Informe Di Proclamador Di Reino

E Palabra di Dios ta eherce poder

“E PALABRA di Dios ta bibo i ta eherce poder.” (Hebreo 4:12) E palabra ei a resulta di ser cierto hopi bez ora hende cu religion falso a gaña a yega na contacto cu berdad bíblico. Manera e sigiente experencia den e República Dominicana ta mustra, e poder dje Bijbel por cambia e bida di hende i duna speranza.

Testigo di Jehova a bishita un señora católico prominente cu recientemente a perde dos yiu chikito den morto. El a keda mashá desconsolá i a lamenta su tragedia tur dia. Testigo di Jehova a mustré loke e Bijbel ta bisa den Juan 5:​28, 29 tocante e speranza di resureccion. Despues di mas conbersacion cu Testigo di Jehova, e señora no solamente a haya consuelo den e speranza dje resureccion sino a realiza cu su guíanan religioso católico tabata gañé.

Pronto el a tuma su retiro for dje Iglesia católico, i a acepta un estudio bíblico regularmente cu Testigo di Jehova. Sin embargo, su esposo, no tabata di acuerdo cu su punto di bista. Siendo cu e també tabata un católico mashá prominente, el a haci arreglo pa amigo político i religioso bon conocí bishita su esposa den un esfuerzo pa convencé di kité for di su camina i trecé di nobo den e religion católico. Despues el a usa e amenaza di divorcio, i na un tempo asta a informa pariente di dje i otro miembro dje religion di cu nan tabata divorciando.

Pero, tal estrategia no a logra. Al contrario, su esposa a bira tanto mas determiná di sigi cu su estudio bíblico. Pa motibo di su crecimento spiritual i e desaroyo di calidad cristian excelente, su esposo a decidi di keda cuné en bez di busca divorcio. Un dia e asta a conbiní pa examina e literatura bíblico cu su esposa tabata studia​—⁠pero cu un solo condicion. El a deseá di usa su mes version católico dje Bijbel.

Pa su asombro, cu e yudanza dje literatura di Testigo di Jehova, el a cuminza siña cosnan nobo directamente for di su mes Bijbel. El a realiza cu su esposa a scoge e camina correcto, i pronto e tabata cla pa sigi su ehempel. Realmente, el a mira e necesidad di haci cambio den su mes bida. Un desafío dificultoso tabata di bandona humamento di cigaría. Despues di a leza e número di Despertad! di 8 di Juli di 1989, cu tabatin e título riba su capa “Morto pa bende​—⁠diez manera pa bandona humamento,” el a keda determiná di bandona tal costumber no bíblico. Den lugar dje acostumbrado paki di cigaría hayá hopi bez den su sacu, el a cuminza hiba e número ei di Despertad! Cada bez cu e tabatin e impulso di huma, el a leza e artículo tocante humamento. Su esfuerzo a logra! Despues di a leza e artículo hopi bez, e por a bandona humamento.

Awe tanto esposo como esposa ta sirbi Jehova Dios como sirbidor bautizá di dje. Ora circunstancia ta permiti, e esposo ta sirbi como evangelizador di tempo completo, dedicando hopi di su tempo ne predicacion dje bon nobo dje Reino di Dios, i e ta sirbi como sirbidor ministerial den e congregacion local di Testigo di Jehova. E i su esposa ta spera e resureccion ora nan por recibi nan yiunan na bida di nobo den e mundo nobo. Sí, e Palabra di Dios, e Bijbel, ta bibo i ta eherce poder!