Nos Tin Tesoronan Balioso pa Kompartí
1 E Palabra di Dios ta yen di tesoro spiritual ku nos ta balorá mashá. (Sal. 12:6; 119:11, 14) Na un sierto okashon, Hesus a usa vários komparashon pa deskribí diferente aspekto di e Reino. Despues di esei el a puntra su disipelnan: “Boso a komprondé tur e kosnan akí?” Ora nan a bis’é ku nan a komprondé, el a bisa nan: “P’esei tur [“instruktor públiko, ora el a ser siñá tokante e reino di shelu,” NW ] di shelu ta manera un kabes di kas, ku ta saka for di su tesoro kosnan nobo i bieu.”—Mat. 13:1-52.
2 Nos por konsiderá e bèrdatnan bíbliko ku nos a siña tempu ku nos a kuminsá studia komo tesoronan bieu. Mediante nos estudio personal i progresivo di e kosnan profundo di e Palabra di Dios, nos ta haña otro bèrdatnan bíbliko, ku pa nos ta tesoronan nobo. (1 Kor. 2:7) “E esklabo fiel i prudente” tambe ta yuda nos komprondé informashon nobo, òf tesoronan nobo.—Mat. 24:45.
3 Nos ta balorá e tesoronan spiritual akí mashá, tantu esnan bieu komo esnan nobo. Esaki ta motivá nos pa hasi esfuerso pa haña entrenamentu i eksperensia komo instruktornan di e Palabra di Dios i kompartí generosamente ku otro hende e bèrdatnan presioso ku nos a siña.
4 Siña for di Hesus Su Ehèmpel: E echo ku Hesus a hasi hopi esfuerso pa kompartí e tesoronan akí ku otro hende a demostrá kuantu el a balorá nan. Asta ora e tabata kansá, e no a keda sin saka kos for di su “tesoro.”—Juan 4:6-14.
5 Hesus su amor pa hende ku tabata pober den sentido spiritual a motiv’é pa kompartí ku nan e tesoronan di Dios su bèrdat ku ta duna bida. (Sal. 72:13) El a sinti kompashon pa esnan ku tabatin hamber spiritual i esei a impuls’é pa “siña nan hopi kos.”—Mar. 6:34.
6 Imitá Hesus: Ora nos ta balorá nos tesoronan, meskos ku Hesus, nos lo ta ansioso pa mustra hende hoyanan spiritual direktamente for di Beibel. (Pro. 2:1-5) Nos lo papia di kurason i ku entusiasmo tokante bèrdatnan bíbliko, maske ku tin bes nos por ta kansá. (Mar. 6:34) Nos apresio profundo pa e tesoronan ku nos tin lo motivá nos pa hasi tur loke nos por den sirbishi, hasiendo esfuerso kontinuamente pa mehorá nos partisipashon.