Un Hefe Ta Considerá Su Futuro

E HEFE west africano tabata un lider masha stimá i altamente respetá den su comunidad. Dia el a cumpli 78 aña, su amigunan, famia i otro hende cu tabata kier a dese’é tur cos bon, a bini huntu pa felicit’é. Den un discurso, e hefe a scoge un tópico poco comun pa un ocasion asina. El a papia di su ideanan tocante bida despues di morto.

El a bisa cu despues dje mundu aki “tin un mundu nobo liber di engaño, envidia i golosidad.” El a describi’é como un mundu “cubrí cu misterio,” unu poblá solamente cu hende hustu, kendenan lo traha huntu cu Dios.

Creencianan asina ta comun entre hende rond Africa. Segun religion tradicional africano, morto no ta fin di bida sino simplemente un transicion, un pasamentu pa bida den e region di spiritu. Nan ta bisa cu ora un persona muri, e ta pasa over for dje mundu visibel pa esun invisibel. Como un spiritu, e individuo e ora ei ta drenta un dominio habitá dor di su antepasadonan.

Hopi west africano ta kere cu e antepasadonan, of spiritunan di antepasado, ta garantisá e bienestar di nan famianan riba tera. E buki West African Traditional Religion ta declará: “No tin un distincion rígido entre e influencia di e miembronan dje comunidad aki riba tera ainda, i di esnan cu ta den e mundu mas ayá. Ora nan tabata aki riba tera, [e antepasadonan] tabata ancianonan di nan famia. Awor cu nan ta invisibel pa nos, ainda nan ta ancianonan den e mundu di spiritu. Nan no ta stop di interesá nan mes den e bienestar general di nan famia.”

Consecuentemente, e hefe di edad avansá mencioná den e introduccion a spera di uni cu su antepasadonan i traha huntu cu nan den e region di spiritu. El a bisa: “Mi ta firmemente convencí cu tin bida despues di morto i cu mi tin e posibilidad di sigui sirbi como anciano of hefe—asta despues di morto.”

Sin embargo, debí na loke e hefe a bisa siguientemente, e corant Sunday Times a indicá cu e “no a parce absolutamente convencí” tocante bida despues dje mundu aki. El a bisa e multitud cu a bini huntu cu el a tende di un buki cu a splica tocante bida despues di morto. E hefe tabata buscando e buki pa cincu aña. E tabata asina ansioso pa les’é cu el a ofrecé e ekivalente di NAƒ 2.700 na ken cu por a trece un ehemplar p’e.

E hefe por a spar su mes dje molester ei dor di consultá un buki cu no ta difícil pa haña. E ta un buki fácil pa haña, producí no dor di hende sino dor dje Creador di tur hende. (1 Tesalonicensenan 2:13) E buki ei ta e Bijbel. Kico e ta bisa tocante bida despues di morto?