“Asina Cristian Berdadero Mester Comportá Nan Mes”

DEN su buki di 1990 Arbeit macht tot​—⁠Eine Jugend in Auschwitz (Trabou Ta Matá Bo​—⁠Hubentud den Auschwitz), e sobrebibiente di Auschwitz Tibor Wohl ta documentá un combersacion cu el a tende pa casualidad entre dos compañé prizonero. Un di nan, un austriaco, a afirmá cu e ta un “incrédulo.” Sin embargo, el a elogiá e prizoneronan cu a carga e insignia puus [biña] forma di triángulo riba nan paña​—⁠e Studiantenan di Bijbel, manera Testigonan di Jehova a ser yamá den e campamentu.

“Nan no ta bai guera,” e austriaco a bisa su compañé. “Nan ta preferá di ser matá en bes di mata otro hende. Den mi bista ta asina cristian berdadero mester comportá nan mes. Mi tin cu contá bo tocante un experencia masha placentero cu mi tabatin cu nan. Nos tabata huntu cu tantu hudiunan como Studiantenan di Bijbel den un blok den e campo di concentracion di Stutthof. E tempu ei e Studiantenan di Bijbel mester a traha obligatoriamente, como parti di nan castigu, pafó den e friu amargo. Nos no por a comprendé con nan a sobrebibí. Nan a bisa cu Jehova a duna nan fortalesa. Nan tabatin mester di nan pan desesperadamente, siendo cu nan tabata sufri di hamber. Pero kico nan a haci? Nan a colectá tur e pan cu nan tabatin, a tuma mitar di dje i a duna e otro mitar na nan rumannan, nan rumannan spiritual, cu a drenta hambrá for di otro campamentunan. I nan a yama nan bon biní i a sunchi nan. Promé cu nan a come, nan a haci oracion, i despues nan caranan a briya cu felicidad. Nan a bisa cu ningun hende tabatin hamber mas. Pues, bo ta mira, e ora ei mi a pensa den mi mes, ‘Esakinan ta cristian berdadero.’ Ta asina mi semper a imaginá cu nan mester ta. Ki bunita lo tabata pa duna compañeronan hambrá un bon biní asina aki den Auschwitz!”