E Generacion di 1914—Pakico e ta Significativo?

“Nos lector sa cu pa varios aña caba nos a spera pe era aki cera den un tempo terribel di dificultad, i a spera pa esei cuminza di ripiente i vigorosamente un poco tempo despues di October di 1914.”

—Comentario di Watch Tower and Herald of Christ’s Presence di 15 di Mei, di 1911.

DESDE 1879 e revista conocí ne tempo ei como The Watch Tower and Herald of Christ’s Presence (yamá awor E Toren di Vigilancia Anunciando e Reino di Jehova Dios) a siñalá frecuentemente na 1914 como un aña marcá den profecía bíblica. Ora e aña ei a yega cerca, el a haci lector corda cu nan por spera “un tempo terribel di dificultad.”

Hende cristian a publica e informacion na tur parti, fundando tal informacion riba nan comprendimento dje “siete tempo” i e “tempo di gentil” mencioná den e Bijbel.a Nan a comprende cu e tempo ei ta 2.520 aña largu—cuminzando cu e derota dje reino di David di antigua den Jerusalem i terminando den October di 1914.b—Daniel 4:16, 17; Lucas 21:24, Version Moderna.

Dia 2 di October di 1914, Charles Taze Russell, e presidente corriente dje Sociedad Watch Tower Bible and Tract, a anuncia cu balentía: “Tempo gentil a terminá; e dia di su reynan a pasa.” Ki cierto su palabra a resulta di ser! Invisibel pa wowo humano, den October di 1914 a sosode den cielo un suceso cu a sagudi mundo. Jesucristo, e Heredero permanente dje “trono di David,” a cuminza su gobernacion como Rey riba tur humanidad.—Lucas 1:32, 33; Revelacion 11:15.

Kizás bo ta puntra, ‘Pero, si Cristo a cuminza goberna na 1914, pakico e situacion aki riba tera a empeora?’ Pasobra Satanás, e enemigo invisibel di humanidad ta sigi existi. Te na 1914, Satanás por a drenta den cielo. E situacion a cambia cu establecimento dje Reino di Dios na 1914. “Gera a cuminza den cielo.” (Revelacion 12:7) Satanás i su demoñonan tabata derotá i tirá abao ne tera, cu efecto catastrófico pa humanidad. E Bijbel ta profetizá: “Ai di tera i di lamá, pasobra e Diabel a baha cerca boso, mashá rabiá, sabiendo cu ta kedé poco tempo mas.”—Revelacion 12:12.

Den siglo uno EC, Jesús a bisa cu su presencia invisibel como Rey nobo dje tera lo ser manifestá pa un siñal visibel. E disípelnan a puntré: “Ki siñal lo tin di bo presencia i dje conclusion dje sistema di cosnan?” Con el a contestá? “Nacion lo lanta contra nacion i reino contra reino, i lo tin scarcidad di cuminda i temblor den un lugar tras di otro. Tur e cosnan ei ta principio di dolor di afliccion.”—Mateo 24:3, 7, 8.

Asina mes, además dje gera cu a cuminza na 1914, tabatin scarcidad terribel di cuminda, siendo cu produccion normal di cuminda tabata trastorná pa mas cu cuater aña. Kico di “temblor den un lugar tras di otro”? Durante e diez aña despues di 1914, no menos cu diez temblor destructivo a mata mas cu 350.000 hende. (Mira e cuadro.) En berdad, e generacion di 1914 a experimenta un “principio di dolor di afliccion.” I despues dje tempo ei, dolor di afliccion a dal cu regularidad den e forma di desaster natural, hamber, i hopi gera mes.

No obstante, e noticia di establecimento dje Reino di Dios na 1914 ta bon noticia pasobra e Reino lo salba e planeta for di ruina. Di ki manera? Lo e elimina tur religion falso i hipócrita, gobierno corrupto, i e mal influencia di Satanás. (Daniel 2:44; Romano 16:20; Revelacion 11:18; 18:4-8, 24) Además, lo e introduci un mundo nobo den locual “husticia lo biba.”—2 Pedro 3:13.

Un poco despues di Gera Mundial I, sincero Studiante di Bijbel, e nomber di Testigo di Jehova ne tempo ei, a cuminza distingi nan privilegio tocante un otro aspecto dje siñal dje presencia di Jesús como Rey. Jesucristo a profetiza: “E bon nobo di reino lo ser predicá den tur e tera habitá como testimonio pa tur nacion; anto e fin lo yega.”—Mateo 24:14.

Desde un comienzo chikito na 1919, Testigo di Jehova a sigi sin para plamando tal “bon nobo.” Como resultado, miyones di hende di mas cu 200 tera ta wordu recogí awor como e pueblo dje Reino di Dios. I cuanto bendicion ta spera tal pueblo! E Reino lo caba cu gera, hamber, crimen, i opresion. Lo e pone fin na maleza i morto!—Salmo 46:9; 72:7, 12-14, 16; Proverbio 2:21, 22; Revelacion 21:3, 4.

Promé cu e generacion di 1914 ta pasa, e trabao di predica e Reino lo cumpli cu su propósito. “Anto,” segun Jesús, “lo tin tribulacion grandi tal como no a sosode desde principio di mundo te awor, no, ni lo no sosode atrobé. Realmente, amenos cu e dianan ei ta cortá, ningun carni lo ser salbá; pero pa causa dje escogínan e dianan ei lo ser cortá.”—Mateo 24:21, 22.

No haci e equibocacion cu e generacion di promé cu 1914 a haci. Situacion actual lo no sigi pa semper. Cambio asombroso ta bini. Pa hende cu ta camna cu prudencia, tin prospecto maraviyoso.

Pues, presta atencion ne palabra dje profeta di antigua: “Busca Jehova, tur hende manso dje tera . . . Busca husticia, busca humildad. Probablemente boso lo ser scondí den e dia dje rabia di Jehova.” (Sofonías 2:3) Con nos por aplica tal conseho? Artículo cu ta sigi por yudábo contestá e pregunta.

[Nota]

[Grafik na página 7]

Temblor durante e diez aña despues di 1914

Fecha: Lugar: Morto:

13 di Januari di 1915 Avezzano, Italia 32.600

21 di Januari di 1917 Bali, Indonesia 15.000

13 di Februari di 1918 Provincia di Kwangtung, China 10.000

11 di October di 1918 Puerto Rico (occidente) 116

3 di Januari di 1920 Veracruz, México 648

7 di September di 1920 Reggio di Calabria, Italia 1.400

16 di December di 1920 Provincia di Ningsia, China 200.000

24 di Mart di 1923 Provincia di Szechwan, China 5.000

26 di Mei di 1923 Irán (nortoost) 2.200

1 di September di 1923 Tokio-Yokohama, Hapón 99.300

Dje lista di “Temblor significativo di mundo,” den e buki Terra Non Firma, di James M. Gere i Haresh C. Shah.