior cu esun di Dios, cu e ta mas actualisá. Sirbidornan di Dios tambe por desaroyá e actitud aki, siendo cu nan ta biba meimei dje mundu aki. Pues, extendiendo e invitacion amoroso pa scucha na su conseho, nos Tata celestial tambe ta incluí spiertamentunan apropiado: “Mi yu, no lubidá mi ley, i laga bo curason warda mi mandamentunan, pasobra largura di dia i añanan di bida i pas lo ser agregá na bo. Confia den Jehova cu tur bo curason i no len riba bo mes comprendimentu. Den tur bo camindanan tuma nota di dje, i e mes lo haci bo camindanan stret. No bira sabí den bo propio bista. Teme Jehova i apartá bo di loke ta malu.”—Proverbionan 3:1, 2, 5-7

4. Con persuasivo “e sabiduria dje mundu aki” ta, i pakico e ta “bobedad pa Dios”?

⁴ E sabiduria dje mundu aki ta disponibel na abundancia i for di hopi fuente. Tin hopi institucion di siñansa, i “na trahamentu di hopi buki no tin fin.” (Eclesiástes 12:12) Awor e asina yamá super-autopista di informacion [tecnologia avansá di multi-transmision di informacion] dje mundu di computer ta primintí di percurá datonan ilimitá riba prácticamente tur tópico. Pero teniendo tur e conocimentu aki disponibel no ta haci e mundu mas sabí of resolvé su problemanan. Mas bien, e situacion dje mundu ta bira pió tur dia. Comprendiblemente, Bijbel ta bisa nos cu “e sabiduria dje mundu aki ta bobedad pa Dios.”—1 Corintionan 3:19, 20.

5.Ki spiertamentunan Bijbel ta duna en cuanto“ e sabiduria dje mundu aki”?

⁵ Durante e parti final aki dje último dianan, ta solamente di spera cu e gañador principal, Satanas e Diabel, lo lansa un avalancha di mentira den un esfuerso pa mina confiansa den e berdad di Bijbel. Críticonan di Bijbel a producí un plamamentu rápido di bukinan speculativo cu ta reta e autenticidad i confiabilidad di Bijbel. Pablo a spierta su compañero cristian: “O Timoteo, warda loke a ser confiá na bo, apartando bo mes for di papiamentu bano cu ta violá loke ta santu i for dje contradiccionnan di loke falsamente ta ser yamá ‘conocimentu.’Pasobra den nan despliegue di tal conocimentu algun a desviá for dje fe.” (1 Timoteo 6:20,21) Bijbel ta spierta mas aleu: “Tene cuidou: kisas por tin un hende cu lo hiba boso como su víctima mediante e filosofia i engaño bano segun e tradicion di hende, segun e cosnan elemental dje mundu I no segun Cristo.”—Colosensenan 2:8

Bringa e Tendencia di Duda

6. Pakico vigilancia ta necesario pa prevení duda di saca rais den e curason?

⁶ Un otro táctica astuto dje Diabel ta di sembra duda den e mente. E ta semper alerto pa mira algun debilidad den fe i probechá di dje. Cualkier persona cu ta experenciá duda mester corda cu esun tras di tal dudanan ta esun cu a bisa Eva: “Ta realmente asina cu Dios a bisa cu boso no mag come di tur palu dje hofi?” Una bes e Tentador a planta duda den su mente, e siguiente paso tabata pa bis’é un mentira, locual Eva a kere. (Génesis 3:1, 4, 5) Pa evitá di laga duda destruí nos fe mescos cu esun di Eva, nos tin cu vigilá. Si un krenchi di duda tocante Jehova, su Palabra of su organisacion a cuminsá persistí den bo curason, dal paso lihé pa elimin’é promé cu e cria pus i resultá den algu cu lo por destruí bo fe.—Compará cu 1 Corintionan 10:12.

