Melito di Sardis—Defensor di Bèrdatnan Bíbliko?

TUR aña kristiannan berdadero ta konmemorá e Sena di Señor riba e fecha ku ta korespondé ku 14 di nisan riba e kalènder hebreo. Di e manera ei nan ta obedesé Hesus su mandamentu: “Hasi esaki na mi rekuerdo.” De echo, ta riba e fecha ei di 14 di nisan di aña 33 di nos era ku Hesus, despues di a selebrá e Pasku hudiu, a instituí e Memorial di su morto komo sakrifisio. Su morto a tuma lugá promé ku e dia ei a terminá.—Lukas 22:19, 20; 1 Korintionan 11:23-28.

Durante siglo 2 di nos era, algun hende a kuminsá kambia e fecha di e konmemorashon i e manera ku tabata ten’é. Na Asia Menor sí nan a sigui usa e fecha riba kua Hesus a muri. Sin embargo, manera un buki di referensia ta indiká, “e kustumber na Roma i Alexandria tabata pa konmemorá, no Hesus su morto, sino su resurekshon riba e siguiente djadumingu,” i nan a yam’é Pasku di Resurekshon. Un grupo konosí komo e kuartodésimonan (e di dieskuaternan) a defendé e konmemorashon di e morto di Hesukristu ku ta kai riba 14 di nisan. Melito di Sardis tabata pensa meskos. Ken Melito tabata? Den ki manera el a defendé e bèrdat bíbliko aki i otronan mas?

Un ‘Gran Iluminadó’

Eusebio di Cesarea a skirbi den su buki Historia Eklesiástiko ku na fin di siglo 2, Políkrates di Efeso a manda un karta Roma pa defendé konmemorashon di “e di dieskuater dia di Pasku segun e Evangelio, sin nunka desviá, sino siguiendo e regla di e fe.” Segun e karta aki, Melito—Obispu di Sardis, na Lidia—tabata un di esnan ku a sostené 14 di nisan komo e fecha ku mester usa pa tene e konmemorashon. E karta a deklará ku e kontemporáneonan di Melito a konsider’é un di e ‘gran iluminadónan ku a muri.’ Políkrates a bisa ku Melito no a kasa i ku el “a biba kompletamente pa Spiritu Santu i ta derá na Sardis en espera di e bishitashon for di shelu ora ku lo e lanta for di morto.” Esaki lo por a nifiká ku Melito tabata entre esnan ku a kere ku e resurekshon lo no a sosodé sino te ora ku Kristu bolbe.—Revelashon 20:1-6.

Pues, ta parse ku Melito mester tabata un hòmber desididu i ku kurashi. De echo, el a skirbi pa e kristiannan un obra literario titulá Defensa, un di e promé defensanan por eskrito, dirigí na Marko Ourelio, kende tabata emperador romano di aña 161 pa 180. Melito no tabatin miedu di defendé kristianismo i denunsiá hòmbernan malbado i golos. E hòmbernan ei tabata trata na haña vários órden di e emperador komo un èksküs pa persiguí e kristiannan i kondená nan inhustamente pa asina nan por a hòrta nan propiedatnan.

Ku kurashi Melito a skirbi e emperador: “Nos ke hasi e solo petishon aki: abo mes eksaminá e outornan di tal konflikto [e kristiannan], i husga ku hustisia si nan ta meresedor di morto i kastigu òf si al kontrario nan ta meresedor di protekshon i di ser lagá na pas. Pero, si e reglamentu i dekreto nobo aki, ku no ta apropiá ni sikiera kontra enemigunan bárbaro, no ta bin di bo, nos ta supliká bo muchu mas ainda pa no pasa nos por haltu siendo ku nos ta sufri plùndermentu ilegal na man di nos persiguidónan.”

Usando e Skritura pa Defendé Kristianismo

Melito a mustra gran interes den e estudio di e Santu Skritura. Nos no tin un lista kompletu di e obranan ku el a skirbi, sin embargo algun di e títulonan ta revelá e interes ku el a mustra den tópikonan bíbliko. Algun di nan ta Tokante Bida Kristian i e Profetanan, Tokante e Fe di Hende, Tokante Kreashon, Tokante Boutismo i Bèrdat i Fe i e Nasementu di Kristu, Tokante Hospitalidat, E Yabi i Tokante e Diabel i e Apokalípsis di Juan.

