Mucha i Telefòn Selular—Parti 2: Siña Bo Yunan Kon pa Usa Selular na un Manera Sabí

Un selular ta manera un mashin di zag—e por ta hopi útil òf e por ta peligroso, dependé kon bo us’é. Kon bo por yuda bo yunan tuma bon desishon ora nan ta usa e aparato poderoso akí? Por ehèmpel, kuantu tempu bo mester laga nan pasa riba nan selular?a

• Loke ta bon pa bo sa

• Loke bo por hasi

• “Un mayor amoroso ta pone regla”

Loke ta bon pa bo sa

• E selular por pone esun ku ta us’é den peliger. Manera nos a mira den e artíkulo “Mucha i Telefòn Selular—Parti 1: Mi Mester Duna Mi Yu un Selular?,” un selular ta hasié posibel pa bo yu mira tur loke tin riba Internet—tantu e bon komo e malu.

  “Ta fásil pa lubidá ku un selular por pone nos yunan den kontakto ku tur sorto di hende i idea peligroso.”—Brenda.

• Mucha mester di guia. Hóbennan ta usando teknologia henter nan bida, pero ta awor hopi adulto a kuminsá usa teknologia. Sinembargo, esei no ke men ku mayornan no sa nada di teknologia i ku nan yunan sa mihó ku nan ki ora i kon pa usa nan selular.

  Kisas ta bèrdat ku bo yunan por usa nan selular mihó ku bo, pero esei no ke men ku nan sa kon pa us’é na un manera sabí. Asta mucha ku sa hopi di teknologia mester pa nan mayornan siña nan kon pa usa selular na un manera responsabel.

  “Si bo duna bo yu un selular, sin siñ’é kon pa us’é, ta meskos ku si bo dun’é un yabi di outo, pone sinta dilanti stür, start e outo, i bis’é ‘kore ku kuidou,’ pero bo no a siñ’é promé kon pa kore.”—Seth.

Loke bo por hasi

• Siña kiko bo yu su selular por hasi. Siña kon pa traha ku e programanan i settings riba bo yu su selular ku por yud’é usa su selular na un manera responsabel. Por ehèmpel:

  Ki setting òf programa tin riba bo yu su selular ku ta permití bo pone un límite na e kantidat di tempu ku bo yu por pasa riba e selular i tambe kontrolá e tipo di website ku e ta bishitá?

  Bo tabata sa ku e programanan ku tin riba bo yu su selular pa blòkiá kos inapropiá no semper ta funshoná?

  Mas mihó bo konosé bo yu su selular, mas prepará lo bo ta pa yuda bo yu us’é na un manera responsabel.

  Prinsipio di Beibel: “Un hòmber di konosementu ta oumentá poder.”—Proverbionan 24:5.

• Pone límite. Determiná for di trempan kiko lo bo permití i kiko lo bo no permití. Por ehèmpel:

  Lo bo permití bo yunan usa nan selular na mesa ora di kome òf pa usa nan selular ora boso ta bishitando famia òf amigu?

  Lo bo laga bo yunan drumi ku nan selular den kamber anochi?

  Kua app lo bo permití bo yunan usa?

  Kuantu tempu lo bo laga nan pasa riba nan selular?

  Lo bo pone un límite na e kantidat di tempu ku nan mag di ta riba nan selular tur dia?

  Bo mester laga bo yunan sa kiko bo reglanan ta, i bo mester ta kla pa korigí òf disipliná bo yunan ora nan kibra e reglanan ei.

  Prinsipio di Beibel: “No keda sin duna un mucha disiplina.”—Proverbionan 23:13.

• Kontrolá bo yu su selular. Bo mester sa e password di bo yu su selular, i bo mester kontrolá su selular de bes en kuando. Esei ta enserá ku bo mester kontrolá e mensahenan ku e ta manda i risibí, bo mester kontrolá kon e ta usa tur app riba su selular, bo mester kontrolá su potrètnan i e websitenan ku e ta bishitá.

  “Nos a bisa nos yu muhé ku de bes en kuando nos lo kontrolá su selular, pero nos lo no bis’é adelantá ki dia nos lo hasi esei. Nos a bis’é ku si nos ripará ku e ta usa su selular na un manera ku no ta responsabel, nos lo limitá e kantidat di tempu ku e mag di pasa riba su selular.”—Lorraine.

  Mayornan tin derecho di sa kon nan yunan ta usa nan selular.

  Prinsipio di Beibel: “Asta un mucha ta konosí pa su echonan, si su kondukta ta puru i rekto.”—Proverbionan 20:11.

• Siña bo yu normanan moral. Inkulká den bo yu e deseo pa hasi loke ta bon. Dikon esei ta importante? Pasobra si un mucha ègt ke skonde algu for di su mayornan lo e haña un manera pa hasi esei sin importá kuantu esfuerso su mayornan ta hasi pa kontrolá su selular.b

  P’esei yuda bo yu kultivá bon kualidat. Siñ’é pa ta onesto, pa e tin dominio propio i pa e para responsabel pa loke e hasi. Un mucha ku tene su mes na normanan moral ta mas inkliná pa usa su selular na e manera korekto.

  Prinsipio di Beibel: “Hende madurá . . . [ta] usa nan kapasidat di komprondé . . . pa distinguí loke ta bon for di loke ta malu.”—Hebreonan 5:14.