Hesus A Kura Hende Riba Sabat

E fariseonan tabata odia Hesus i nan tabata buska motibu pa arest’é. Nan a bisa Hesus ku e no mester kura hende malu riba sabat. Riba un sabat, Hesus a mira un hòmber siegu ku tabata pidi limosna. Hesus a bisa su disipelnan: ‘Wak kon e poder di Dios ta yuda e hòmber akí.’ Hesus a skupi riba tera i traha lodo, i despues el a hunta e lodo riba wowo di e hòmber. Hesus a bis’é: ‘Bai i laba bo wowonan den e tanki di awa Siloam.’ Despues e hòmber a bai laba su wowonan, i pa promé biaha den su bida, e por a mira.

E hendenan a keda den shòk. Nan a bisa: ‘No ta e hòmber ku tabatin kustumber di sinta pidi limosna, òf ta un hende ku pars’é?’ E hòmber a bisa: ‘Ami ta e hòmber ku a nase siegu!’ E hendenan a puntr’é: ‘Dikon bo no ta siegu mas?’ Ora el a bisa nan kiko a pasa, nan a bai kuné serka e fariseonan.

E hòmber a bisa e fariseonan: ‘Hesus a hunta lodo riba mi wowonan, i el a bisa mi bai laba mi wowonan. Mi a hasié, i awor mi por mira.’ E fariseonan a bisa: ‘Si Hesus ta kura hende riba sabat, su poder no ta bini di Dios.’ Pero e otro hendenan a bisa: ‘Si su poder no ta bini di Dios, lo e no por kura hende ku ta malu.’

E fariseonan a yama e mayornan di e hòmber i puntr’é: ‘Kon bini boso yu por mira awor?’ E mayornan tabatin miedu, pasobra e fariseonan tabata bisa ku tur hende ku pone fe den Hesus lo ser saká for di snoa. E ora ei, nan a bisa: ‘Nos no sa. Puntra e mes.’ E fariseonan a hasi e hòmber mas pregunta, i el a kontestá: ‘Mi a bisa boso tur kos kaba. Dikon boso ta keda puntra?’ E fariseonan a rabia i nan a saka e hòmber for di snoa.

Hesus a bai buska e hòmber, i el a puntr’é: ‘Bo tin fe den e Mesías?’ E hòmber a bisa: ‘Si mi tabata sa ta ken e ta lo mi por a pone fe den dje.’ Hesus a bisa: ‘Ami ta e Mesías.’ Esei no tabata bondadoso di parti di Hesus? Hesus a kura e hòmber, i tambe el a yuda e hòmber pone fe den dje.