7. Kico bo por haci pa eliminá duda?

⁷ Kico bo por haci? Atrobe, e contesta ta pa confia den Jehova i den su Palabra. “Si cualkier di boso tin deficiencia den sabiduria, lagué sigui pidi Dios, pasobra e ta duna generosamente na tur i sin reprochá, i lo e ser duná na dje. Pero lagu’e sigui pidi cu fe, sin duda nada, pasobra ken cu ta duda ta manera un ola di laman cu bientu ta hiba p’aki i p’aya.” (Santiago 1:5, 6; 2 Pedro 3:17, 18) Pues oracion sincero na Jehova ta e promé paso. (Salmo 62:8) Anto, no vacilá pa pidi yudansa for di superintendentenan amoroso den e congregacion. (Echonan 20:28; Santiago 5:14, 15; Hudas 22) Nan lo yudá bo localisá e fuente di bo dudanan, cuanan por ta debí na orguyo of algun pensamentu incorecto.

8. Con pensamentu apóstata ta cuminsá hopi biaha, i kico ta e remedi?

⁸ Lesamentu of scuchamentu na ideanan apóstata of filosofia mundano a introducí dudanan venenoso? Bijbel ta consehá sabiamente: “Haci bo sumo posibel pa presentá bo mes aprobá na Dios, un trahador sin nada pa tene bergwensa di dje, manehando e palabra dje berdad corectamente. Pero evitá papiamentu bano cu ta violá loke ta santu; pasobra nan lo avansá na mas i mas maldad, i nan palabra lo plama manera gangrena.” (2 Timoteo 2:15-17) Ta interesante pa nota cu hopi persona cu a bira víctima di apostasia a cuminsá bai den e direccion robes dor di na promé instante keha tocante con nan a sinti cu nan a ser tratá den Jehova su organisacion. (Hudas 16) Mas despues a sigui crítica riba creencianan. Mescos cu un ciruhano ta actua lihé pa corta un gangrena, actua lihé pa eliminá for dje mente cualkier tendencia pa keha, di ta malcontentu cu e manera cu cosnan ta ser hací den e congregacion cristian. (Colosensenan 3:13, 14) Kita cualkier cos cu ta alimentá dudanan asina.—Marco 9:43.

9. Con un bon rutina teocrático lo yuda nos keda saludabel den fe?

⁹ Pega firmemente na Jehova i na su organisacion. Imitá Pedro lealmente, kende a declará cu determinacion: “Señor, cerca ken nos lo bai: Abo tin e dichonan di bida eterno.” (Juan 6:52, 60, 66-68) Tene un bon programa di studio dje Palabra di Jehova pa bo tene bo fe fuerte, mescos cu un escudo grandi, capas pa “paga tur e flechanan di candela dje malbado.” (Efesionan 6:16) Keda activo den e ministerio cristian, compartiendo amorosamente e mensahe di Reino cu otronan. Tur dia, meditá cu aprecio riba con Jehova a bendicioná bo. Sea gradicidu cu bo tin un conocimentu dje berdad. Haciendo tur e cosnan aki den un bon rutina cristian lo yudá bo pa ser felis, pa wanta i pa permanecé liber di duda.—Salmo 40:4; Filipensenan 3:15, 16; Hebreonan 6:10-12.

Siguiendo Jehova Su Guia den Matrimonio

10. Pakico ta specialmente importante pa acudí na Jehova pa guia den matrimonio cristian?

¹⁰ Ora Jehova a haci areglo pa homber i muher biba huntu como pareha casá, el a proponé no solamente pa yena e tera cómodamente sino tambe pa aumentá nan felicidad. Sin embargo, picá i imperfeccion a trece problemanan serio den e relacion matrimonial. Cristiannan no ta liber di esakinan, ya cu nan tambe ta imperfecto i ta experenciá e presionnan dje bida moderno. Tog, n’e grado cu nan ta confia den Jehova i den su Palabra, cristiannan por tin bon éxito den matrimonio i den criamentu di nan yunan. No tin lugá den matrimonio cristian pa prácticanan i conducta mundano. E Palabra di Dios ta exhortá nos: “Laga matrimonio sea onorabel entre tur, i e cama di matrimonio sea sin contaminacion, pasobra Dios lo husga fornicador i adúlteronan.” Hebreonan 13:4.

