Nunka Bo No Ta Bo So

1-2. (a) Dikon nos por bisa ku nunka bo no ta bo so ora bo haña bo ku difikultat? (b) Kiko nos lo trata den e artíkulo akí?

SITUASHONNAN difísil por laga bo sinti manera bo ta bo so meimei di mal tempu den un boto chikitu riba laman ganchu. Pero bo no ta bo so pasobra Yehova, bo Tata ku stima bo, ta mira den loke bo ta pasa i lo no keda sin yuda bo. E ta primintí kada un di nos: “Lo mi yuda bo.”—Isa. 41:10.

² E artíkulo akí lo laga bo mira kon Yehova ta (1) guia bo, (2) pèrkurá pa bo, (3) protehá bo i (4) konsolá bo. Yehova ke yuda bo komprondé ku sea kual sea e difikultatnan ku bo por haña bo kuné, nunka lo e no laga bo na kaya. Pues nunka bo no ta bo so.

YEHOVA TA GUIA BO

3-4. Kon Yehova ta guia nos? (Salmo 48:14)

³ Lesa Salmo 48:14. Yehova sa ku riba nos mes nos no por hasi nada i ku nos mester di su guia. Pero kon e ta guia nos? Un di e maneranan ta via Beibel. (Sal. 119:105) E ta usa Beibel pa yuda bo tuma bon desishon i kultivá kualidatnan ku lo yuda bo tin un bida felis aworakí i e speransa di biba pa semper.a Por ehèmpel, e ta siña bo pa no keda karga renkor, pa ta onesto i stima otro di kurason. (Sal. 37:8; Heb. 13:18; 1 Ped. 1:22) Ora bo hasi e kosnan ei, bo ta bira un mihó mayor, kasá i amigu.

⁴ Den Beibel tambe Yehova ta konta nos di hende ku tabatin problema- i sintimentunan meskos ku nos. (1 Kor. 10:13; Sant. 5:17) Por lo ménos dos kos ta pasa ora bo lesa tokante nan bida i apliká loke bo a siña. Promé, bo ta realisá ku bo no ta e úniko ku tin problema den bida. Tin otronan ku tambe a pasa den situashonnan paresido i a logra soportá nan ku yudansa di Yehova. (1 Ped. 5:9) I di dos, bo ta siña kon pa dil ku prueba sin pèrdè bo goso.—Rom. 15:4.

5. Ken tur Yehova ta usa pa guia nos?

⁵ Yehova ta usa nos rumannan tambe pa guia nos.b Por ehèmpel, superintendentenan di sirkuito ta bishitá e kongregashon regularmente pa animá nos. Nan diskurso ta hasi nos fe fuerte i ta yuda nos keda será ku nos rumannan. (Echo. 15:40–16:5) E ansianonan tambe ta kuida i yuda kada ruman den nan kongregashon. (1 Ped. 5:​2, 3) Mayornan ta siña nan yunan pa stima Yehova, kon pa tuma bon desishon i pa tin bon kustumber i manera. (Pro. 22:6) Anto ruman muhénan ku tin bon amistat ku Yehova ta yuda esnan mas yòn ku nan bon ehèmpel, bon konseho i animashon.—Tito 2:​3-5.

6. Ki bo mester hasi pa benefisiá di Yehova su guia?

⁶ Yehova a duna nos tur loke nos mester pa tuma bon desishon i pa nos tin un bida felis. Kon bo por mustra ku bo ta apresiá tur loke el a hasi pa bo? Proverbionan 3:5 i 6 ta bisa: “Konfia den Yehova ku henter bo kurason, i no bai tras di bo mes sabiduria.” Ora bo hasi esei, “lo e yuda bo tin éksito den bida,” esta, lo e yuda bo evitá hopi problema i tin un bida mas felis. Yehova ta duna kada un di nos nèt e konseho ku nos tin mester. Esei no ta hasi bo kontentu?—Sal. 32:8.

YEHOVA TA PÈRKURÁ PA BO

7. Kon ta algun manera ku Yehova ta pèrkurá pa nos? (Filipensenan 4:19)

⁷ Lesa Filipensenan 4:19. Aparte di guia nos den sentido spiritual, Yehova ta yuda nos tambe ku nos kosnan di tur dia manera kuminda, paña i un dak. (Mat. 6:33; 2 Tes. 3:12) Ta masha normal pa preokupá tokante e kosnan ei. Pero Yehova no ke pa bo preokupá demasiado. (Mat. 6:25) Dikon? Pasobra bo Tata hamas i nunka lo bandoná bo. (Mat. 6:8; Heb. 13:5) Si el a bisa ku lo e pèrkurá pa bo, bo por konfia su palabra.

