Pobernan Ta Bira Mas Pober

“Ningun sosiedat por ta berdaderamente próspero ni felis ora e gran mayoria di su miembronan ta pober i den miseria.”

E EKONOMISTA Adam Smith a hasi e deklarashon ei den siglo 18. Hopi hende ta konvensí ku e bèrdat di loke el a bisa ta asta mas bisto awe. E kontraste entre riku ku pober a bira mas skèrpi ainda. Na Filipina, un tersera parti di e poblashon ta biba ku ménos di 1 dòler pa dia, un montante ku hopi hende den paisnan mas riku ta gana pa minüt. E Informe di Desaroyo Humano di 2002 di Nashonnan Uní ta bisa ku “e 5% di hende mas riku na mundu ta gana 114 biaha mas tantu ku e 5% di esnan mas pober.”

Miéntras algun hende ta biba basta kómodo, miónes di hende ta biba den kròt ku nan ta traha ‘unda ku ta’ riba tereno ku nan a kohe sin pèrmit. Otronan ta mas mal pará ainda pasobra nan ta biba riba kaya. Kisas tur loke nan tin ta djis un pida karton òf plèstik pa drumi ariba. Hopi di nan ta pasa basta trabou pa saka nan dia dor di hasi tur sorto di kos, manera kana buska artíkulo di uso den landfill, karga kos pisá, kore ku garoshi kolektá ophetonan pa risaikel.

No ta den paisnan den desaroyo so bo por haña desigualdat entre riku ku pober sino, manera Banko Mundial ta bisa, “den tur pais ta eksistí ‘zonanan di pobresa.’” For di Bangladesh te Merka, pa kon bon pará algun hende por ta, hopi tin ku lucha pa nan tin sufisiente pa kome òf pa tin un dak riba nan kabes. The New York Times a sita un informe di Departamentu di Senso Merikano di 2001 ku ta indiká ku e brecha entre riku ku pober na Merka a sigui krese. El a bisa: “Un di kada sinku hende mas riku dje poblashon a risibí mitar di tur entrada doméstiko aña pasá . . . Un di kada sinku hende mas pober a risibí 3,5 porshento.” E situashon ta meskos òf pió den masha hopi otro pais. Un informe di Banko Mundial a mustra ku mas o ménos 57 porshento di poblashon di mundu ta biba ku ménos di 2 dòler pa dia.

Pa kolmo, na 2002, informe di ehekutivonan ku a enrikesé nan mes bou di sirkunstansianan kuestionabel a molestiá miónes di hende. Asta si nada abiertamente ilegal no a tuma lugá, hopi a haña ku e ehekutivonan aki, manera e revista Fortune a deklará, “a bira sumamente, ekstraordinariamente i askerosamente riku.” Den e konteksto di loke ta pasando na mundu, tin hende ta puntra nan mes kon bo por hustifiká ku algun persona ta haña asina tantu plaka—miónes i miónes di dòler—miéntras ku masha hopi hende ta biba den pobresa.

Pobresa T’ei pa Keda?

Esaki no ta nifiká ku niun hende no ta hasi nada tokante e kondishon miserabel di hende pober. Funshonarionan di gobièrnu ku tin bon intenshon i organisashonnan ku ta duna yudansa sigur a bini ku proposishonnan pa trese kambio. No opstante, e echonan no ta duna motibu pa optimismo. E Informe di Desaroyo Humano di 2002 ta bisa ku apesar di hopi esfuerso noble pa trese mehoransa “hopi pais ta mas pober ku 10, 20 i den algun kaso, 30 aña pasá.”

Esaki ta nifiká ku no tin speransa pa hende pober? Nos ta invitá bo pa bo lesa e siguiente artíkulo pa konsiderá algun konseho sabí i práktiko ku por ta útil for di awor i tambe solushonnan ku kisas bo no a pensa mes ariba.