Dikon Ta Importante pa Komprondé Prinsipio di Beibel?

1-2. (a) Ki tempu a skirbi Beibel? (b) Dikon te ainda Beibel ta konta den nos tempu?

BEIBEL ta un buki hopi bieu. Su promé bukinan a ser skirbí kasi 3.500 aña pasá, i e último buki kasi 2.000 aña pasá. Apesar di esei, e konsehonan ku tin den “e palabra di Dios” ta di gran benefisio pa kada un di nos awe. (Heb. 4:12; 2 Tim. 3:​16, 17) P’esei, miónes di hende awe ta sigui e konsehonan ku nan ta haña den Beibel; e ta yuda nan tuma bon desishon i yuda nan ta mas felis.

² Pero kon bin un buki asina bieu te ainda ta konta den nos tempu? Tin dos motibu. Di promé, tur e palabranan ku tin den Beibel ta bini for di e “Dios bibu,” nos Kreador, kende ta e persona mas sabí ku ta eksistí. (1 Tim. 4:10; Rom. 16:​26, 27) I di dos, e prinsipionan, esta, e lèsnan ku tin den Beibel, no ta kambia segun ku tempu ta pasa. P’esei, e konsehonan ku tin den Beibel por yuda hende den nos tempu, meskos ku el a yuda hende den pasado.

3. Ki preguntanan nos lo trata den e artíkulo akí?

³ Pero den tur esei, kiko ta prinsipio di Beibel? Dikon nan ta asina importante pa nos awe? Kon nos por haña prinsipionan ora nos ta lesa Beibel? Den e artíkulo akí nos lo trata e preguntanan ei. Nos lo wak tambe kon Hesus a yuda hende komprondé e importansia di prinsipionan.

KIKO TA PRINSIPIO DI BEIBEL?

4. Kiko ta prinsipio di Beibel?

⁴ Prinsipionan di Beibel ta bèrdatnan básiko ku ta yuda nos komprondé e manera ku Yehova ta mira kosnan. Anto tur Yehova su leinan ta basá riba prinsipionan. Tin biaha un prinsipio por asta sirbi komo lei. (Mat. 22:37) Pero semper prinsipio ta superior ku lei. Algun lei den Beibel ta pa un situashon òf tempu spesífiko. Pero e prinsipio, esta, e motibu, tras di e leinan ei nunka ta kambia. (Sal. 119:111) P’esei por apliká un prinsipio den vários sirkunstansia. Pues, ku tempu sierto leinan no ta bálido mas, pero prinsipio semper lo keda bálido.—Isa. 40:8.

5. Usa un ehèmpel pa splika e diferensia entre lei i prinsipio. (Wak e plachinan.)

⁵ Pa komprondé e diferensia entre lei i prinsipio mihó, imaginá lo siguiente. Un mama ta kushiná i su yu chikitu ta bini na e stof. Mesora e mama ta bis’é pa no mishi ku e stof. E mama a dun’é un òrdu òf lei. Pero e prinsipio, òf motibu, tras di e lei ei ta: No mishi ku kos kayente, pasobra bo ta kima. E prinsipio ei no ta konta pa stof so. E ta konta tambe pa heru di strika òf otro kos den kas ku ta bira kayente. I e no ta konta den kas so, pero pafó di kas tambe. Ta klaru ku segun ku e yu ta bira grandi lo e usa stof. Pero kòrdando e prinsipio ku kos kayente ta kim’é, e ta tene kuidou kon e ta usa stof. Pues, lei por kambia, pero prinsipio sí nò.

DIKON PRINSIPIONAN DI BEIBEL TA IMPORTANTE PA NOS?

6. (a) Kiko Yehova a duna nos den Beibel? (b) Kon Yehova ta mustra ku e ta konfia nos?

