Prepará Esnan Nobo pa Enfrentá Oposishon
1 Ora un hende kuminsá studia Beibel i ta “deseá di hiba un bida santu [òf, “deboto na Dios,” NW ],” e ta bira blanko di atake di Satanas. (2 Tim. 3:12) Oposishon por bini di kompañero di skol, kolega di trabou òf bisiña. Loke por bira mas difísil ta ora famianan ku bon intenshon ta oponé un hende nobo.—Mat. 10:21; Mar. 3:21.
2 Beibel A Profetisá Oposishon: Esnan nobo mester komprondé ku persekushon ta algu ku nan por spera i ku esei ta un indikashon ku nan ta birando disipel berdadero di Kristu. (Juan 15:20) Tin bes, oposishon por bini debí ku hende tin un idea robes tokante Testigunan di Yehova. Pero kòrda ku ta un gran goso ora un hende ta ser desonrá pa motibu ku e ta un siguidó di Hesus i ta obedesé Dios. (Echo. 5:27-29, 40, 41) Sigurá e nobonan ku nan tin Yehova su apoyo amoroso. (Sal. 27:10; Mar. 10:29, 30) Dor di mantené nan integridat, nan ta demostrá ku nan ta na Yehova su banda den e kuestion di soberania universal.—Pro. 27:11.
3 E Papel di Konosementu Eksakto: Laga bo studiantenan di Beibel komprondé bon kla ku ta masha importante pa nan sigui atkerí konosementu eksakto, apesar di problemanan ku nan ta enfrentá. Satanas ta usa oposishon pa stroba loke nan ta siña di saka rais den nan kurason figurativo. (Pro. 4:23; Luk. 8:13) Nan mester sigui atkerí konosementu eksakto di e Palabra di Dios pa asina nan por bira firmemente ankrá den e fe.—Sal. 1:2, 3; Kol. 2:6, 7.
4 Perseveransia Ta Nesesario: Bou di kualke sirkunstansia difísil, perseveransia ta masha importante, i e kualidat akí por produsí bon resultado. (Luk. 21:16-19) Ora esnan nobo ta perseverá apesar di oposishon, tantu nan mes komo otro hende ta benefisiá. Nan ta eksperensiá personalmente kon Yehova ta bendishoná hende ku ta perseverá fielmente.—Sant. 1:12.
5 Apòstel Pablo a alegrá ora su rumannan na Tesalónika a progresá spiritualmente. El a gradisí Dios pa nan; ta e mes a yuda hopi di nan drenta den e bèrdat. (2 Tes. 1:3-5) Nos tambe por haña e mesun goso i satisfakshon ei si nos prepará nos studiantenan di Beibel pa enfrentá oposishon i perseverá.