8. Kiko Yehova a hasi pa David?

⁸ Por ehèmpel, wak kon Yehova a yuda David. Pa hopi aña David mester a hui pa Rei Saul. Durante tur e añanan ei Yehova a pèrkurá pa tantu e komo su hòmbernan. Pensando bèk riba kon Yehova a kuid’é, David a skirbi: “Un tempu mi tabata hóben, i awor mi ta bieu, pero nunka mi no a mira un hende hustu desampará ni su yunan ta kana pidi pan.” (Sal. 37:25) Sin duda abo tambe a mira kon Yehova a pèrkurá pa abo òf bo rumannan durante tempu difísil.

9. Kon Yehova ta pèrkurá pa nos ora un desaster tuma lugá? (Wak e plachi.)

⁹ Yehova ta pèrkurá tambe pa su pueblo ora un desaster òf tragedia tuma lugá. Por ehèmpel, den promé siglo tabatin un periodo di hamber pisá na Hudea, anto rumannan di diferente pais a manda kuminda pa esnan den nesesidat. (Echo. 11:​27-30; Rom. 15:​25, 26) Awendia Dios su pueblo ta hasi meskos. Ora un desaster pasa, Yehova ta motivá su pueblo pa pèrkurá kosnan manera kuminda, awa, paña i remedi pa esnan ku a ser afektá. Timnan di konstrukshon ta drecha kasnan i Salònnan di Reino. Ademas, e rumannan ta duna konsuelo i animashon for di Beibel na esnan ku a pèrdè kas òf ser kerí.c

10-11. Kiko bo ta siña for di e eksperensia di Borys?

¹⁰ Yehova ta pèrkurá tambe pa hende ku ainda no ta sirbié. P’esei nos tambe ta buska kualke oportunidat pa ta amabel ku hende ku no ta Testigu. (Gal. 6:10) Esei hopi biaha ta habri kaminda pa nan siña mas tokante nos i tokante Yehova. Algu asina a pasa ku Borys, un kabes di skol na Ukrania. Borys no ta un Testigu, pero semper el a trata e alumnonan Testigu na un manera amabel i a respetá nan kreensianan. Debí na guera, el a disidí di hui bai un área mas safe di Ukrania i nos rumannan a yud’é. Algun tempu despues, Borys a bai Memorial. Pensando riba tur loke nos rumannan a hasi p’e, Borys a bisa: “Mi no tin boka pa gradisí Testigunan di Yehova pasobra nan tabata masha amabel i a kuida mi bon.”

¹¹ Pues, ora ku kada un di nos ta mustra amor na hende den nesesidat, sea ku nan ta Testigu òf nò, nos ta imitando nos Tata ku ta miserikòrdioso. (Luk. 6:​31, 36) Nos ta spera ku esei lo duna nan gana di siña mas tokante Yehova i kuminsá sirbié huntu ku nos. (1 Ped. 2:12) Sea ku esei pasa òf nò, nos lo ta felis pasobra tin “mas felisidat den duna ku den risibí.”—Echo. 20:35.

YEHOVA TA PROTEHÁ BO

12. Kon Yehova ta primintí di protehá nos komo grupo? (Salmo 91:​1, 2, 14)

¹² Lesa Salmo 91:​1, 2 i 14. Yehova ta primintí di protehá nos for di kualke kos ku por daña nos amistat kuné. P’esei, nunka lo e permití Satanas stòp nos di ador’É manera E ta aprobá. (Huan 17:15) Anto durante e “tribulashon grandi,” nos por konfia kompletamente ku Yehova lo yuda nos keda ku un fe fuerte i lo salba nos.—Rev. 7:​9, 14.

13. Kon Yehova ta protehá abo?

¹³ Pero kisas nos por puntra: ‘Kon Yehova ta protehá ami?’ Wèl, Yehova a duna bo Beibel pa yuda bo distinguí loke ta bon for di loke ta malu. (Heb. 5:14) Ora bo biba segun e prinsipionan di Beibel, bo ta protehá bo amistat ku Yehova i lo bo tuma bon desishon ku lo yuda bo tin un bida mas felis i salú. (Isa. 32:​1, 2) Bo rumannan stima Yehova i ta biba segun su prinsipionan. Si na reunion i na otro okashon bo ta pasa tempu ku nan, nan lo animá bo i yuda bo keda leu for di loke ta malu.—Pro. 13:20.

14. (a) Dikon Yehova no ta protehá nos di tur prueba? (b) Kiko Salmo 9:10 ta sigurá nos? (Wak e nota.)

¹⁴ Awor nos tin ku komprondé ku nada malu lo no pasa nos? Nò, pasobra den Beibel nos ta lesa ku tabatin biaha ku Yehova a protehá su sirbidónan i otro biaha nò. Beibel ta bisa ku “suseso inesperá” por pasa. (Ekl. 9:11) Anto pa proba ku Satanas ta un gañadó, Yehova a permití algun di su sirbidónan pasa den persekushon i asta muri. (Yòb 2:​4-6; Mat. 23:34) Pues lo tin biaha ku Yehova lo permití nos pasa den prueba, pero ún kos ta sigur: Yehova nunka lo bandoná nos.d—Sal. 9:10.