⁶ Komo ku Yehova stima nos masha hopi mes, el a duna nos lei pa evitá ku nos ta hasi nos mes òf otro hende daño. (Sant. 2:11) Tambe e ta yuda nos komprondé su prinsipionan, esta, su manera di pensa, i e motibu dikon el a duna e leinan ei. Yehova no a duna nos lei pa delaster un kos. Pero den Beibel e ta duna nos konseho sabí ku ta yuda nos tuma bon desishon i hasi loke ta korekto asta ora ku no tin lei spesífiko. E echo ku Yehova a duna nos prinsipio ta mustra ku e ta konfia nos i ta duna nos e libertat pa tuma desishon ku ta mustra ku nos ta stim’é i ke obedes’é.—Gal. 5:13.

7. Duna un ehèmpel ku ta mustra e importansia di prinsipionan di Beibel. (Wak e plachi.)

⁷ Pa nos komprondé kon prinsipionan di Beibel ta yuda nos, ban wak e siguiente ilustrashon. Riba kaminda un shofùr ta hañ’é ku vários bòrchi di tráfiko. Algun di e bòrchinan akí ta lag’é sa kiko ta e leinan di tráfiko. Por ehèmpel, nan ta bis’é kiko ta e velosidat máksimo ku e por kore i kua ta e hanchinan ku e ta prohibí pa drenta. Ora un shofùr kibra un di e leinan ei di tráfiko e por haña but. Pero, tin algun bòrchi ku no ta indiká lei di tráfiko pero ku ta spièrta un shofùr di e peligernan ku e por topa riba kaminda. Por ehèmpel, tin ta mustra ku e kaminda por slep òf tin ta bisa ku bestia por subi riba kaminda. Ora un bon shofùr mira e bòrchinan ei, aunke ku no tin un lei mará na nan, e ta wak bon kon e ta kore pa evitá un aksidente. Anto, si áwaseru ta kai e ta baha su spit, pasobra e sa ku esei por ta peligroso. Na mes manera, den Beibel nos ta haña lei ku ta bisa nos kiko nos por i no por hasi. Pero meskos ku tin bòrchinan di tráfiko ku ta spièrta pa peliger, Beibel su prinsipionan tambe ta spièrta nos. E prinsipionan akí no ta lei, pero ora nos sigui nan, e ta yuda nos evitá pensamentu i akshon ku por pone nos kibra Yehova su leinan. P’esei anto ta masha importante pa apliká prinsipio di Beibel den nos bida.

8. Ora nos lesa Beibel, kiko nos tin ku siña hasi? (Romanonan 12:​1, 2)

⁸ Yehova no a duna nos un regla pa tur kos. Dikon nò? Pasobra si lo el a hasi esei, nunka nos lo a siña komprondé su manera di pensa. Ora nos lesa Beibel, nos tin ku siña buska i saka lès for di e relatonan. Pa nos por hasi esei, nos mester puntra nos mes dikon Yehova a laga skirbi e lèsnan ei den Beibel i kon nos por apliká nan den nos bida. Hasiendo esei, nos ta siña kon pa usa nos “kapasidat di pensa” pa sirbi Yehova. I nos lo mira pa nos mes ‘ku Dios su boluntat ta bon, agradabel i perfekto.’—Lesa Romanonan 12:​1, 2.a

9. Ki otro benefisio tin ora nos usa prinsipio di Beibel den nos bida? (Hebreonan 5:​13, 14)

⁹ Ora nos usa prinsipio di Beibel den nos bida, esei ta yuda nos bira kristian madurá. Ora nos biba segun prinsipionan di Beibel, nos amistat ku Yehova ta bira mas fuerte. (Lesa Hebreonan 5:​13, 14.) Mucha chikitu mester di un lista largu di regla pa nan sa kon nan mester komportá nan mes den diferente situashon. I kisas pasobra nan tin miedu di haña straf, nan ta obedesé e reglanan akí. Pero Yehova no ta trata nos manera mucha chikitu, sino komo hende madurá. E ta konfia nos i ta duna nos e libertat pa tuma desishon ku ta na armonia ku su prinsipionan. I ora nos hasi esei, nos lo hasi su kurason kontentu.—Sal. 147:11; Pro. 23:​15, 26; 27:11.

KON NOS POR HAÑA PRINSIPIONAN ORA NOS LESA BEIBEL?

