Anunsio

◼ Oferta di literatura pa yanüari: Por ofresé kualke buki di 192 página ku su blachinan ta bira hel òf ta kambia koló òf kualke buki ku a ser publiká promé ku 1990. Kongregashonnan ku no tin ningun di e bukinan mas bieu aki por ofresé E Secreto pa Felicidad den Famia. Febrüari: Hala Serka Yehova. Kongregashon ku no tin e publikashon aki por usa e buki Bida—Kon El A Presentá? Dor di Evolushon òf Kreashon? (tamaño grandi òf chikitu) òf Revelacion—su gran culminacion ta cerca! Mart: Ofresé e foyeto Keda Vigilá! Si un hende mustra berdadero interes, introdusí e buki Conocimentu i hasi esfuerso pa kuminsá un studio di Beibel. Aprel: Ofresé ehemplarnan individual di tantu E Toren di Vigilansia komo Spièrta! Ora di rebishitá hende interesá, bishitá tambe hendenan ku sa asistí na Memorial òf otro eventonan teokrátiko pero ku no ta asosiá aktivamente ku e organisashon. Ofresé prinsipalmente e buki Adorá e Úniko Dios Berdadero. E meta ta pa kuminsá un estudio di Beibel, spesialmente ku hende ku a studia e buki Conocimentu i e foyeto Rekerí kaba.

◼ Kuminsando na febrüari, i no mas tardá ku 6 di mart, e diskurso públiko nobo pa superintendente di sirkuito lo ta “Aktua Sabí den un Mundu Bobo.”

◼ Kongregashonnan mester hasi areglo apropiá pa tene e Memorial di e aña aki riba djaweps 24 di mart, despues ku solo baha. Maske e diskurso lo por kuminsá mas trempan, e pasamentu di e pan ku biña no mag kuminsá sino te despues ku solo baha. Konsultá ku outoridatnan lokal pa determiná ki ora solo ta baha den boso área. Ounke lo ta preferibel pa kada kongregashon tene nan propio selebrashon di Memorial, no ta tur biaha esaki ta posibel. Den kaso ku normalmente vários kongregashon ta usa e mesun Salòn di Reino, podisé un òf mas kongregashon por usa un otro fasilidat pa e anochi ei. Kaminda ta posibel, nos ta rekomendá un lapso mínimo di 40 minüt entre e programanan pa asina tur hende por benefisiá plenamente di e okashon ei. Tambe mester tene kuenta ku e asuntu di tráfiko i di parker; esei ta enserá kaminda pa baha pasahero for di outo òf pa rekohé nan. E kuerpo di ansiano mester disidí ki areglonan lo ta mihó lokalmente.

◼ Den Nos Ministerio di Reino di mart lo tin un artíkulo ku lo trata e vidio David A Konfia den Dios. E vidio aki ta disponibel solamente riba e DVD titulá Noe A Kana ku Dios—David A Konfia den Dios. Bo por skohe for di e siguiente ocho idiomanan ku tin riba e DVD aki: aleman, franses, hapones, ingles, italiano, portugues (di Brazil), ruso i spañó. Por hasi pedido di e DVD aki mediante e siguiente pedido di literatura di e kongregashon.