Kon Testigu di Yehova ta trata esnan ku ya no ta Testigu di Yehova mas?

Komo Testigu di Yehova nos ta hasi nos bèst pa trata tur hende ku amor, rèspèt i amabilidat. Tin biaha un Testigu di Yehova ta baha man den e trabou di prediká i no ta bai reunion dje hopi ei mas, òf, no ta prediká ni no ta bai reunion mas. Si esei ta e kaso, nos ta tuma kontakto kuné, i ta bis’é ku nos ta stim’é i ta purba yud’é haña e deseo atrobe pa hala serka Dios.—Lúkas 15:4-7.

Den algun kaso, un persona lo por ser saká for di e kongregashon pasobra el a hasi algu hopi malu. (1 Korintionan 5:13) Pero promé ku esei sosodé, nos lo purba tur manera di yud’é pa e no ser saká for di e kongregashon pasobra nos ta stima nos ruman spiritual masha hopi. Anto si e ser saká for di e kongregashon mes, tòg nos lo keda mustr’é ku nos ta stim’é i respet’é pasobra esei ta loke Beibel ta animá nos pa hasi.—Marko 12:31; 1 Pedro 2:17.

Ki ora un hende ta ser saká for di e kongregashon?

Beibel ta bisa bon kla ku si un kristian kometé un piká serio i no ke kambia, mester sak’é for di e kongregashon.a (1 Korintionan 5:11-13) Kua piká ta asina grave ku e persona lo mester ser saká for di e kongregashon? Beibel ta menshoná, por ehèmpel: adulterio, buracheria, asesinato, abusu doméstiko i ladronisia.—1 Korintionan 6:9, 10; Galationan 5:19-21; 1 Timoteo 1:9, 10.

Pero, no ta outomátikamente un hende ku a kometé un piká grave ta ser saká for di e kongregashon. Promé, e ansianonanb di kongregashon ta purba di yud’é kambia su kondukta. (Romanonan 2:4) Nan ta trat’é ku amor i bondat pa purba di yega na su kurason. (Galationan 6:1) Esei por yud’é atmití su eror i motiv’é pa arepentí. (2 Timoteo 2:24-26) Pero si apesar di tur e esfuersonan ku e ansianonan ta hasi pa purba yud’é i tòg e ta sigui hasi loke Beibel ta kondená i no ta arepentí, lo e ser saká for di e kongregashon. Despues e ansianonan lo hasi un anunsio na e kongregashon ku e persona no ta un Testigu di Yehova mas.

Ku amor dos ansiano di kongregashon ta kompartí algun teksto di Beibel ku un yònkuman. Man di e ansiano ta riba skouder di e yònkuman miéntras ku e ta papia kuné. — Ansianonan ta hasi esfuerso pa purba di yega na kurason di e persona ku a peka na un manera kariñoso, suave i bondadoso

Kiko lo ta e resultado ora un persona ku no ke arepentí ser saká for di e kongregashon? Wèl, na promé lugá, e kongregashon ta manten’é nan mes na e normanan moral di Dios i ta protehá nan mes for di e mal influensia di e persona ei. (1 Korintionan 5:6; 15:33; 1 Pedro 1:16) I di dos, e persona por realisá ku el hasi fout i ku e mester hasi kambio.—Hebreonan 12:11.

Kon Testigu di Yehova ta trata esnan ku a ser saká for di e kongregashon?

Beibel ta bisa ku kristiannan mester “stòp di anda” ku hende ku a ser saká for di e kongregashon i ku nan “no mester ni sikiera kome ku un persona asina.” (1 Korintionan 5:11) Esei ta nifiká ku nos no ta pasa tempu ku un persona ku a ser saká for di e kongregashon. Pero, esei no ke men ku nos ta ignor’é kompletamente. Nos ta trat’é ku rèspèt. Ademas, e ta bonbiní na e reunionnan kristian, i esnan ku ta na e reunion por skohe pa kumind’é.c Tambe e por pidi e ansianonan pa yud’é bira un Testigu di Yehova atrobe.

Ku kariño un pareha kasá Testigu di Yehova ta kumindá un yùfrou ku a ser saká for di e kongregashon. — Esnan ku a ser saká for di e kongregashon ta bonbiní na nos reunionnan

Kiko si e persona ku a ser saká for di e kongregashon su kasá i su yunan ku ta biba na kas ainda ta Testigu di Yehova? Maske e no ta adorá Yehova mas huntu ku su famia, nan relashon di famia ta keda meskos. I komo ku nan ta biba den e mesun kas, su relashon ku su kasá i yunan no a kambia i nan tur mester sigui trata otro ku amor.

