Skucha i Siña
1. Dikon nos lo tin ku hasi èkstra esfuerso pa por skucha i siña na un kongreso di distrito?
1 Pronto e kongresonan di distrito di 2013 lo kuminsá. Nos rumannan a hasi un gran esfuerso pa prepará un programa ku ta trata e nesesidatnan aktual di hende rònt mundu. Bo a traha bo plannan kaba pa asistí na tur e tres dianan di kongreso? Na kongresonan grandi por tin hopi distraishon, i e seshonnan ta mas largu ku nos reunionnan di kongregashon. P’esei nos mester hasi èkstra esfuerso pa konsentrá i presta bon atenshon na e programa. Ademas, e echo ku kisas nos tin ku rekoré distansianan largu i otro faktornan tambe por laga nos keda un poko kansá. Kiko por yuda nos keda alerta pa asina nos por skucha i siña?—Deu. 31:12.
2. Kiko nos por hasi pa prepará nos kurason pa e kongreso?
2 Promé Ku e Kongreso: Riba nos website ofisial, www.jw.org, bo por haña e programa di kongreso ku ta kontené tema di kada diskurso huntu ku un òf dos teksto klave. Si nos tin akseso na Internet, nos por wak e puntonan akí for di adelantá pa asina nos por prepará nos kurason pa e instrukshonnan ku nos lo haña. (Èsd. 7:10, NW) Dikon no analisá e programa di kongreso durante boso anochi di Adorashon Komo Famia pa krea ekspektativa pa e binidero kongreso?
3. Kiko nos por hasi pa nos skucha ku atenshon?
3 Durante e Programa: Si bo tin ku bai baño, hasi esaki promé ku e seshon kuminsá. Paga bo telefòn selular pa evitá ku un yamada òf mensahe por drenta i distraí bo, i pa bo no kai den tentashon di manda mensahe durante e programa. Si bo telefòn tin ku keda sendí, program’é di tal forma ku e no ta kita atenshon di esnan presente si akaso un yamada drenta. Si bo tin un “tablet,” us’é na un manera ku no ta distraé otro hende. Evitá di kome òf bebe kos durante e programa. (Ekl. 3:1) Keda ku bo bista riba e oradó, i ora e lesa un teksto, sigui e lesamentu den bo Beibel. Hasi anotashon kòrtiku.
4. Kon mayornan por yuda nan yunan skucha i siña?
4 Nos ke pa nos yunan tambe skucha i siña na e kongreso. Proverbionan 29:15 ta bisa: “Un yu lagá pa su kuenta ta pone su mama na bèrgwensa.” P’esei, ta bon pa henter e famia sinta huntu pa asina e mayornan por hasi sigur ku e yunan ta pone atenshon na e programa en bes di papia, manda mensahe òf kana rònt. Asta si e yunan ta muchu chikí pa komprondé tur loke ta ser presentá, nos por siña nan pa keda lantá i sinta ketu.
5. Dikon ta bon pa nos repasá e programa i kon nos por hasi esaki?
5 Kada Dia Despues di e Programa: No keda lantá te lat. Drumi trempan pa bo sosegá bon. Ora bo repasá loke bo a skucha, bo tin mas chèns di keda kòrd’é. P’esei, lo ta bon pa komo famia boso tuma un par di minüt tur anochi pa papia tokante e programa. Si bo ta bai un restorant ku algun ruman, bo por bai ku bo anotashonnan anto trese un òf dos punto dilanti ku bo a gusta. Despues di e kongreso, apartá algun minüt durante boso anochi di Adorashon Komo Famia pa analisá kon e famia por apliká e informashon. Tambe bo por apartá algun minüt tur siman pa analisá un porshon di e publikashonnan nobo.
6. Dikon no ta sufisiente pa djis asistí na e kongreso?
6 Nos no por bisa ku nos a benefisiá di un bankete si nos no a kome i digerí e kuminda. Esei ta e kaso tambe ku e bankete spiritual ku nos lo haña na e kongreso di distrito. Nos por benefisiá di dje si nos t’ei na tur e seshonnan, ta skucha atentamente i ta apliká loke nos siña.