Tin Orashon Ku Dios No Ta Skucha?

E kontesta ku Beibel ta duna

Tin algun orashon ku Dios no ta skucha. Laga nos wak dos motibu.

1. E orashon ta bai kontra e boluntat di Dios

Dios no ta skucha orashon ku ta bai kontra su boluntat, òf kontra loke su Palabra, Beibel, ta rekerí di hende. (1 Huan 5:14) Por ehèmpel, Beibel ta kondená golosidat òf kudishi; i un di e kosnan ku ta promové e tendensianan ei ta wega di plaka. (1 Korintionan 6:9, 10) P’esei, Dios no ta skucha orashon di hende ku ta pidié pa gana number òf brièchi. E no ta manera un spiritu ku poder mágiko ku mesora ta kumpli ku tur loke bo pidié. Ta un alivio pa sa esei! Pues, Dios no ta skucha orashon di hende ku ta pidié kos ku mal intenshon.—Santiago 4:3.

2. E persona ku ta hasi orashon tin un aktitut rebelde

Dios no ta skucha orashon di hende ku pa malu ta bai kontra su leinan. Por ehèmpel, Dios a bisa hende ku a pretendé di sirbié pero ku a rebeldiá kontra dje: “Maske boso hasi hopi orashon, lo mi no skucha. Boso mannan ta yen di sanger.” (Isaías 1:15, Beibel Santu) Pero si nan a arepentí, aserká Dios i pidié pordon, e lo a skucha nan orashon.—Isaías 1:18.