Guera na Israel i e Paisnan ei Banda​—Kiko Beibel Ta Bisa?

Hende rònt mundu ta preokupá tokante di e situashon ku tin awor entre Merka, Israel i Iran. Hende ta puntra nan mes: E situashon akí lo bira mas pió i hiba na un guera ku lo afektá mas pais? Gobièrnu por hasi algu pa stòp e situashon di bira mas pió i logra trese pas atrobe?

Algun hende ku sa tokante di profesia di Beibel kisas ta puntra nan mes si e situashon ku tin awor entre Merka, Israel i Iran ta e komienso di Armagedon, e guera ku e buki di Revelashon ta menshoná.

Kiko Beibel ta bisa?

Gobièrnu lo logra kaba ku guera na Israel i e paisnan ei banda?

Beibel ta bisa: “No pone bo konfiansa den hende ku tin poder ni den niun otro hende, pasobra nan no por salba bo.”—Salmo 146:3.

Nos no sa si e gobièrnunan lo logra mehorá e situashon den e área rònt di Israel. Loke sí nos sa ta ku Beibel ta mustra bon kla ku ningun lider polítiko, gobièrnu ni grupo di hende no por kaba ku guera i sòru pa semper tin pas. Ta Dios so por “kaba ku guera tur kaminda riba tera.”—Salmo 46:9.

• Pa haña sa mas, lesa e revista E Toren di Vigilansia ku tin e tema “Guera Lo Kaba—Kon?”

E guera ku tin awor na Israel i e paisnan ei banda ta kumplimentu di profesia?

Beibel ta bisa: “Boso lo tende di guera den vários lugá. . . . Nashon lo lanta kontra nashon i reino kontra reino.”—Mateo 24:6, 7.

E situashon aktual ku tin entre Merka, Israel i Iran ta un di e susesonan ku ta mustra ku nos ta bibando den e “konklushon di e era akí” ku Beibel ta yama tambe “e último dianan.” (Mateo 24:3; 2 Timoteo 3:1) Pues, tur e gueranan ku nos ta mira awe ta yuda nos komprondé den ki tempu nos ta bibando i ku pronto Dios lo kaba ku guera i tur otro problema ku ta pone hende sufri.

• Pa haña sa mas, lesa e artíkulo “Kiko Ta e Señal di ‘e Último Dianan,’ òf di ‘e Tempu di e Fin’?”

E Guera di Armagedon lo kuminsá na Israel i e paisnan ei banda?

Beibel ta bisa: “Nan a reuní e reinan huntu na e lugá ku na hebreo yama Armagedon.”—Revelashon 16:16.

E guera di Armagedon lo no kuminsá na Israel i e paisnan ei banda. Ademas, e no ta un guera entre e gobièrnunan riba tera. E ta un guera entre e gobièrnunan riba tera i Dios, i lo e afektá henter mundu.

• Pa haña sa mas, lesa e artíkulo “Kiko e Guera di Armagedon Ta?”

Kiko por yuda nos keda kalmu ora hopi kos ku ta kousa ansiedat ta sosodé?

Beibel ta bisa: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.”—Filipensenan 4:6.

Yehovaa Dios ke pa nos hasi orashon na dje. Komo ku Dios ta interesá den nos, e lo skucha nos orashonnan i yuda nos trata ku ansiedat. (1 Pedro 5:7) Un manera ku Dios ta yuda nos trata ku ansiedat ta dor di yuda nos komprondé dikon tin guera i kon e ta bai kaba ku nan i ku tur loke ta kousa doló i sufrimentu.—Revelashon 21:3, 4.

• Pa haña sa di mas manera ku Dios ta yuda nos, lesa e artíkulo “¿Puedo encontrar consuelo en la Biblia?.”