Hesus A Lanta Lázaro for di Morto

Hesus tabatin tres bon amigu ku tabata biba na Betania. Nan nòmber tabata Lázaro i su dos ruman muhénan, Maria i Marta. Un dia, ora Hesus tabata na e otro banda di riu Yordan, Maria i Marta a manda un mensahe urgente pa Hesus: ‘Lázaro ta hopi malu. Por fabor, bini lihé!’ Pero Hesus no a bai mesora. El a warda dos dia, i despues el a bisa su disipelnan: ‘Laga nos bai Betania. Lázaro ta drumí, i mi ta bai pa mi lant’é for di soño.’ E apòstelnan a bisa: ‘Si Lázaro ta drumí, lo e bira bon.’ E ora ei, Hesus a bisa nan bon kla: ‘Lázaro a muri.’

Ora Hesus a yega Betania, Lázaro tabatin kuater dia morto kaba. Hopi hende a bai konsolá Marta i Maria. Ora Marta a tende ku Hesus a yega, Marta a kore bai serka dje. Marta a bisa: “Señor, si bo tabata aki, mi ruman lo no a muri.” Hesus a bis’é: ‘Bo ruman lo lanta for di morto. Bo ta kere esei, Marta?’ Marta a kontestá: ‘Mi sa ku lo e lanta for di morto.’ Hesus a bisa Marta: “Ami ta resurekshon i bida.”

E ora ei, Marta a bai serka Maria i bis’é: ‘Hesus a yega.’ Maria a kore bai serka Hesus, i e hendenan a sigui Maria. Maria a kai abou na pia di Hesus, i e no por a stòp di yora. Maria a bisa: ‘Señor, si bo tabata serka nos, nos ruman ainda lo tabata na bida!’ Ora Hesus a mira ku Maria tabata yora, Hesus tambe a kuminsá yora. E hendenan a wak ku awa tabata basha for di Hesus su wowo, i nan a bisa: ‘E tabata stima Lázaro hopi.’ Pero algun hende a puntra: ‘Dikon e no a yuda su amigu?’ Kiko Hesus lo bai hasi awor?

Hesus a bai na e graf, ku tabata será ku un piedra grandi. El a bisa: ‘Kita e piedra.’ Marta a bisa: ‘Nos ruman tin kuater dia morto. Su kurpa mester ta hole kaba.’ Tòg, nan a kita e piedra. Hesus a hasi orashon: ‘Tata, danki ku Tata ta skucha mi. Mi sa ku semper Tata ta skucha mi. Pero, mi ta papia pa e hendenan akí por kere ku Tata a manda mi.’ Despues, Hesus a bisa na bos haltu: “Lázaro, bini pafó!” Algu inkreibel a pasa: Lázaro a kana bini pafó. Ainda e tabatin e pañanan rònt di su kurpa. Anto, Hesus a bisa: “Lòs e pañanan i lag’é bai.”

Hopi hende ku a mira esei, a kuminsá kere den Hesus. Pero, algun hende a bai konta e fariseonan loke a pasa. Desde e tempu ei, e fariseonan tabata kier a mata Lázaro i Hesus. Un di e 12 apòstelnan di Hesus, ku tabata yama Húdas Iskariòt, a bai serka e fariseonan den sekreto i puntra: ‘Kuantu sèn boso lo duna mi si mi yuda boso haña Hesus?’ Nan a bisa ku nan lo dun’é 30 moneda di plata. For di e dia ei, Húdas tabata buska un chèns pa entregá Hesus na e fariseonan.