YEHOVA TA KONSOLÁ BO

15. Di ki maneranan Yehova ta konsolá nos? (2 Korintionan 1:​3, 4)

¹⁵ Lesa 2 Korintionan 1:​3, 4. Tin biaha, nos por ta ferdrit, preokupá òf yen di strès. Por ta na e momento akí bo ta pasando den un situashon ku ta laga bo sinti bo bo so. Tin un persona ku ta komprondé ki bo ta pasa aden? Sí, Yehova ta komprondé i ta sinti bo doló. Pero no ta esei so e ta hasi. E ta “konsolá nos den tur nos tribulashonnan.” Kon e ta hasi esei? Ora bo deshogá bo kurason serka dje, e ta duna bo “e pas di Dios ku ta surpasá tur komprondementu.” (Flp. 4:​6, 7) Tambe bo ta haña konsuelo ora bo lesa Beibel. Ei den, bo ta siña di Yehova su konsehonan sabí, bo ta mira kuantu Yehova stima bo i tambe bo ta mira e bunita speransa ku e tin pa bo den futuro. Anto na reunion tambe bo ta haña konsuelo pasobra bo ta siña kosnan animante for di Beibel i ta huntu ku bo rumannan ku stima bo.

16. Kiko bo ta siña di Nathan i Priscilla?

¹⁶ Pa nos haña un idea kon Yehova ta konsolá i animá nos pa medio di Beibel, wak loke a pasa ku Nathan i Priscilla, ku ta biba na Merka. Algun aña pasá, nan a bai yuda kaminda tabatin mester di mas publikadó. Nathan a bisa: “Nos tabatin sigur ku Yehova lo laga tur kos kana bon.” Pero ora nan a yega nan asignashon nobo nan a haña nan ku problema inesperá ku nan salú, i nan no por a haña trabou pa kubri nan gastunan. Ku tempu nan mester a bai bèk Merka, kaminda nan a sigui lucha pa kubri nan gastunan. Nathan a bisa: “Mi tabata puntra mi mes dikon Yehova a laga kosnan bai asina. . . . Asta m’a kuminsá pensa ku mi mester a hasi algu malu.” Ku tempu, Nathan i Priscilla a bin realisá ku niun ora so Yehova no a bandoná nan. Nathan a konta: “Durante e tempunan duru ei, Beibel a bira manera un bon amigu ku tabata animá nos i guia nos. . . . Nos a siña ku na lugá di focus riba e problema, nos tin ku focus riba kon Yehova tabata yuda nos soportá. Anto esei a yuda nos pa ta mas prepará pa dil ku pruebanan den futuro.”

17. Kon Helga a haña konsuelo? (Wak e plachi.)

¹⁷ Yehova ta usa nos rumannan tambe pa konsolá nos. Esei ta loke Helga a deskubrí. Pa años, e tabatin vários problema ku a lag’é sintié kibrá i sin balor. Pero mirando bèk, e ta realisá ku Yehova tabata usa e kongregashon pa konsol’é. Helga a skirbi: “Yehova semper a yuda mi ora e tabata mira ku mi no tabatin forsa mas pa atendé ku trabou, ni ku mi yu malu ni ku otro problema. Den e último 30 añanan, mi no por kòrda un dia ku Yehova no a konsolá mi. Mayoria di biaha, el a konsolá mi pa medio di palabranan amabel di mi rumannan. Anto masha hopi biaha m’a haña mensahe, karchi i palabra di elogio ku a yega nèt na ora.”

18. Kon bo por konsolá otro hende?

¹⁸ Nos tur tin e privilegio di imitá nos Dios ora nos konsolá otro hende. Kon bo por hasi esei? Skucha ku pasenshi, bisa algu animante i yuda na manera práktiko. (Pro. 3:27) Hasi esei no ku bo rumannan so pero asta ku hende ku no ta Testigu. Ora bo sa ku nan ta pasa den kualke difikultat bishitá nan, skucha nan i kompartí un teksto animante. Ora bo imitá e “Dios di tur konsuelo,” no solamente bo ta yuda bo rumannan pero kisas asta bo ta duna hende ku no ta Testigu gana di siña mas di Yehova.—Mat. 5:16.

YEHOVA SEMPER T’EI PA BO

19. Kiko tur Yehova ta hasi pa nos, i kon nos por imit’é?

¹⁹ Yehova ta masha atento pa nos tur ku ta stim’é. E no ta bandoná nos ora nos ta pasa den situashon difísil. Meskos ku un mayor ku ta stima i kuida su yu, asina Yehova ta kuida su fiel adoradónan. E ta guia nos, pèrkurá pa nos, protehá nos i konsolá nos. Anto nos ta imit’é ora nos ta yuda i animá otro hende. Den e mundu akí, lo bo haña bo ku difikultat òf tristesa, pero bo por tin konfiansa ku Yehova t’ei pa bo. Pasobra e mes a primintí: “No tene miedu, pasobra mi ta ku bo.” (Isa. 41:10) Pues bo por tin sigur ku, ku Yehova nunka bo no ta bo so.