Un persona ku no ta forma parti mas di e kongregashon, por pidi e ansianonan pa bishit’é. I ku amor nan lo dun’é konseho di Beibel i anim’é pa arepentí i bolbe serka Dios. (Zakarías 1:3) Si e stòp di hasi loke ta malu i demostrá ku e ègt ke hasi loke Beibel ta bisa atrobe, e por bira un Testigu di Yehova bèk. I e rumannan di e kongregashon lo imitá e kristiannan di Korinto i lo ta “kla pa pordoná e persona ei i konsol’é” si el a arepentí i stòp di peka.—2 Korintionan 2:6-8.

Kon esnan ku tabata pafó di e kongregashon ta sinti awor ku nan ta Testigu di Yehova atrobe?

Wak kiko algun Testigu di Yehova ku tabata pafó di e kongregashon a bisa ora nan a bolbe bèk serka Dios.

“Ora m’a disidí di bini bèk den e kongregashon, m’a pensa ku e ansianonan lo ke pa mi bisa nan tur loke m’a hasi durante e tempu ku mi no tabata Testigu di Yehova. Pero nan no a hasi esei. Nan a djis bisa mi: ‘Enfoká riba loke bo ta bai hasi djawe padilanti.’ Esta un alivio m’a haña!”—Maria, Merka.

“E kongregashon a keda masha kontentu ora mi a bolbe bèk. M’a sinti mi bon. Mi a sinti ku mi rumannan spiritual i Yehova a pordoná mi, i esei a yuda mi pa mi no sinti malu mas di loke a pasa. E ansianonan semper tabata kla pa yuda mi fortalesé mi amistat ku Yehova. Nan a konsolá mi i yuda mi mira ku Yehova no a stòp di stima mi i ku mi ta balioso.”—Malkom, Sierra Leone.

“Mi ta kontentu ku Yehova ta stima su pueblo asina hopi ku e ta hasi sigur ku su organisashon ta keda moralmente limpi. Maske tin hende ta haña ku ta kruel pa saka hende for di e kongregashon, esaki ta algu nesesario i na mes momento amoroso. Mi ta masha gradisidu ku nos Tata selestial ta un Dios amoroso i ku ta pordoná.”—Sandi, Merka.

Komentario di algun eksperto riba tereno di lei ku no ta Testigu di Yehova

Ban wak kiko algun eksperto riba tereno di lei a bisa di e echo ku Testigunan di Yehova ta saka hende ku no ta arepentí for di nan kongregashon.

“Ta lógiko ku un grupo religioso ku ta sigui prinsipio di Beibel i ku ta hasi esfuerso pa pone nan na praktiká tin derecho pa [ekspulsá un hende ku a kometé un piká]. Esaki ta algu rasonabel i importante pasobra si un hende no ke sigui prinsipio di Beibel, e no por forma parti mas di e grupo religioso ei. Ademas, nan por tin un mal influensia riba esnan ku si ke sigui e prinsipionan ei.”—Korte Supremo di Inglatera i Wales, 7 di yüni 2019.
“E kortenan na Europa i di otro lugá a dikta ku e desishon [pa saka un hende for di kongregashon] . . . ta un derecho kompletamente legal i un manera legítimo ku Testigu di Yehova tin pa ehersé nan libertat di religion . . . i esaki no ta kai bou outoridat di korte.”—Profesor Poulo Pinto de Albuquerque, eks-hues di e Korte Europeo pa Derecho Humano.

a Den pasado nos tabata usa e ekspreshon ekspulsá pa referí na un persona ku a peka i ku no ke arepentí. Pero awor nos ta usa e ekspreshon bíbliko i nos ta bisa ku e persona a ser saká for di kongregashon.

b Ansianonan ta hende hòmber Testigu di Yehova. Nan ta maduro den sentido spiritual. Nan ta usa Beibel pa siña hende i ta hasi bishita di pastoreo pa yuda i animá e pueblo di Yehova. Nan no ta haña un salario pa nan trabou di ansiano.—1 Pedro 5:1-3.

c Den kasonan ekstremo, un hende ku a bandoná e kongregashon por perhudiká e kongregashon òf purba di influensiá e miembronan pa hasi kos robes. Ora esei ta e kaso, nos ta sigui loke Beibel ta bisa, esta, pa “ni kumind’é.”—2 Huan 9-11.