11. Den resolvé problemanan matrimonial, kico ámbos partner mester reconocé?

¹¹ Matrimonio cu ta cumpli cu e conseho bíblico tin un clima di amor, compromiso i siguridad. Tantu esposo como esposa ta comprendé i ta respetá e principio di hefatura. Ora dificultadnan ta desaroyá, hopi biaha nan ta debí na algun negligencia den aplicá e conseho bíblico. Ora di resolvé un problema cu ta persistí, ta vital pa ámbos partner enfocá onestamente riba kico e problema realmente ta i trata cu e causanan mas bien cu e síntomanan. Si discusionnan recien a hiba na poco of ningun acuerdo, e pareha por pidi yudansa imparcial for di un superintendente amoroso.

12. (a) Riba ki problemanan comun den matrimonio Bijbel ta duna conseho? (b) Pakico tin un necesidad di parti di ámbos partner pa haci cosnan na Jehova su manera?

¹² E problema ta enbolbé comunicacion, respet pa otro su sintimentunan, respet pa hefatura of con decisionnan ta ser tumá? E tin di ber cu criamentu di yu, of cu con pa balansá necesidadnan sexual? Of ta e presupuesto di famia, recreo, asociacion, cu esposa mester traha si of no, of unda boso mester biba? Sea cual sea e problema, Bijbel ta duna conseho práctico sea directamente pa medio di leynan of indirectamente pa medio di principionan. (Mateo 19:4, 5, 9; 1 Corintionan 7:1-40; Efesionan 5:21-23, 28-33; 6:1-4; Colosensenan 3:18-21; Tito 2:4, 5; 1 Pedro 3:1-7) Ora ámbos partner ta abstené nan di exigencianan egoista i ta laga amor haña su expresion completo den nan matrimonio, e resultado ta mayor felicidad. Mester tin un deseo ferviente di parti di ámbos partner matrimonial pa haci cambionan necesario, pa haci cosnan na e manera di Jehova. “Esun cu ta mustra perspicacia den un asuntu lo haña e bon, i felis ta esun cu ta confia den Jehova.”—Proverbionan 16:20.

Hóbennan—Scucha n’e Palabra di Dios

13. Pakico no ta fácil pa hóbennan cristian crece cu fe fuerte den Jehova i den su Palabra?

¹³ No ta fácil pa hóbennan cristian crece firme den fe siendo cu e mundu malbado ta tur rond di nan. Un motibu ta cu “henter e mundu ta drumí den poder dje malbado,” Satanas e Diabel. (1 Juan 5:19) Hóbennan ta bou di atake dje enemigu malicioso aki cu por haci loke ta malu mustra bon. E actitud di “ami promé,” e ambicionnan egoista, e anhelonan pa loke ta inmoral i cruel, I e corementu abnormal tras di placer—tur esakinan ta bini huntu den un patronchi comun i dominante di pensamentu describí den Bijbel como “e spiritu cu awor ta obra den e yunan di desobedencia.” (Efesionan 2:1-3) Satanas a promové e “spiritu” aki di un manera mañoso den buki di scol, den hopi dje música cu nos por tende, den deporte i den otro formanan di entretenimentu. Mayornan tin cu ser alerto pa contrarestá influencianan asina dor di yuda nan yunan lanta confiando den Jehova i den su Palabra.

14. Con hóbennan por “hui for di e deseonan cu ta compañá hubentud”?

¹⁴ Pablo a duna conseho paternal na su socio hóben Timoteo: “Hui for di e deseonan cu ta compañá hubentud, pero sigui tras di husticia, fe, amor, pas, huntu cu esnan cu ta inbocá Señor for di un curason limpi.” (2 Timoteo 2:22) Aunke no ta tur ‘deseo cu ta compañá hubentud’ ta malu riba nan mes, hóbennan mester “hui for di” nan den sentido cu nan no mester laga e cosnan aki ser un preocupacion, sobrando poco tempu pa empeñonan piadoso, si sobra mes. Aunke ‘body building,’ deporte, música, entretenimentu, hobi i biahamentu no ta necesariamente malu, nan por ta un trampa si nan bira e cosnan importante den bida. Hui completamente for di combersacion sin propósito, di slenter rond, di interes abnormal den sex, di djis sinta pornada i ferfelá bo mes, i di keha cu bo mayornan no ta comprendé bo.

