Kiko Ta Nifiká ‘Stima Bo Enemigunan’?
Kontesta ku Beibel ta duna
Den e famoso Sermon riba Seru, Hesus a bisa: “Stima boso enemigunan.” (Mateo 5:44; Lukas 6:27, 35) Hesus su palabranan ta nifiká ku nos mester mustra amor na hende ku ta odia nos òf ku ta trata nos na un manera inhustu.
Hesus a stima su enemigunan. Nos sa esei pasobra el a pordoná hende ku a maltrat’é. (Lukas 23:33, 34) Hesus su siñansanan tokante stima nos enemigunan ta kuadra ku loke Skritura Hebreo, òf loke hende ta yama Tèstamènt Bieu, ta bisa.—Éksodo 23:4, 5; Proverbionan 24:17; 25:21.
“Sigui stima boso enemigunan i hasi orashon pa esnan ku ta persiguí boso.”—Mateo 5:43, 44.
Den e artíkulo akí nos lo kontestá e siguiente preguntanan:
Dikon bo mester stima bo enemigunan?
Dios ta pone ehèmpel. Dios “ta bondadoso asta ku hende malagradesí i malbado.” (Lukas 6:35) E “ta laga su solo sali riba mal hende.”—Mateo 5:45.
Amor por motivá un enemigu pa hasi kambio. Beibel ta animá nos pa trata un enemigu bon. Ora nos hasi esei, nos “ta montoná karbon sendí riba su kabes.” (Proverbionan 25:22) E ekspreshon akí ta referí na e proseso pa dirti metal presioso. Di mes manera, ora nos mustra bondat na un hende ku ta odia nos, nos por kalma su rabia i saka su bon kualidatnan na kla.
Kon bo por mustra amor na bo enemigunan?
“Hasi bon na esnan ku ta odia boso.” (Lukas 6:27) Beibel ta bisa: “Si bo enemigu tin hamber, dun’é di kome; si e tin set, dun’é algu di bebe.” (Romanonan 12:20) Tin vários manera ku bo por mustra amor na bo enemigunan. Por ehèmpel, bo por apliká e Regla di Oro ku ta bisa: “Manera boso ke pa hende hasi ku boso, boso mester hasi meskos ku nan.”—Lukas 6:31.
“Bendishoná esnan ku ta maldishoná boso.” (Lukas 6:28) Nos ta bendishoná nos enemigunan ora nos papia na un manera amabel i ku rèspèt ku nan, asta si nan papia malu ku nos. Beibel ta bisa: “No paga . . . insulto ku insulto.” En bes di esei, nos mester “bendishoná otro hende.” (1 Pedro 3:9) E konseho akí por yuda nos vense odio.
“Hasi orashon pa esnan ku ta insultá boso.” (Lukas 6:28) Si un persona insultá bo, no paga “malu ku malu.” (Romanonan 12:17) Mas bien, pidi Dios pa e pordoná e persona. (Lukas 23:34; Echonan 7:59, 60) Na lugá di tuma vengansa, laga Dios trata ku e persona segun Su normanan perfekto di hustisia.—Levítiko 19:18; Romanonan 12:19.
“Sigui stima boso enemigunan, hasi bon na esnan ku ta odia boso, bendishoná esnan ku ta maldishoná boso, hasi orashon pa esnan ku ta insultá boso.”—Lukas 6:27, 28.
Tene ‘pasenshi i sea bondadoso.’ (1 Korintionan 13:4) Ora Apòstel Pablo a splika loke amor ta nifiká, el a usa e mesun palabra griego (agape) ku nos ta haña na Mateo 5:44 i Lukas 6:27, 35. Nos ta mustra e amor akí asta na nos enemigunan ora nos tene pasenshi, ta bondadoso, i no ta yalurs, arogante òf brutu.
“Amor tin pasenshi i ta bondadoso. Amor no ta yalurs, e no ta broma, e no ta halsa su mes, e no ta komport’é indesentemente, e no ta buska su mes interes, e no ta rabia lihé. E no ta keda kòrda e malu ku hende a hasié. E no ta alegrá ku inhustisia, ma ta alegrá ku loke ta bèrdat. E ta wanta tur kos, kere tur kos, spera tur kos, soportá tur kos. Amor no ta kaba nunka.”—1 Korintionan 13:4-8.
Bo mester bringa den guera kontra bo enemigunan?
Nò, pasobra Hesus a siña su siguidónan ku nan no mester bringa kontra nan enemigunan. Por ehèmpel, ora el a spièrta su siguidónan ku Herúsalèm lo ser ataká, e no a bisa nan pa keda einan i bringa, mas bien nan mester a hui. (Lukas 21:20, 21) Ademas, Hesus a bisa Apòstel Pedro: “Hinka bo spada bèk na su lugá, pasobra ken ku usa spada lo muri pa medio di spada.” (Mateo 26:52) Beibel i historia ta mustra ku e siguidónan di Hesus den promé siglo no a bringa den guera kontra nan enemigunan.a—2 Timoteo 2:24.
Idea robes tokante stima bo enemigunan
Idea robes: Lei di Dios a eksigí pa e israelitanan odia nan enemigunan.
Echo: Lei no tabatin e mandamentu ei. Mas bien, Lei tabata eksigí pa e israelitanan stima nan próhimo. (Levítiko 19:18) E palabra “próhimo” ta nifiká otro hende, pero algun hudiu tabata bisa ku esei a inkluí otro hudiu so, i nan tabata kere ku hende ku no tabata hudiu tabata enemigu ku mester a ser odiá. (Mateo 5:43, 44) Hesus a korigí nan manera robes di pensa ora el a konta e ilustrashon di e bon samaritano.—Lukas 10:29-37.
Idea robes: E persona ku stima su enemigu en realidat ta di akuerdo ku e kosnan malu ku su enemigu ta hasi.
Echo: Beibel ta mustra ku bo por stima un persona sin aprobá e kosnan malu ku e ta hasi. Por ehèmpel, Hesus tabata kontra violensia pero el a hasi orashon pa e hendenan ku a mat’é. (Lukas 23:34) Ademas, el a odia maldat i piká, pero el a duna su bida pa e pekadónan.—Huan 3:16; Romanonan 6:23.
a E buki The Rise of Christianity di E. W. Barnes ta bisa: “Ora nos wak tur informashon disponibel bon, esei ta demostrá ku te den tempu di Marko Ourelio [emperador romano di aña 161 despues di Kristu te ku aña 180 despues di Kristu], niun kristian no a bira sòldá ni niun sòldá ku a bira kristian no a keda den ehérsito.”