Lèsnan Ku Nos Por Siña for di Yákòb Su Profesia—Parti 1

1-2. Ki Yákòb a hasi promé ku el a muri, i dikon? (Wak e plachi.)

YÁKÒB tabata di edat kaba ora el a biaha di Kánan pa Egipto ku su famia. (Gén. 47:28) Na Egipto, el a mira su yu stimá Yósef atrobe i por fin henter su famia tabata huntu atrobe. Esei a hasié masha felis. Pero awor 17 aña a pasa, i e tabata sa ku e no tin muchu tempu mas. Pues, el a yama su yu hòmbernan pasobra e tabatin algu importante di bisa nan.—Gén. 49:28.

² Den e tempu ei, tabata normal pa un tata ku ta muriendo pidi miembronan di su famia bin tende su último instrukshonnan. (Isa. 38:1) Na e okashon ei tambe e por a bisa ken lo bira kabes di e famia despues ku e muri.

3. Dikon e palabranan di Yákòb na Génesis 49:1 i 2 ta spesial?

³ Lesa Génesis 49:​1, 2. Loke Yákòb a bisa su 12 yu hòmbernan tabatin un toke spesial. Dikon? Pasobra Yákòb tabata un profeta i Yehova a inspir’é pa bisa loke lo pasa den futuro ku su desendientenan. Pues, loke Yákòb a bisa na e momento ei tabata un profesia.

4. Pa ken Yákòb su profesia a konta? (Wak e kuadro “Yákòb Su Famia.”)

⁴ Den e artíkulo akí, nos lo papia tokante loke Yákòb a bisa Ruben, Símeòn, Levi i Huda. Anto den esun siguiente, loke el a bisa su sobrá ocho yu hòmbernan. Manera nos lo mira, loke el a bisa no a konta pa su yunan so pero tambe pa nan desendientenan. E desendientenan ei a forma e nashon di Israel ku nos ta lesa di dje den Beibel. Ora nos mira loke a pasa ku e nashon ei, ta bisto ku Yákòb su palabranan a kumpli al pie de la letra. Pero for di su palabranan nos ta siña tambe kon nos por hasi Yehova kontentu.

RUBEN

5. Kiko Ruben a ferwagt?

⁵ Yákòb a papia ku Ruben promé. El a bis’é: “Bo ta mi yu mayó.” (Gén. 49:3) Komo yu mayó, Ruben a ferwagt di haña mas herensia ku su sobrá rumannan. Tambe, el a ferwagt di bira kabes di e famia ora su tata muri i di pasa esei na su desendientenan.

6. Kon bin Ruben no a haña e herensia ku el a ferwagt? (Génesis 49:​3, 4)

⁶ Pero, Ruben no a haña e herensia ku el a ferwagt komo yu mayó. (1 Kró. 5:1) Kon bin? Pasobra el a drumi ku Bilha, konkubina di su tata. Bilha tabata kriá di Raquel, e kasá ku mas Yákòb a stima. (Gén. 35:​19, 22) Dikon Ruben a hasi un kos asina? Kòrda ku e tabata yu di Lea, Yákòb su otro kasá. Despues ku Raquel a muri, Ruben lo a drumi ku Bilha kisas pa hasi sigur ku Yákòb lo no kuminsá stima Bilha mas ku su mama Lea. Òf kisas Ruben tabata gusta Bilha i a laga su deseonan seksual domin’é. Sea kual sea e kaso, tantu Yákòb komo Yehova no a gusta niun tiki loke el a hasi.—Lesa Génesis 49:​3, 4.

7. Kiko a pasa ku Ruben i su desendientenan? (Wak e kuadro “Yákòb Su Profesia.”)

⁷ Yákòb a bisa Ruben: “Lo bo no sobresalí riba bo rumannan.” Anto asin’ei a pasa. Niun kaminda den Beibel nos no ta lesa ku un desendiente di Ruben a bira rei, saserdote òf profeta. Pero, Yákòb no a desheredá Ruben, i Ruben su desendientenan a bira un di e 12 tribunan na Israel. Dikon? (Hos. 12:6) Pasobra Ruben a demostrá bon kualidatnan na otro okashonnan i ta parse ku nunka mas el a kometé inmoralidat.—Gén. 37:​20-22; 42:37.

