E Tabata Altamente Faborecí dor di Jehova

“BON DIA, altamente faborecí, Jehova ta cu bo.” Ki un saludo! Esun na palabra ta ningun otro sino angel Gabriel. E ta dirigiendo su mes na un hende muher hóben di curason humilde​—⁠Maria, yu muher di un homber yamá Heli. E aña ta 3 P.E.C., i e lugá ta e stad di Nazaret.​—⁠Lucas 1:​26-28.

Maria ta primintí den matrimonio na José e carpinté. Segun e ley i custumber hudiu, e ta ser considerá como su esposa comprometí. (Mateo 1:18) Mescos cu Maria, José ta un persona di condicion humilde. Pakico, anto, e angel ta saludá Maria como unu cu ta altamente faborecí?

Su Privilegio Maraviyoso

Gabriel ta agregá: “No tene miedu, Maria, pasobra bo a haña fabor cerca Dios; i, mira! lo bo concibí den bo matris i duna lus na un yu homber, i bo tin cu dun’é e nomber Jesus. Esaki lo ta grandi i lo ser yamá Yu dje Haltísimo; i Jehova Dios lo dun’é e trono di David su tata, i lo e reina como rey riba e cas di Jacob pa semper, i lo no tin fin di su reino.”​—⁠Lucas 1:​29-33.

Asombrá i babucá, Maria ta puntra: “Con esaki por ta, siendo cu mi no tin relacion sexual cu un homber?” Gabriel ta contestá: “Spiritu santu lo baha riba bo, i poder dje Haltísimo lo cubrí bo cu sombra. P’e motibu ei tambe loke lo nace lo ser yamá santu, Yu di Dios.” Pa kita cualkier duda, e angel ta agregá: “Mira! Elisabet bo pariente a concibí e mes tambe un yu, den su behes, i esaki ta e di seis luna p’e, e asina yamá muher steril; pasobra cerca Dios ningun declaracion ta un imposibilidad.”​—⁠Lucas 1:​34-37.

Maria ta aceptá mesora e maraviyoso privilegio di sirbishi aki. Boluntariamente, pero den humildad, e ta respondé: “Mira! Jehova su esclaba! Laga sosodé cu mi segun bo declaracion.” Cu esei, Gabriel ta bai. Maria ta pura bai na un stad den e region yen di ceru di Huda. Yegando n’e cas dje sacerdote Zacarías i su esposa, Elisabet, e ta haña e situacion exactamente manera e angel a describi’é. Ki un goso ta yena e curason di Maria! Su lipnan ta brota cu palabranan di alabansa na Jehova.​—⁠Lucas 1:​38-55.

E Ta Bira Esposa di José

Un bírgen mester percurá p’e curpa humano di Jesus, pasobra un nacimentu asina a ser profetisá. (Isaías 7:14; Mateo 1:​22, 23) Pero pakico un bírgen comprometí ta necesario? Esei ta pa por proveé un tata di criansa kende por transmití n’e mucha e derecho legal n’e trono di Rey David. Tantu José como Maria ta pertenecé n’e tribu di Huda i ta desendiente di Rey David. Pues e derechonan di herencia di Jesus lo ta dobbel establecí. (Mateo 1:​2-16; Lucas 3:​23-33) Ta p’e motibu aki e angel despues ta sigurá José cu e no mester vacilá pa tuma Maria como su esposa legal, aunke e ta na estado.​—⁠Mateo 1:​19-25.a

Un decreto di belasting emití dor di César Augusto ta obligá José i Maria pa registrá nan mes den Betlehem. Miéntras nan ta einan, e ta duna lus na su promé yu homber. Wardadornan ta bini pa mira e criatura i nan ta duna alabansa na su Tata, Jehova. Despues di 40 dia di purificacion segun e Ley di Moises, Maria ta bai n’e tempel den Jerusalem pa haci expiacion pa su picánan. (Levítico 12:​1-8; Lucas 2:​22-24) Sí, siendo cu Maria no a ser concibí den un manera imaculá, i pues no liber for dje mancha di picá, su imperfeccionnan heredá mester ser cubrí dor di sacrificionan di expiacion.​—⁠Salmo 51:⁠5.

Miéntras cu Maria i José ta n’e tempel, e anciano Simeon i e profetisa Ana di edad avansá ta ser privilegiá pa contemplá e Yu di Dios. Maria no ta e centro di atencion. (Lucas 2:​25-38) Mas despues, magonan ta duna homenahe no na dje sino na Jesus.​—⁠Mateo 2:​1-12.

Despues cu Jesus su mayornan hui pa Egipto i keda ei te ora e malbado Herodes muri, nan ta regresá i ta establecé nan mes den e pueblo chikitu di Nazaret. (Mateo 2:​13-23; Lucas 2:39) Ta ei José i Maria a lanta Jesus bou di condicionnan familiar piadoso.

Maria A Haña Mas Yu

Cu tempu Maria i José ta duna Jesus rumannan homber i muher natural. Ora Jesus su ministerio ta trec’é Nazaret, e pueblo caminda el a lanta, su conocínan di infancia ta reconoc’é. “Esaki no ta e yu dje carpinté?” nan ta puntra. “Su mama no yama Maria, i su ruman hombernan Santiago i José i Simon i Hudas? I su ruman muhernan, nan tur no ta cerca nos?” (Mateo 13:​55, 56) E nazarenonan ta refiriendo n’e famia físico di José i Maria, incluyendo su yu hombernan i yu muhernan kendenan nan conocé como Jesus su rumannan homber i muher natural.

