Algun Sientífiko A Move Man di e Oloshi di Huisio Final Dilanti—Kiko Beibel Ta Bisa?

Dia 24 di yanüari 2023, algun sientífiko a move man di e Oloshi di Huisio Finala (Doomsday Clock) un tiki mas serka di meianochi. Supuestamente, si e oloshi yega meianochi, esei ta nifiká fin di mundu.

“E ‘Oloshi di Huisio Final’ ta indiká ku humanidat ta bai enfrentá katástrofe. Djamars último, e oloshi ei tabata mas serka di meianochi ku nunka pa motibu di e guera na Ukrania, e riesgo di un atake nuklear i e krísis di klima.”—AFP International Text Wire.
“Algun sientífiko a laga sa riba djamars ku a move man di e ‘Oloshi di Huisio Final’ na 90 sekònde promé ku meianochi. Nunka promé humanidat tabata asina serka di Armagedon.”—ABC News.
“Un grupo di sientífiko internashonal a spièrta mundu ku mas ku nunka humanidat su eksistensia ta na peliger.”—The Guardian.

Di bèrdat fin di humanidat i di nos planeta ta serka? Nos mester tin miedu di loke ta bai pasa den futuro? Kiko Beibel ta bisa?

Kiko ta bai pasa den futuro?

Segun Beibel, “tera lo eksistí pa semper,” i lo tin hende “ku lo biba riba dje pa semper.” (Eklesiástes 1:4; Salmo 37:29) Pues, hende lo no destruí tera ni nan lo no kousa asina tantu daño na nos planeta ku ta bira imposibel pa hende keda biba riba dje.

Pero Beibel ta papia di un fin. Por ehèmpel, Beibel ta bisa ku “mundu ta pasa bai.”—1 Huan 2:17.

Pa haña sa kiko Beibel ke men ora e ta papia di fin di mundu, lesa e artíkulo na spañó: “Fin di Mundu Ta Serka? Kiko Ta Apokalípsis?”
Pa haña sa mas di loke Beibel ta bisa tokante e susesonan ku lo bai tuma lugá pronto, lesa e artíkulo: “Ki Dia Mundu Ta Kaba?”

Kon bo por keda positivo?

Beibel por yuda nos keda positivo apesar di e problemanan ku ta tuma lugá rònt mundu. Kon e por yuda nos?

Beibel ta duna nos bon konseho. (2 Timoteo 3:16, 17) Pa algun ehèmpel di esei, lesa e artíkulo na spañó: “Kiko Por Yuda Nos Trata ku Preokupashon?” Lo bo mira kon Beibel por yuda nos keda positivo apesar di e difikultatnan ku nos ta pasa aden.
Beibel ta duna nos un speransa sigur pa futuro. (Romanonan 15:4) Beibel ta splika presis loke nos por ferwagt aworakí i den futuro. Esei ta yuda nos keda trankil i sin miedu apesar di loke ta pasando den mundu.

Pa bo por benefisiá mas di Beibel, nos ta invitá bo pa wak kon un kurso di Beibel grátis ta bai. Bo por hasi esei awe mes!

a “E Oloshi di Huisio Final ta un oloshi simbóliko ku hende a traha pa spièrta humanidat. E ta mustra kon serka nos ta di destruí nos planeta ku teknologia peligroso ku nos mes a traha. E ta algu ku ta kòrda nos riba e problemanan ku nos mester solushoná si nos ke sigui biba riba e planeta akí.”—Bulletin of the Atomic Scientists.