8. Ki nos ta siña for di Ruben?

⁸ Loke nos ta siña: Nos mester lucha kontra deseonan robes i ta desididu pa no kometé inmoralidat seksual. Si nos haña gana di kometé piká, nos mester para i pensa riba kuantu doló nos lo hasi Yehova, nos famia i otro hende. Tambe nos tin ku kòrda ku “kiko ku un hende sembra, esei lo e kosechá tambe.” (Gal. 6:7) Loke a pasa ku Ruben ta yuda nos kòrda tambe ku Yehova ta miserikòrdioso. Aunke Yehova no ta libra nos di e konsekuensianan di nos pikánan, lo e bendishoná nos ora nos arepentí i hasi esfuerso pa hasi loke ta korekto.

SÍMEÒN I LEVI

9. Dikon Yákòb tabata disgustá ku Símeòn i Levi? (Génesis 49:​5-7)

⁹ Lesa Génesis 49:​5-7. Djei Yákòb a papia ku Símeòn i Levi. For di su palabranan nos por mira ku e tabata disgustá ku nan. Vários aña promé, e yu hòmbernan di Yákòb a bin tende ku Síkèm, un kananeo, a violá nan ruman Dina. Ta di komprondé ku nan a haña masha hopi rabia mes. Nan a bisa Síkèm i e hòmbernan di su stat ku si nan sirkunsidá, lo tin pas entre nan i Yákòb su famia. Pero ta gaña nan a gaña nan. Ora ku Síkèm i tur hòmber di su stat tabatin doló ainda pasobra nan a sirkunsidá, Símeòn i Levi “a kohe nan spada. I sin ku niun hende a sospechá nada, nan a drenta e stat i mata tur hòmber.”—Gén. 34:​25-29.

10. Kon Yákòb su palabranan tokante Símeòn i Levi a kumpli? (Wak e kuadro “Yákòb Su Profesia.”)

¹⁰ Ta hopi hende Símeòn i Levi a mata. Anto nan aktitut violento a kansa Yákòb mashá. P’esei, el a profetisá ku lo plama nan den henter Israel. Anto e palabranan ei a kumpli mas ku 200 aña despues, ora e nashon di Israel a drenta e pais primintí. E tribu di Símeòn a haña komo herensia algun stat plamá den e region di e tribu di Huda. (Hos. 19:1) Anto e tribu di Levi a haña komo herensia 48 stat plamá den henter Israel.—Hos. 21:41.

11. Ki e desendientenan di Símeòn i Levi a hasi?

¹¹ E desendientenan di Símeòn i Levi no a sigui nan pasonan. E tribu di Levi a sirbi Yehova lealmente. Nan no a djòin e israelitanan ku a adorá e estatua di bisé tempu ku Moises a subi seru Sinaí pa haña e lei for di Yehova. Anto ora ku Moises a baha for di e seru, nan a yud’é mata esnan ku a adorá e dios falsu ei. (Éks. 32:​26-29) Yehova a skohe algun hòmber for di e tribu di Levi pa bira saserdote. (Éks. 40:​12-15; Num. 3:​11, 12) Anto ku kurashi e tribu di Símeòn a yuda e tribu di Huda bringa durante konkista di e pais primintí, i esei a agradá Yehova.—Hues. 1:​3, 17.

12. Ki nos ta siña for di Símeòn i Levi?

¹² Loke nos ta siña: Nunka no hasi ni bisa nada bou di rabia. Ta normal ku bo ta haña rabia si hende hasi abo òf un persona ku bo stima doló. (Sal. 4:4) Pero loke nos tin ku kòrda ta ku Yehova no ta keda niun tiki kontentu si nos bisa i hasi algu bou di rabia. (Sant. 1:20) Ora nos mira òf sufri inhustisia, sea paden òf pafó di e kongregashon, nos tin ku laga prinsipio di Beibel yuda nos atendé ku esei. Asina ei nos ta evitá di bisa òf hasi algu ku lo hùrt otro hende. (Rom. 12:​17, 19; 1 Ped. 3:9) Awor hóben, kiko si bo mayornan ta hasi kos ku Yehova no gusta? Bo no tin nodi di sigui nan pasonan i hasi meskos ku nan. No pensa nunka ku abo no por hasi Yehova kontentu. Yehova lo bendishoná bo sigur si abo hasi esfuerso pa hasi loke ta korekto.

