Sigui Pone e Reino Promé
1 No ta fásil pa pone e Reino di Dios na promé lugá den bida i ten’é einan ora nos ta konfrontá preshon ekonómiko òf otro problemanan. Kon nos por sigui pone e Reino na promé lugá ora surgi difikultat? Kiko nos ta hasi si nos haña un trabou ku lo pone nos pèrdè reunion òf ku ta stroba nos sirbishi di fèlt? E ora ei sí e Reino mester bai na di dos lugá?
2 Fe Fuerte Ta Nesesario: Ora nos fe ta ser poné na prueba bou di sirkunstansianan asina, nos no mester lubidá e promesa di Yehova i e garantia di Hesus ku nos lo tin apoyo divino si nos buska e Reino promé. (Sal. 37:25; Mat. 6:31-34) E influensia i preshonnan di mundu lo por nubla nos bista i stroba nos di sigui pone e Reino na promé lugá. Tin hende a laga e posibilidat di haña un posishon mas haltu na trabou òf di haña ganashi finansiero bira e kos prinsipal den nan bida. Sin embargo, meskos ku Pablo, nos tin ku evaluá bon kiko ta loke realmente ta konta den bida.—Fil. 3:7, 8.
3 Nos Tin ku Hasi Ahuste? Un publikadó a bisa: “Mi kurason tabata den mi negoshi, esei tabata mi gran amor. Mi tabata pensa ku mi por ta un Testigu i tòg dediká mayor parti di mi tempu na interesnan di negoshi.” Pero e ruman aki tabatin un sintimentu ta molesti’é: ku e por a hasi mas pa Yehova. Ku tempu, el a stòp ku e negoshi ku tabata un opstákulo pa su progreso spiritual. Una bes el a dediká su mes kompletamente na e obra di Reino, e por a bisa: “Awor mi ta sinti ku den bista di Yehova mi bida ta eksitoso, i esei ta loke realmente ta konta.”
4 Ta digno di elogio ku hopi ruman a legumai nan karera den mundu i e posibilidat pa haña mayor ganashi finansiero, a simplifiká nan bida i drenta e sirbishi di tempu kompleto. Sirbidónan ministerial i ansianonan hóben soltero ku a asistí na e Skol di Entrenamentu Ministerial a hasi esaki, i ta disfrutá di privilegionan maravioso di sirbishi. Nan ta keda masha satisfecho ku e nesesidatnan básiko di bida, imitando asina e ekselente ehèmpel di Pablo.—1 Kor. 11:1; 1 Tim. 6:6-8; Heb. 13:5.
5 Ounke mundu kisas ta hasi bofon dje manera ku nos ta mira bida, nos tin e bendishon di Yehova. (1 Kor. 1:26-31) No ta un animashon pa sa ku lo e usa nos plenamente i lo yuda nos hasi su trabou? Nunka mas nos lo bolbe haña e oportunidat ku nos tin awor aki pa proklamá Dios su Reino establesí. P’esei awor ta e tempu pa sigui pone e Reino na promé lugá den nos bida.