10. Kon nos por haña prinsipio di Beibel?

¹⁰ Ora nos lesa Beibel i saka lès for di dje, nos por haña prinsipio ku por yuda nos komprondé kiko Yehova ta pensa tokante sierto asuntu. Un otro manera pa haña prinsipio di Beibel ta ora nos pensa dikon Yehova a bin ku un sierto lei. Mas nos purba di komprondé e motibu tras di un lei, mas nos por komprondé Yehova su manera di pensa. Pero pa nos por logra esei, nos mester pidi Yehova pa yudansa den orashon. Ademas, nos mester tuma tempu pa pensa bon riba loke nos a lesa. (Pro. 2:​10-12) Nos por puntra nos mes: ‘Dikon Dios a pone e lei akí? Si Yehova no gusta e komportashon akí, kon lo e sinti tokante un komportashon similar? Ki lès mi por saka for di e relato akí, i kon mi por aplik’é den mi bida?’ Unabes nos saka e lèsnan ku tin den un relato di Beibel i nos komprondé dikon Yehova a pone un sierto lei, nos por tuma bon desishon i hasi Yehova kontentu.

11. Kon Hesus a siña nos haña e prinsipio, òf motibu, tras di un lei? (Wak e plachi.)

¹¹ Den Hesus su Diskurso Riba Seru, el a siña nos kon nos por haña prinsipio di Beibel. Laga nos trata tres ehèmpel. Den kada un di nan, Hesus a kuminsá na menshoná e lei. Despues, el a mustra e prinsipio, òf motibu, tras di e lei ei. Ora nos meditá riba e prinsipionan ei, nan lo yuda nos tuma bon desishon awe.

12. Kua ta un prinsipio ku nos por saka for di e lei na Mateo 5:21 i 22? (Wak e plachi.)

¹² Lesa Mateo 5:​21, 22. “No mata.” Kua prinsipio tin tras di e lei ei? Un di nan ta ku Yehova no ke pa nos odia otro hende. Esei ta enserá ku nos no ta trata nan malu, papia malu ku nan i ni sikiera pensa malu di nan. Hesus a mustra esei bon kla. El a mustra ku asta si un hende keda sin mata un persona, tòg e por keda sin kumpli ku e prinsipio tras di e lei ei ora e keda rabiá ku un persona òf trat’é malu. Anto Yehova no ta keda niun tiki kontentu ku tipo di aktitut asina. Dikon? Pasobra un aktitut asina por hiba na matamentu.—1 Huan 3:15.

13. Kon nos por apliká e prinsipio ku tin na Mateo 5:21 i 22? (Wak e plachi.)

¹³ Kon nos por apliká e prinsipio ku tin na Mateo 5:21 i 22 awe? Nos mester evitá di karga renkor òf keda rabiá ku un persona, asta si e persona ei a trata nos malu. (Lev. 19:18; Yòb 36:13) Dikon? Pasobra e sintimentunan ei por pone nos bisa òf hasi kos ku no ta bon. (Pro. 10:12) Por ehèmpel, nan por pone nos hasi redu òf gaña riba un persona pa asina daña su reputashon. (Pro. 20:19; 25:23) Ora Hesus a splika e prinsipio akí, no tabatin telefòn, kòmpiuter ni Internet. Pero e konseho ku Hesus a duna nos ta spièrta nos pa no usa e kosnan ei pa papia malu di otro hende. Meskos ku nos nunka lo mata un persona, nos mester hasi sigur di nunka daña un persona su reputashon.

14. Kua prinsipio tin tras di e lei na Mateo 5:27 i 28? (Wak e plachi.)

¹⁴ Lesa Mateo 5:​27, 28. “No kometé adulterio.” Kua prinsipio tin tras di e lei ei? Ku Yehova ta odia tur kondukta inmoral, pero tambe pensamentu ku por hiba na inmoralidat seksual. Hesus a splika ku si un hòmber keda wak un muhé ku no ta su kasá ku pashon, ya kaba el a kometé un piká. Pues, nos mester hasi tur nos esfuerso pa evitá kualke pensamentu inmoral. (Mat. 5:​29, 30) E prinsipio akí ta konta pa rumannan soltero tambe.

