“Kico Ta ‘Cushi’ na Francia?”

“Libertad, kerido libertad” ta palabranan di “La Marseillaise,” e himno nacional di Francia. Sin duda, libertad ta algu cu hende mester balorá. Sin embargo, sucesonan recien na Francia ta pone hende cuminsá preocupá cu libertadnan básico ta ser kitá. Ta p’esei, diabierne 3 di november 2000, dies di miles di Testigo di Jehova a distribuí un total di 12 miyon ehemplar di un tratado special cu e título “Kico Ta ‘Cushi’ na Francia? Libertad Por Bini Bek?”

PA VÁRIOS aña caba, Testigonan di Jehova na Francia ta ser atacá dor di vários político i grupo antisecta. Esaki a trece problema pa e Testigonan na nivel personal, di congregacion i nacional. Sin embargo, dia 23 di juni 2000, Conseil d’État, e corte administrativo di mas haltu na Francia, a dicta un fayo histórico cu a confirmá loke 31 corte mas abou a dicta den mas cu 1.100 caso. Corte supremo a confirmá cu e adoracion cu Testigonan di Jehova ta practicá ta completamente na armonia cu ley di Francia i cu nan Salonnan di Reino mester haña e mésun exoneracionnan fiscal cu a otorgá na otro religionnan.

Sin embargo, ignorando e sentencia aki completamente, Ministerio di Finansa di Francia ta sigui nenga di duna Testigonan di Jehova exoneracion di belasting manera ley ta prescribí pa organisacionnan religioso. E ministerio a imponé un belasting di 60 porciento riba contribucionnan hací dor di Testigonan i nan amigunan cu ta asociá cu e 1.500 congregacionnan local na Francia. Actualmente e caso aki ta den proceso legal.

E meta di e campaña mencioná anteriormente tabata pa exponé e contradiccion aki i enfatisá e riesgonan cu tal manera arbitrario di cobra belasting i proposicionnan di ley pa kita libertad religioso, ta trece cuné pa tur hende.a

Un Dia Largu

Dos or di mardugá, Testigonan di algun congregacion ta cuminsá distribuí e tratado pafó di stacionnan di trein, na fábricanan i despues na aeropuertonan. Bida ta cuminsá seis or na Paris. Rond di 6.000 boluntario ta posicioná na lugánan stratégico pa topa cu esnan cu ta na caminda pa trabou. Un señora hóben ta comentá: “Loke boso ta haci pa libertad di religion ta bon. No ta Testigonan di Jehova so ta enbolbí.” Na Marseilles, mas cu 350 Testigo ta parti e tratado na stacionnan di metro i riba caya. Denter di un ora, radio nacional ta anunciá e campaña, i ta bisa su oyentenan pa nan no keda sorprendí si Testigonan di Jehova acercá nan. Na Strasbourg, sede di Corte Europeo di Derechonan Humano, e pasaheronan n’e stacion principal ta para cu pacenshi den rij pa ricibí nan ehemplar. Segun un abogado, aunke e no ta compartí nos conviccionnan, e ta sigui nos caso cu interes, ya cu nos lucha ta unu importante i hustu.

Och’or, apesar di awaceru pisá, 507 Testigo den e stad alpino di Grenoble ta laga e tratado cerca tur hende riba caya of ta pone esaki den brievenbus. Mirando cu algu straño ta sosodiendo, shofernan di auto i tram ta para nan vehículo pa pidi un tratado. E pasaheronan cu ta yega e stad occidental Poitiers nueb’or ya caba a ricibí un tratado na nan punto di salida. Na Mulhouse, cerca e frontera aleman, nan a parti 40.000 copia caba.

Pa dies or, hopi congregacion a distribuí mas cu mitar di nan tratadonan. Segun e mainta ta transcurí, masha poco hende ta rechasá e tratado, i un cantidad di combersacion interesante a surgi. Na Besançon, djis algu mas cu 80 kilometer for di frontera suiso, un yoncuman ta mustra interes den Bijbel i ta puntra pakico Dios ta permití sufrimentu. E Testigo ta invit’é pa nan sigui cu e combersacion na e Salon di Reino den cercania, unda nan a cuminsá mesora cu un studio di Bijbel den e foyeto Kico Dios Ta Rekerí di Nos?