HUDA

13. Dikon Huda lo tabata basta nèrvioso ora ku su bùrt a yega?

¹³ Awor tabata Huda su bùrt. Despues di tende loke su tata a bisa ku lo pasa ku su tres rumannan mayó, Huda lo tabata basta nèrvioso. E sa ku e tambe a hasi vários eror grave. El a yuda su rumannan pluma e stat di Síkèm. (Gén. 34:27) T’e a bin ku e idea di bende Yósef komo katibu. Tambe el a yuda su rumannan gaña nan tata tokante loke a pasa ku Yósef. (Gén. 37:​27, 31-33) Anto despues, el a drumi ku su nuera Támar, pensando ku e tabata un prostituta.—Gén. 38:​15-18.

14. Ki Yákòb a bisa Huda, i ki bon kosnan Huda a hasi? (Génesis 49:​8, 9)

¹⁴ Apesar di e vários erornan grave ku Huda a hasi, Yehova a laga Yákòb elogiá Huda i profetisá kos bon so. (Lesa Génesis 49:​8, 9.) Dikon? Pasobra Huda a demostrá ku e tabata preokupá masha pa su tata di edat. Ademas, el a stima Bènyamin asina tantu ku e tabata dispuesto pa bira katibu na su lugá.—Gén. 44:​18, 30-34.

15. Kon Yákòb su palabranan a kumpli?

¹⁵ Yákòb a profetisá ku Huda lo bira lider di su rumannan. Mas o ménos 200 aña lo a pasa promé ku e profesia ei a kuminsá kumpli. Durante e 40 añanan ku e nashon di Israel tabata biaha den desierto, e tribu di Huda tabata na kabes. (Num. 10:14) Añanan despues, Huda tabata e promé tribu ku Yehova a manda bringa kontra e kananeonan pa konkistá e pais primintí. (Hues. 1:​1, 2) Anto David tabata e promé di un lista largu di reinan ku a bini for di e tribu di Huda. Pero esei no tabata tur kos.

16. Kon e profesia na Génesis 49:10 a kumpli? (Wak e kuadro “Yákòb Su Profesia.”)

¹⁶ Yákòb a bisa tambe ku Silo, esta, e Gobernante permanente di humanidat, lo ta un desendiente di Huda. (Lesa Génesis 49:10 i nota.) E persona ei ta Hesukristu. Un angel a bisa tokante dje: “Yehova Dios lo dun’é e trono di su tata David.” (Luk. 1:​32, 33) Beibel ta yama Hesus tambe “e Leon di e tribu di Huda.”—Rev. 5:5.

17. Kon nos por imitá Yehova?

¹⁷ Loke nos ta siña: Yehova semper ta wak e bon den su sirbidónan. El a bendishoná Huda aunke el a hasi vários eror grave. Bo por imaginá ki lo a pasa den mente di Huda su rumannan? Por ta nan a puntra nan mes: ‘Ta ki Yehova a mira den dje?’ No ta importá ki nan a pensa, pero loke sí nos sa ta ku Yehova a wak e bon den Huda i a bendishon’é pa esei. Kon nos por imitá Yehova? Ora nos hasi esfuerso pa wak e bon den nos rumannan. Ban bisa ku un ruman a haña un privilegio òf un asignashon spesial. Yen di kos por pasa den bo mente si bo sa ku e ruman a kometé fayo- i erornan den pasado. Pero loke bo tin ku kòrda ta ku Yehova ta kontentu kuné pasobra e ta wak su bon kualidatnan.

18. Dikon nos mester tin pasenshi?

¹⁸ Algu mas ku nos ta siña ta ku nos mester tin pasenshi. Yehova semper ta kumpli ku su promesanan, pero no semper na e momento ni na e manera ku nos a ferwagt. No ta mesora e tribu di Huda a kuminsá guia e israelitanan. Apesar di esei, nan a duna sosten na esnan ku Yehova a skohe. Por ehèmpel, nan a kooperá ku Moises di e tribu di Levi, Hosue di e tribu di Efraím i Rei Saul di e tribu di Bènyamin. Nos tambe mester duna sosten na esnan ku Yehova skohe pa guia nos.—Heb. 6:12.

19. Kiko nos a siña te asina leu?

¹⁹ Te asina leu ki nos a siña? Ku “hende no ta mira kos manera Dios ta mira nan.” (1 Sám. 16:7) Yehova tin masha pasenshi i ta kla pa pordoná. Klaru ku e no ta keda kontentu ora nos hasi kos malu, pero e no ta ferwagt pa nos ta perfekto tampoko. E por asta bendishoná un hende ku a kometé vários piká grave den pasado basta el a arepentí di kurason i ta hasi esfuerso pa hasi loke ta korekto. Den e siguiente artíkulo, nos lo papia tokante loke Yákòb a bisa su sobrá ocho yu hòmbernan.