Cirugia Sin Sanger—Su Beneficionan Ta Haña Reconocimentu

NA 1996 e Colegio Real di Ciruhano di Inglatera a publicá un foyeto titulá Code of Practice for the Surgical Management of Jehovah’s Witnesses (Código di Práctica pa Cirugia Riba Testigonan di Jehova). Den e foyeto ei e ciruhanonan ta comentá: “E peligernan di transfusion di sanger ta hacié deseabel pa considerá e alternativanan ki ora cu ta posibel.”

AHA NEWS, publicá dor dje Asociacion di Hospital Mericano, tambe a informá tocante e motibunan pakico hende ta reconociendo e beneficionan di cirugia sin sanger. “Loke a cuminsá como un creencia religioso, ta birando preferencia médico i tecnologia avansá,” e revista semanal a remarcá. “Uso di remedi i cirugia sin sanger, motivá en parti p’e doctrinanan di Testigonan di Jehova, ta bai hopi mas ayá cu e necesidadnan di un sociedad spiritual, alcansando e kambernan di operacion den henter e nacion.”

E edicion di otoño 1997 di un suplemento dje revista Time a trata cu e rasonnan pakico hopi dokter ta promoviendo cirugia sin sanger. “Miedu di AIDS ta solamente un motibu,” e artículo a bisa. El a duna informacion specialmente riba e trabou hací na e Instituto pa Avance den Medicina i Cirugia Sin Sanger di New Jersey dje Hospital di Englewood na New Jersey.

Time a comentá: “E instituto ta e lider entre mas cu 50 hospital na Merca cu awor ta operá sin sanger. Sin usa nada-nada di sanger di donante, nan ta ofrecé un variedad amplio di procedura kirúrgico den cua normalmente lo a usa transfusion. Tambe nan ta empleá técnicanan cu ta reducí drásticamente, of ta casi eliminá, pérdida di sanger.”

Eficas i Safe

Den su introduccion, e artículo di Time a conta e experencia di Henry Jackson, cu a sufri di un sangramentu interno profuso i a perde asina 90 porciento di su sanger. Su nivel di hemoglobina a baha te na 1,7 gram pa deciliter, poniendo su bida na peliger. Nan a transportá Jackson pa e Hospital di Englewood for di un otro hospital na New Jersey, cu no kier a dun’é tratamentu sin transfusion di sanger.

N’e facilidad na Englewood, bou dje encargo di Dr. Aryeh Shander, nan a duna Jackson “fórmulanan di suplementonan cu gradonan haltu di heru i vitamina, plus ‘dósisnan industrial’ di un remedi cu ta aumentá sanger, eritropoyetin sintético, cu ta pone e tut’i wesu producí cel corá. Finalmente, nan a dun’é infuus pa stimulá e tiki circulacion cu a rest’é.”

Time a informá cu algun dia despues, “e promé hospital a yama pa puntra si Jackson a muri. Cu un satisfaccion masha bisto den su stem, Shander a bisa nan: ‘E no ta bibu so, sino tambe e ta bon-bon i cla pa sali for di hospital. Anto pronto e por bolbe na su rutina normal bek.’ ”

Den un entrevista na television dia 28 di november 1997, Dr. Edwin Deitch, director médico dje programa sin sanger n’e Hospital Universitario na Newark, New Jersey, a splica con nan a cuminsá investigá cirugia sin sanger: “Testigonan di Jehova . . . a pasa dor di hopi cos pa purba haña hende cu lo kier operá sin sanger. Algun dje resultadonan dje estudionan ei a mustra cu nan a sali mihó cu a ser sperá, [mihó cu] hende cu a haña sanger.”

Dr. Deitch a agregá: “Sanger por mengua e eficacia dje sistema di inmunidad i causa problemanan di infeccion despues di operacion; e por aumentá e rísico pa un hende su cancer bini bek. Pues, maske di un banda e tabata bon, di otro banda el a resultá malu.” Dr. Deitch ta concluí tocante cirugia sin sanger: “Ta evidente cu e pashent ta sali mas mihó, cu ménos complicacion i [e] ta costa ménos. P’esei, con cu bo mir’é, e tin bentaha.”