Melito personalmente a biaha pa paisnan bíbliko pa investigá e kantidat eksakto di e bukinan di e Skritura Hebreo. Relashoná ku esaki el a skirbi: “Di akuerdo ku esei, ora ku mi a bai Oriente i tabata na e lugá kaminda e kosnan aki a ser prediká i praktiká, i despues ku mi a siña e bukinan di e Tèstamènt Bieu ku eksaktitut i a pone riba papel e echonan, mi a manda nan pa bo.” E lista aki no ta menshoná e buki di Nehemias ni Ester, sin embargo entre e obranan skirbí dor di personanan ku a afirmá di ta kristian, e ta e katalòg di mas bieu di e bukinan kanóniko di e Skritura Hebreo.

Durante e investigashon aki, Melito a kompilá un seri di versíkulo tumá for di e Skritura Hebreo ku tabata kontené profesia tokante Hesus. E obra di Melito, titulá Ekstrakto, ta mustra ku Hesus tabata e Mesias tan sperá i ku e Lei di Moisés i e Profetanan a señalá na Kristu.

Defendiendo e Balor di e Reskate

Den e statnan importante di Asia Menor tabatin komunidatnan grandi di hudiu. E hudiunan di Sardis, kaminda Melito tabata biba, a konmemorá e Pasku hebreo riba 14 di nisan. Melito a skirbi un sermon titulá E Pasku ku a mustra ku e Pasku bou di e Lei tabata legítimo i a defendé e konmemorashon kristian di e Sena di Señor riba 14 di nisan.

Despues ku Melito a komentá riba Eksodo kapítulo 12 i a mustra ku e Pasku hebreo a representá e sakrifisio di Kristu, Melito a splika dikon no tabata lógiko pa kristiannan konmemorá e Pasku. E motibu tabata pasobra Dios a abolí e Lei di Moisés. Kaba el a mustra dikon e sakrifisio di Kristu tabata nesesario: Dios a pone Adam den un paradeis di manera ku e por a hiba un bida felis. Pero e promé hende a desobedesé e mandamentu pa no kome for di e palu di konosementu di bon i malu. P’esei a surgi e nesesidat di un reskate.

Melito a sigui splika ku Hesus a ser mandá na tera i a muri riba un staka pa reskatá humanidat kreyente for di piká i morto. Ta interesante pa nota ku Melito a usa e palabra griego xylon, ku ta nifiká “palu,” ora el a skirbi tokante e staka riba kua Hesus a muri.—Echonan 5:30, NW; 10:39, NW; 13:29, NW.

Melito tabata bon konosí pafó di Asia Menor. Tertuliano, Klemente di Alexandria i Orígenes tabata konosé su obranan skirbí. Sin embargo, e historiadó Raniero Cantalamessa a deklará: “E importansia di Melito a kuminsá mengua, lokual progresivamente a hiba na e desaparishon di su obranan skirbí, ora ku—despues di e triunfo di e kustumber di Domingu di Resurekshon—hende a kuminsá konsiderá e kuartodésimonan komo herehe,” es desir, komo personanan ku a bai kontra doktrina di iglesia. Ku tempu, e obranan skirbí di Melito a bai kasi kompletamente pèrdí.

Víktima di Apostasia?

Despues di morto di e apòstelnan, un apostasia predisí a infiltrá den kristianismo berdadero. (Echonan 20:29, 30) Esaki klaramente a afektá Melito. E estilo di skirbi masha elaborá di su obranan literario ta reflehá e estilo di skirbi di filosofia griego i di e mundu romano. Kisas ta p’esei Melito a yama kristianismo “nos filosofia.” Tambe el a konsiderá e integrashon di e asina yamá kristianismo ku e Imperio Romano komo “e prueba di mas grandi . . . di éksito.”

Melito definitivamente no a tuma na pechu e konseho di apòstel Pablo: “Mira pa ni un hende no kohe boso prezu dor di filosofia i engaño bano, segun tradishon di hende, segun e prinsipionan elemental di mundu, i no segun Kristu.” P’esei, ounke Melito a defendé bèrdatnan bíbliko te na sierto grado, den hopi aspekto el a bandoná nan.—Kolosensenan 2:8.

[Plachi na página 18]

Hesus a instituí e Sena di Señor riba 14 di nisan