15. Kon nos por apliká e prinsipio ku tin na Mateo 5:27 i 28? (Wak e plachi.)

¹⁵ Kon nos por apliká e prinsipio ku tin na Mateo 5:27 i 28? Nos mester evitá di pensa tokante kosnan inmoral. (2 Sám. 11:​2-4; Yòb 31:​1-3) Pues, nos mester keda leu for di tur forma di pornografia, asta esnan ku hende ta pensa ku no ta dje malu ei. Un kristian madurá lo no bisa ku, basta e no hasi nada malu, no tin nada robes den djis wak e kosnan ei. Den tempu di Hesus, no tabatin niun aparato elektróniko ni pelíkula ni potrèt. Pero e prinsipio ku Hesus a duna ta siña nos kon Yehova ta pensa tokante potrèt i vidio ku ta inmoral. Esaki ta yuda nos komprondé ku Yehova lo no ta kontentu, si nos manda potrèt òf vidio inmoral, ni si nos papia òf manda mensahe inmoral riba nos telefòn. Tampoko lo e no keda kontentu si nos hunga wega inmoral online. Ademas, e prinsipio akí ta yuda esnan ku ta kasá pa keda leal na nan kasá. (Mal. 2:15) Pues, ora tantu ruman kasá i ruman soltero apliká e prinsipio akí, e ta yuda nan pa keda leu for di kosnan inmoral, ku por pone nan kometé inmoralidat seksual.—Pro. 5:​3-14.

16. Kua prinsipio tin tras di e lei na Mateo 5:43 i 44? (Wak e plachi.)

¹⁶ Lesa Mateo 5:​43, 44. “Stima bo próhimo.” Kua prinsipio tin tras di e lei ei? Ku Yehova ke pa nos stima tur sorto di hende. Den tempu di Hesus, e hudiunan tabata pensa ku nan mester a mustra amor na otro hudiu so i ku nan por a odia nan enemigunan. Pero Hesus tabata sa ku esei no tabata e motibu ku Yehova a bini ku e lei ei. E tabata sa ku Yehova ke pa nos stima tur sorto di hende, sin importá nan nashonalidat òf nan kultura.—Mat. 5:​45-48.

17. Kon nos por apliká e prinsipio ku tin na Mateo 5:43 i 44? (Wak e plachi.)

¹⁷ Kon nos por apliká e prinsipio ku tin na Mateo 5:43 i 44? E amor ku nos ta sinti pa otro hende ta pone ku nos no ta skohe un banda den guera ni nos no ta partisipá den guera. (Isa. 2:4; Mik. 4:3) Tambe e ta yuda nos mustra amor na hende ku ta bini for di otro pais, otro kultura òf ku ta di un otro religion. (Echo. 10:​34, 35) Anto e ta yuda nos pa pordoná hende ku a trata nos òf un persona ku nos ta stima malu.—Mat. 18:​21, 22; Mar. 11:25; Lúk. 17:​3, 4.

SIGUI HASI ESFUERSO PA APLIKÁ PRINSIPIO DI BEIBEL DEN BO BIDA

18. (a) Kiko nos mester sigui hasi? (b) Kiko nos lo trata den e siguiente artíkulo?

¹⁸ Nos ta masha kontentu ku Yehova no a duna nos lei pa tur kos den bida. Pero el a duna nos prinsipionan di Beibel ku ta yuda nos tuma bon desishon. (1 Kor. 14:20) Pues ora nos tin ku tuma desishon, laga nos sigui “purba di komprondé loke Yehova ke pa [nos] hasi.” (Efe. 5:17) Ta nos amor pa Yehova mester motivá nos pa tuma desishon ku ta hasié kontentu i no e miedu ku lo e kastigá nos si nos tuma desishon robes. Pero tin algu mas ku el a duna nos ku por yuda nos tuma bon desishon. Esei ta nos konsenshi. Den nos siguiente artíkulo nos lo bai trata esaki.