Pues, manera Time a bisa, “mas i mas pashent ta pidiendo pa e opcionnan mas safe i mas eficas cu transfusion.” E revista a informá tambe: “Segun algun cálculo, 25% dje transfusionnan na Merca ta innecesario. Tambe tin indicacion cu pashentnan no por tolerá nivelnan di hemoglobina mes haltu cu a yega di kere i cu foral hende yong tin un reserva di sanger den nan curpa. . . . [Shander] ta convencí cu abstencion di sanger ta un opcion factibel i preferibel pa mayoria pashent.”

Aunke ta existí un peliger grandi di contraé malesa via transfusion di sanger, tin otro peligernan mas. “Sanger di banco, despues cu nan fri’é i ward’é, no tin e capacidad pa transportá oxígeno manera sanger frescu,” Dr. Shander a splica. “Ta awor numa nos ta cuminsá comprendé ta kico nos ta haci ora nos ta duna transfusion.”

“E Norma di Oro”

“Por último,” Time a concluí, “bo ta haña e gastunan: cu rond di 500 dollar pa cada transfusion, plus tur gastu administrativo, e cuenta total ta yega entre mil miyon pa dos mil miyon dollar tur aña, mas cu suficiente motibu pa considerá alternativanan.” Awor ta parce cu e gastunan inmenso di transfusion di sanger ta un dje motibunan principal pakico cirugia sin sanger a bira asina popular.

Sharon Vernon, directora dje Centro di Medicina i Cirugia Sin Sanger n’e Hospital Caridad St. Vincent, Cleveland, Ohio, a bisa tocante e tratamentu di pashent sin uso di sanger: “E ta birando mas popular, pasobra dokternan ta reconociendo cu remedi sin sanger ta e norma di oro den un área cu ta economisando. Nos a experenciá cu asta companianan di seguro, cu normalmente no ta traha cu nos, ta manda hende pa nos, pasobra esei ta scapa nan cen.”

Ta bisto cu cirugia sin sanger ta hañando reconocimentu rápido den e comunidad médico, anto pa un cantidad di rason.

[Kuadro na página 27]

Algun Sentencia Recien di Corte

Na november i december di 1997, tabatin dos sentencia di corte significativo, pronunciá den e estado di Illinois, Merca. Den e promé, Mary Jones, un Testigo di Jehova, a haña 150.000 dollar na daño i perhuicio, pa motibu cu na 1993 nan a dun’é dos unidad di sanger apesar cu el a oponé claramente contra e forma di tratamentu aki. Esaki ta e suma mas grandi cu un Testigo a yega di haña pa e daño emocional causá como resultado di un transfusion di sanger indeseá.

Den e di dos caso ta trata dje Testigo Darlene Brown, kende, tempu e tabata na estado, a ser forsá pa tuma un transfusion pa su feto di 34 siman bieu. Dia 31 di december 1997, e Corte di Apelacion di Illinois a splica su sentencia bisando cu “un transfusion di sanger ta un procedura médico invasor cu ta afectá e integridad físico di un adulto competente.” E Corte di Apelacion a resumí su sentencia bisando cu “segun e ley di e Estado aki, . . . nos no por imponé un obligacion legal riba un muher na estado pa e bai di acuerdo cu un procedura médico invasor.”

Dia 9 di februari 1998, e Corte Superior di Tokio a revocá e sentencia dje corte di promé instancia, cu a dicta cu un dokter tabatin bon motibu pa duna Misae Takeda un transfusion di sanger durante un operacion na 1992. E Corte Superior a declará cu “mester respetá e derecho dje pashent pa scoge e tratamentu. Tabata ilegal pa duna un transfusion di sanger.” Misae Takeda a haña 550.000 yen (7.500 florin) na daño i perhuicio.