Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman di 29 di desèmber 2008. E superintendente di skol lo kondusí un repaso di 20 minüt basá riba e informashon ku a ser tratá den asignashonnan di e simannan di 3 di novèmber te ku 29 di desèmber 2008.
KUALIDAT DI PAPIA
1. Dikon ta efektivo pa duna ekshortashon “a base di amor”? (Flm. 9, BPK) [be-PA pág. 266 §2-4] Konseho duná ku takto i amor tin mas chèns di motivá e ouditorio na akshon. Ta bon pa elogiá e rumannan na un manera sinsero i spesífiko, promé ku bo duna nan un ekshortashon. Esaki lo yuda bo ouditorio mira ku bo ta komprondé nan i apresiá nan, i esei lo hasi nan mas habrí pa e konseho ku bo ta bai duna nan.
2. Kon nos por animá otro hende? [be-PA pág. 268 §4–pág. 269 §2] Un manera importante pa animá otro hende ta dor di animá nan pa kòrda kon Yehova a yuda su pueblo den tempu bíbliko ora ku nan tabata pasa den difikultat. (Rom. 15:4) Tambe nos por animá otro hende dor di yuda nan kòrda riba loke Yehova a hasi pa nan personalmente.
PARTI NUM. 1
3. Den ki manera Pablo su karta na Tito ta “bon i di probecho” pa nos awe? (Tito 3:8) [si-S pág. 241 §8] Kristiannan na Kreta ku tabata rondoná pa korupshon a haña spièrtamentu pa konsentrá riba praktikamentu di “bon obranan.” (Tito 3:8) E echo ku Pablo a kondená maldat den Kreta ta sirbi komo un atvertensia pa nos awe. Nos tin ku “renunsiá impiedat i deseonan mundano” i “biba huisioso, hustu i santu den e siglo presente.” (Tito 2:12)
4. Pakiko e promé karta di Pedro tabata oportuno? [si-S pág. 251 §1] Hende tabata papia kontra e kristiannan pasobra nan no a partisipá den adorashon di emperador ni nan no a partisipá den seremonianan religioso falsu. E promé karta di apòstel Pedro a animá e kristiannan pa para firme bou di e pruebanan akí, dunando nan guia pa nan sa kon pa komportá nan mes bou di Nero, e Cesar di e tempu ei. E informashon tabata oportuno ya ku na aña 64 di nos era nan a kuminsá haña persekushon.
5. Ki efekto e nifikashon simbóliko di Revelashon mester tin riba nos? [si-S pág. 263 §1] Maske kumplimentu di e nifikashon simbóliko por terorisá e malbado, e tin un efekto nèt kontrario riba e pueblo di Dios. Nos ta di akuerdo ku e introdukshon inspirá di e buki, esta: “Bendishoná ta esun ku lesa i esnan ku tende e palabranan di e profesia.” (Rev. 1:3)
LESAMENTU SEMANAL DI BEIBEL
6. Dikon Pablo lo a konektá e dos ekspreshonnan “no kalumniadó” i “ni sklabisá na biña” ku otro na Tito 2:3? [w94-PA 15/6 pág. 20 §12] Interes den hende por degenerá fásilmente den redu i asta kalumnia, spesialmente ora bibida ta lòs e lenga. (Pro. 23:33) Siguramente, tur hende ku ta siguiendo tras di un moda di biba saludabel, hende hòmber i muhé, ta hasi bon pa vigilá kontra e trampa akí.
7. E echo ku Satanas tin “poder riba morto [òf, “e medio pa kousa morto,” NW]” ta indiká ku e por kousa morto prematuro di ken ku e ke? (Heb. 2:14) [w08-PA 1/10 “E Palabra di Yehova Ta Bibu—Puntonan Sobresaliente di e Kartanan na Tito, na Filemon i na e Hebreonan”] Nò, esei no ta asina. Sinembargo, for di komienso di Satanas su rumbo di maldat den Edén, su mentiranan a kousa morto pasobra Adam a peka i a pasa piká i morto na henter e famia humano. (Rom. 5:12) Ademas, Satanas su agentenan riba tera a persiguí sirbidónan di Dios te na morto, meskos ku nan a hasi ku Hesus. Pero esei no ke men ku Satanas tin poder sin límite pa mata ken ku e ke. Si tabata asina, sin duda lo el a kaba ku e adoradónan di Yehova masha tempu. Yehova ta protehá su pueblo komo grupo i no ta permití Satanas eksterminá nan. Asta si Dios permití algun di nos muri bou di atake di Satanas, nos por tin e konfiansa ku Dios lo anulá kualke daño ku nos sufri.
8. Ta kua “stat” Abraham tabata buska òf spera? (Heb. 11:10, 13-16) [w08 1/10 “E Palabra di Yehova Ta Bibu—Puntonan Sobresaliente di e Kartanan na Tito, na Filemon i na e Hebreonan”] Esaki no tabata un stat literal sino simbóliko. Abraham tabata spera “Yerusalèm selestial,” ku a konsistí di Kristu Hesus i su 144.000 ko-gobernantenan. Beibel ta referí na e ko-gobernantenan akí den nan gloria selestial komo “e stat santu, Yerusalèm Nobo.” (Heb. 12:22; Rev. 14:1; 21:2) Abraham tabata spera ansiosamente di por biba bou di gobernashon di e Reino di Dios.
9. Kiko ta nifiká ser pasífiko, i ki preguntanan nos por hasi nos mes relashoná ku esaki? (Sant. 3:17) [w08-PA 1/3 pág. 27 §18] Ser pasífiko ta enserá evitá agresividat, un aktitut di ta kla pa bringa, òf akshonnan ku ta desbaratá pas. Ta bon pa kada un di nos puntra su mes: ‘Den kongregashon, mi tin e fama di ta hasidó di pas òf kibradó di pas? Ta kada bes mi tin desakuerdo ku otro hende, den kua mi ta sinti mi fásilmente ofendí òf mi ta ofendé otro hende? Mi ta konosí komo un hende ku semper ta hasi esfuerso pa promové pas, siendo kla pa pordoná i lubidá fayo di otro?’
10. Kiko e ekspreshon “Dios ta mas grandi ku nos kurason” ke men? (1 Juan 3:20) [w05-PA 1/8 pág. 30 §19] Tin biaha nos kurason por kondená nos, spesialmente ora nos bira hopi konsiente di nos imperfekshonnan i faltanan. Òf por ta debí na nos kriansa, nos ta demasiado inkliná na pensa negativo di nos mes, komo si fuera nada ku nos hasi lo por ta aseptabel pa Yehova. Dios ta mira mas leu ku nos erornan i ta ripará nos berdadero potensial. Tambe, Yehova sa kiko ta nos motivashonnan i intenshonnan. E konosé nos mas mihó ku nos konosé nos mes.