Merdia, hopi Testigo ta usa nan pausa pa predicá un of dos ora. E distribucion ta sigui henter atardi, i pa tres or of cuat’or vários congregacion ta caba cu nan tratadonan. Algun hende n’e capital di shampaña, Reims, cu a yega di studia of asociá cu Testigonan di Jehova den pasado ta expresá nan deseo pa reanudá nan contacto cu e congregacion. Na Bordeaux nan ta cuminsá tres studio di Bijbel. Den e mésun stad, un Testigo ta drenta un tienda pa cumpra un korant i ta mira un stapel di tratado riba bali. E doño dje tienda, un ex-Testigo, a ricibí e tratado i mirando su importancia, el a traha fotocopia p’e mes parti.

Un señora protestant na Le Havre, Normandy, a keda di shok ora el a tende na radio cu gobiernu ta cobra belasting riba e contribucionnan cu Testigonan di Jehova ta ricibí. Cu entusiasmo e ta aceptá e tratado i ta felicitá e Testigonan p’e echo cu nan ta expresá nan mes cu curashi contra e inhusticia ei. Binti pasá di shete djanochi, noticia regional di television na Lyons ta comentá riba e distribucion di tratado i ta bisa: “Awe mainta tabata mas fácil pa sconde p’e gotanan di awaceru cu evitá e tratadonan di Testigonan di Jehova.” Nan ta entrevistá dos Testigo i esakinan ta splica e motibunan di e campaña.

Testigonan cu kier a participá den e distribucion despues di nan trabou seglar ta laga e tratado cerca hende cu ta sali for di trabou pa bai cas i tambe den brievenbus. Den pueblonan manera Brest i Limoges—famoso pa su porcelana—hendenan cu ta sali di cine 11:00 p.m. ta entre e último hendenan e dia ei cu ta ricibí e tratado. Ta colectá e tratadonan cu a sobra i ta distribuí nan e siguiente mainta.

E Resultadonan

Un Testigo a skirbi: “Nos adversarionan ta pensa cu nan ta debilitá nos. Pero eigenlijk, ta lo contrario ta tumando lugá.” Den mayoria congregacion, e dia ei mas cu 75 porciento dje Testigonan a participá den e actividad aki, i algun pa 10, 12 of 14 ora. Na Hem, den nort di Francia, despues cu un Testigo a baha for di un warda djanochi, el a distribuí tratado for di cinc’or di mainta te cu tres or di atardi. Na Denain cu ta keda den cercania i cu desde 1906 tabatin un congregacion, 75 Testigo a dedicá 200 ora na distribucion dje tratado riba diabierne. Tabatin otronan cu apesar di edad, malesa i mal weer tambe tabata decididu pa participá. Por ehempel, na Le Mans tabatin tres ruman muher den nan 80 i picu aña cu a pasa dos ora ta pone tratado den brievenbus, i un Testigo den un rolstoel a parti tratado dilanti un stacion di trein. I tabata un animacion pa mira un cantidad di Testigo cu anteriormente tabata inactivo, tuma parti den e actividad special aki!

Sin duda e distribucion aki a resultá den un gran testimonio. Hende di tur rango social—hopi di nan cu casi nunca no sa ta na cas—a haña un ehemplar dje tratado. Vários persona ta pensa cu e accion aki a logra hopi mas cu protehá interes di e Testigonan. Hopi di nan a considerá e accion aki como un defensa di libertad di concenshi i di adoracion pa tur hende na Francia. Evidencia di esaki ta e echo cu e hendenan tabata pidi tratado extra pa duna nan amigu, colega i famianan.

Sí, Testigonan di Jehova na Francia ta orguyoso di por a haci Jehova su nomber conocí i defendé e interesnan di Reino. (1 Pedro 3:15) Nan deseo sincero ta cu nan “por sigui hiba un bida calmu i ketu cu pleno debocion na Dios i seriedad” i cu miles di hende mas lo djoin nan den alabá nan Tata celestial, Jehova.—1 Timoteo 2:2.

[Nota]