Yaluzi Casi A Ruiná Mi Bida

YALUZI realmente a cuminsá afectá mi seriamente ora mi a casa cu mi di dos esposo, Marco.a Nos tur dos tabatin cu percurá pa un cantidad di yu di criansa i trata cu nos partnernan anterior. E situacion tin biaha tabata insoportabel. Ki ora cu tabatin un confrontacion di famia, tabata parce cu Marco no a apoyá mi. Mi a cuminsá sinti cu ainda e tabata stima su ex-casá. En bes di dominá mi yaluzí, mi a permitié dominá mi bida. Mi tabata sintí mi emocionalmente menasá ki ora cu e ex-casá di Marco tabata den becindario.

Constantemente mi tabata wak Marco, asta wak su wowonan pa mi weta unda e tabata mirando. Mi tabata lesa den su miradanan cosnan cu ni sikiera tabata asina. Tin biaha mi tabata acus’é abiertamente di ta stima su ex-casá ainda. Na un ocasion e tabata asina angustiá dor di esaki cu el a lanta i bandoná un asamblea cristian. Mi a sintí mi culpabel dilanti Jehova. Mi a haci mi bida di famia infelis pasobra finalmente e yunan tambe a ser afectá. Mi tabata odia mi mes pa loke mi tabata haciendo, pero maske cuantu mi a purba, mi simplemente no por a dominá mi yaluzí.

En bes di yudá mi, Marco a cuminsá tuma represaya. Ora mi tabata acus’é, e tabata gritá mi, “Yalurs, bo ta simplemente yalurs.” El a asta parce di purba deliberadamente pa hací mi yalurs. Kisas el a pensa cu esaki lo a cura mi yaluzí, pero esei solamente a haci cosnan pió. El a cuminsá wak otro hende muher, comentando con bunita nan tabata. Esaki a poné mi sintí mi asta mas inferior i indeseabel. A yega n’e punto caminda un otro emocion—odio—a lanta cabes como un realidad spantoso. N’e punto ei, mi tabata asina confundí cu mi simplemente kier a separá for di dje i su famia.

Ora Bijbel ta bisa cu “yaluzí ta putrimentu p’e wesunan,” esei ta exactamente loke e ta. (Proverbionan 14:30) Mi salú a cuminsá ser afectá awor. Mi a desaroyá úlcera na stoma cu a tuma hopi tempu pa cura. Mi a sigui haci mi bida miserabel dor di bira sospechoso di tur loke Marco tabata haci. Mi tabata busca den su sacunan, i si mi a haña numbernan di telefon, mi tabata yama pa mira ken tabata contestá. Den mi curason mi tabatin asina tantu bergwensa di mi mes, cu mi tabata yora debí n’e bergwensa dilanti Jehova. Tog mi no por a stop mi mes. Mi tabata mi propio pió enemigu.

Mi spiritualidad a sufri te n’e punto cu mi no por a haci oracion mas. Mi tabata stima Jehova i realmente kier a haci loke tabata corecto. Mi tabata conocé tur e textonan relacioná cu esposo i esposa, pero mi no tabata capas pa aplicá nan. Pa promé bes den mi bida, mi no tabata kier a biba mas, apesar dje echo cu mi tabatin yunan maraviyoso.

E ancianonan den e congregacion cristian tabata un gran animacion i a haci nan best pa yudá mi. Pero ora nan a mencioná e asuntu di mi yaluzí, mi tabata nenga esei pa motibu di bergwensa, sin kier a admití cu mi tabatin un problema asina.

Cu tempu, mi salú a deteriorá te na un grado cu mi tabatin cu bai hospital pa un operacion. Miéntras mi tabata ei mi a realisá cu bida no por a sigui manera e tabata bai. Ami cu Marco a dicidí na separá pa tres luna pa examiná nos situacion sin ser asina emocionalmente enbolbí. Durante e tempu aki algu maraviyoso a tuma lugá. Den e revista Spierta! a aparecé un artículo titulá “Yudansa pa Yunan Adulto di Alcohóliconan.”b

Wak, mi mama tabata un alcohólico. Aunke mi mayornan no tabata abusá físicamente di mi, nan nunca a mustra cariño físico pa otro of pa cu mi. Mi no por corda cu mi mama hamas a tené mi den su brasanan of bisá mi cu e stimá mi. P’esei eigenlijk mi a lanta sin realmente sa con pa stima, of, mes importante, con pa ser stimá.

Hopi biaha mi mama a contá mi dje aventuranan amoroso di mi tata i cu e no por a confi’é. Pues mi ta suponé cu mi a lanta desconfiando hende homber en general. Debí na mi criansa, mi semper a sintí mi inferior na otronan, specialmente otro hende muher. Lesando e artículo ei di Spierta! a yudá mi capta e nificacion dje cosnan aki. Pa promé bes, mi a comprendé e causanan fundamental di mi problema cu yaluzí.

Mi a mustra mi esposo, Marco, e artículo di Spierta! i esei a yuda e tambe comprendé mi mihó. Pronto ami cuné tabata capas pa sigui e conseho di Bijbel na parehanan cu ta pensa di separá. Nos a reconciliá. (1 Corintionan 7:10, 11) Awor nos matrimonio ta mihó cu nunca. Nos ta haci mayoria cos huntu, specialmente ora ta trata di actividadnan cristian. Marco ta mustra mas empatia. Casi tur dia e ta bisá mi cuantu e ta stimá mi, i awor sí mi ta ker’é.

Ki ora cu mi sa cu nos ta bai drenta den contacto cu e ex-casá di Marco, mi ta haci oracion na Jehova pa fortalesa, pidiend’e p’e yudá mi comportá mi mes den un manera cristian i maduro. I e ta funcioná. Asta mi sintimentunan di enemistad pa cuné ta menguando. Mi no ta cana mas cu pensamentu negativo of laga mi imaginacion sali for di control.

Ainda mi ta haña algun sintimentu di yaluzí dje clase incorecto. Solamente bida perfecto den Dios su mundu nobo lo elimin’é completamente. Miéntras tantu, mi a siña dominá yaluzí, en bes di permitié dominá mi. Sí, yaluzí casi a ruiná mi bida, pero gracias na Jehova i su organisacion, awor mi ta un persona muchu mas felis, i mi salú ta bon atrobe. Un biaha mas mi tin un relacion fuerte cu mi Dios, Jehova.—Contribuí.

[Notanan]