15. Ki cosnan por sosodé den e privacidad di cas cu por contribuí cu hóbennan ta hiba un bida dobel?

¹⁵ Asta den privacidad na cas, peliger por sluip hóbennan. Si nan ta mira programanan di television inmoral of violento, e deseo di haci mal cosnan por ser inculcá. (Santiago1:14,15). Bijbel ta consehá: “O stimadornan di Jehova, odia loke ta malu.” (Salmo 97:10; 115:11) Jehova sa ora un hende ta purba hiba un bida dobel. (Proverbionan 15:3) Hóbennan cristian, wak rond den bo kamber. Bo tin ‘poster’ di deportista of músiconan famoso cu ta inmoral cologá na muraya, of bo tin cosnan saludabel cu ta bon recordatorionan cologá? (Salmo 101:3) Den bo kashi di paña, bo tin bistí modesto, of algun di bo pañanan ta reflehá e estilonan extremo di bisti dje mundu aki? Den maneranan sutil e Diabel por cogé bo den trampa si bo entregá n’e tentacion di purba loke ta malu. Bijbel ta consehá sabiamente: “Mantené boso sano huicio sea vigilante. Boso adversario, e Diabel, ta cana rond manera un leon cu ta gruña, buscando un hende pa guli.”—1 Pedro 5:8.

16. Con e conseho di Bijbel por yuda un hóben haci tur persona cu realmente ta conta ser orguyoso di dje?

¹⁶ Bijbel ta bisá bo pa vigilá bo asociacion. (1 Corintionan 15:33) Bo compañeronan mester ta esnan cu ta teme Jehova. No cede na presion di bo pareunan. (Salmo 56:11; Proverbionan 29:25) Sea obediente na bo mayornan temeroso di Dios. (Proverbionan 6:20-22; Efesionan 6:1-3) Acudí n’e ancianonan pa guia i animacion. (Isaias 32:1, 2) Tene bo mente i wowonan fihá riba balornan i metanan spiritual. Busca oportunidad pa haci progreso spiritual i pa participá den actividadnan di congregacion. Siña con pa haci cosnan cu bo mannan. Crece firme i saludabel den e fe, i e ora ei lo bo proba cu en berdad bo ta un persona cu ta bal—un persona digno di bida den Jehova su mundu nobo! Nos Tata celestial lo ta orguyoso di bo, bo mayornan terenal lo tin deleite den bo, i lo bo animá bo rumannan cristian. Esei ta loke ta conta!—Proverbionan 4:1, 2, 7, 8.

17. Ki beneficionan ta bini pa esnan cu ta confia den Jehova i den su Palabra?

¹⁷ Den frase poético e salmista a ser inspirá pa skirbi: “Jehova mes lo no retené nada di loke ta bon for di esnan cu ta cana liber di falta. O Jehova di ehércitonan, felis ta e homber cu ta confia den bo.” (Salmo 84:11,12) Sí, felicidad i éxito, no decepcion i fracaso, ta loke lo bini pa tur esnan cu ta confia den Jehova i den su Palabra, e Bijbel.—2 Timoteo 3:14, 16, 17.

Con Lo Bo Contestá?

◻ Pakico cristiannan no mester pone nan confiansa den “e sabiduria dje mundu aki”?

◻ Kico mester ser hací si un persona ta experenciando dudanan?

◻ Con hacimentu di cosnan na Jehova su manera ta trece éxito I felicidad den matrimonio?

◻ Con Bijbel ta yuda hóbennan “hui for di e deseonan cu ta compañá hubentud”?

[Plachi na página 23]

Crisitiannan ta acudí na Jehova I na su Palabra, miéntras cu nan ta rechasá como bobedad “e sabiduria dje mundu aki”

[Plachi na página 25]

Famianan cu ta confia den Jehova i den su Palabra tin bon éxito i felicidad