E rumannan homber i muher aki no ta primu di Jesus. Tampoco nan ta su disipelnan, of rumannan spiritual, pasobra Juan 2:12 ta haci un distincion cla entre e dos gruponan ora e declará: “E [Jesus] i su mama i rumannan i su disipelnan a baha pa Capernaum.” Añanan despues den Jerusalem, apostel Pablo a mira Céfas, of Pedro, i a agregá: “Mi no a mira ningun dje otro apostelnan; mi a mira solamente Santiago, e ruman di Señor.” (Galatio 1:​19, The Jerusalem Bible) Ademas, e declaracion cu José “no tabatin relacion sexual cu [Maria] te ora el a duna lus na un yu homber” ta indicá cu Jesus su tata di criansa tabatin relacion cuné despues di esei i a bira tata di su otro yunan. (Mateo 1:25) Di acuerdo cu esei, Lucas 2:7 ta yama Jesus e yu “primogénito” di Maria.

Un Mama Temeroso di Dios

Como un mama temeroso di Dios, Maria ta cooperá cu José den instruí su yunan den husticia. (Proverbio 22:⁠6) Cu e ta un studiante ferviente dje Scritura ta ser mirá for di su expresion spiritualmente ricu ora el a ser saludá dor di Elisabet. N’e tempu ei Jesus su mama ta ripití e sintimentunan dje cantica di Hana i ta manifestá conocimentu dje salmonan, scrituranan histórico i profético, i bukinan di Moises. (Génesis 30:13; 1 Samuel 2:​1-10; Proverbio 31:28; Malaquías 3:12; Lucas 1:​46-55) Maria a memorisá sucesonan profético i dichonan, a atesorá nan den su curason, i a meditá riba nan den su mente. P’esei e ta bon ekipá pa compartí den dunamentu di instruccion como mayor n’e hobencito Jesus.​—⁠Lucas 2:​19, 33.

Jesus, bon siñá na edad di 12 aña, ta manifestá conocimentu bíblico cu ta asombrá hombernan siñá n’e tempel. Debí cu el a separá for di su mayornan durante e temporada dje Pascu ei, su mama ta bisa: “Mucha, pakico bo a trata nos asina aki? Ata ami cu bo tata tabata buscá bo cu angustia mental.” Jesus ta respondé: “Pakico boso tabatin cu buscá mi? Boso no tabata sa cu mi mester ta den e cas di mi Tata?” Incapas pa capta e nificacion dje contesta aki, Maria ta ward’é den su curason. Regresando Nazaret, Jesus ta sigui “progresá den sabiduria i den crecementu físico i den fabor cu Dios i hende.”​—⁠Lucas 2:​42-52.

Maria como Disipel di Jesus

Ta ki apropiado cu Maria, cu tempu, lo mester a bira disipel dedicá di Jesus! E ta mansu i no tin ambicion pa sobresalí apesar di su asignacion único cu Dios a dun’é. Maria conocé e Scritura. Si bo investigá e Scritura bo mes, lo bo no hañ’é describí cu un krans di lus riba su cabes, sintá riba un trono como “mama-reina” i bañá den e gloria reflehá dor di Cristo. Mas bien, lo bo hañ’é leu den fondo, for di centro di atencion.​—⁠Mateo 13:​53-56; Juan 2:⁠12.

Jesus a stroba cualkier idolatria di Maria entre su siguidornan. Miéntras e tabata papiando na un ocasion, “un señora for dje multitud a sclama, ‘Bendicioná ta e matris cu a cargá bo i e pechunan cu a criá bo!’ ‘Mas bien,’ el a contestá, ‘bendicioná ta esnan cu ta tende e palabra di Dios i ta ward’é.’ ” (Lucas 11:​27, 28, The New American Bible, traducí dor di miembronan dje Asociacion Católico Bíblico di Merca) Na un fiesta di casamentu, Jesus a bisa Maria: “Kico ami tin di haci cu bo, muher? Mi ora no a yega ainda.” (Juan 2:⁠4) Otro traduccionnan ta bisa: “Laga e asuntu den mi man.” (Weymouth) “No purba dirigí mi.” (An American Translation) Sí, Jesus a respetá su mama, pero e no a pon’é riba un pedestal.

Privilegionan Eterno

Ki privilegionan Maria a disfrutá di dje! El a duna lus na Jesus. Despues el a cria i entrená e mucha chikitu. Finalmente, el a ehercé fe, birando Cristo su disipel i ruman muher spiritual. Den nos último bistaso bíblico di Maria, nos ta mir’é den un cuarto ariba den Jerusalem. E ta einan huntu cu Jesus su apostelnan, su otro yu hombernan i algun muher fiel​—⁠tur adoradornan di Jehova.​—⁠Echo 1:​13, 14.

Cu tempu, Maria a muri i su curpa a bolbe na stof. Mescos cu otro siguidornan ungí di promé di su yu stimá, el a drumi den morto te n’e debido tempu di Dios pa resucit’é como un criatura spiritual cu bida inmortal den cielu. (1 Corintio 15:​44, 50; 2 Timoteo 4:⁠8) Ki encantá esun “altamente faborecí” aki mester ta awor den e presencia di Jehova Dios i di Jesucristo.

[Footnotes]

[Caption on page 31]

Maria tabata altamente faborecí como e mama di Jesus