Bon Nobo di Pas Ta Yega den Cerunan di Chiapas

“Den e pió masacre na Estado Chiapas cu ken-cu-ta por corda, 45 campesino indefenso, incluso 13 mucha, a ser asesiná dor di un grupo di homber . . . armá.” Asina e korant “El Universal” a informá tocante loke a sosodé na Acteal, Estado Chiapas, dia 22 di december 1997.

CHIAPAS ta e estado mas na zuid di México, na frontera cu Guatemala. Cu un historia largu di pobresa i necesidad, un grupo indígena di indjan maya a organisá un lantamentu armá na januari 1994 bou di nomber di Ehército Zapatista di Liberacion Nacional (EZLN). Negociacionnan pa haña un solucion pacífico tabata bai poco-poco. Invasion i atake, tantu di rebeldenan como di soldánan di gobiernu, a trece dramamentu di sanger i morto. E disturbionan a pone cu hopi campesino dje área a hui for dje peliger.

Meimei di un situacion insigur asina, tin un grupo di stimadónan di pas cu a permanecé neutral pa cu e lucha político. Celosamente nan ta dirigí atencion na e Reino di Dios como e único speransa pa resolvé e problemanan cu hende ta confrontá, tantu localmente como rond mundu. (Daniel 2:44) Ken nan ta? Testigonan di Jehova. Obedeciendo e ordu di Jesus, nan ta haci esfuerso pa hiba e bon nobo dje Reino di Dios te na e partinan mas isolá den cerunan di Chiapas. (Mateo 24:14) Con tabata pa predicá bou di circunstancianan asina, i kico tabata e resultado?

“Mi Ta un Testigo di Jehova”

Adolfo, un hóben cu a caba di bira un publicadó di Reino, tabata traha un dia na un stacion di radio na Ocosingo. Di ripiente el a tende un batimentu duru na porta. Un grupo di homber cabes tapá a bula drenta, i mik nan armanan riba su cabes. Nan a core drenta e kamber di transmision i a tuma control dje ekipo, i a anunciá via radio cu nan a declará guera contra gobiernu.

Despues, e hombernan armá a manda Adolfo djoin nan movementu. Maske e no a bautisá ainda, el a respondé: “Mi ta un Testigo di Jehova.” El a splica nan cu e único speransa pa pas ta e Reino di Dios, i el a nenga firmemente di tuma e uniform cu e scopet cu nan kier a dun’é. Mirando su posicion firme, nan a lagu’é bai. Cordando e incidente, Adolfo ta bisa: “E suceso ei a fortalecé mi fe mashá.”

Cu tempu e situacion a stabilisá, pero ainda e área tabata bou di control militar. Apesar di esei, Adolfo gustosamente a aceptá e invitacion dje ancianonan di e congregacion local p’e traha cu un grupo isolá di cristian den e área. Na e puntonan di control caminda e mester a pasa, e soldánan a mustra respet p’e ora el a identificá su mes como un Testigo di Jehova. Despues el a bautisá, i e tabatin e satisfaccion di yuda e grupo isolá ei bira un congregacion di Testigonan di Jehova. Adolfo a declará: “Awor cu mi a bautisá, mi por bisa cu tur conviccion cu mi ta un Testigo di Jehova!”

“Jehova A Fortalecé Nos”

Poco tempu despues cu EZLN a declará guera contra gobiernu via radio, e hendenan dje pueblo a hui bai. Francisco, un minister di tempu completo, esta un pionero, a splica con Jehova a fortalecé e cu su casá pa loke nan mester a pasa aden.

“Nos a dicidí pa refugiá den un área cu tabata keda tres ora leu na pia. Tabatin un congregacion einan, di manera cu nos lo por tabata cerca e rumannan. Pronto a yega tempu pa tene nos asamblea di circuito na Palenque. Ami cu mi casá no kier a perde e reunion special cu e pioneronan, pero nos a haña sa cu EZLN a blokea e caminda pa bai e asamblea. Nos a dicidí di bai via mondi, loke a tuma nos nuebe ora. Nos a yega na tempu pa asistí na e reunion di pionero, i nos a gosa di dje masha hopi, mescos cu di sobrá dje programa di asamblea.

Ora nos a bolbe cas, nos a bin haña cu nan a kima nos cas i horta nos bestianan. Tur loke a sobra tabata un sacu chikitu cu paña. E pérdida aki a haci nos tristu, pero e rumannan na Ocosingo bondadosamente a laga nos keda na nan cas. Ademas, nan a siña nos cosnan cu como cunukero nos no a yega di haci nunca. Un ruman a siña mi saca potret, i un otro a siña mi drecha sapatu. Asina ami cu mi casá a logra sostené nos mes te awor, sin tabatin cu stop di sirbi como pionero. Refleccionando riba loke a pasa, nos por mira con, apesar cu no tabata fácil pa nos wanta, Jehova a fortalecé nos.”

Fruta dje Trabou di Predicá

E Testigonan na Estado Chiapas no a permití dificultad i peliger stroba nan di tuma parti den un esfuerso special pa hiba e bon nobo na e hendenan den nan área. Por ehempel, na april cu mei 1995 nan a uni cu nan compañeronan cristian rond mundu den un campaña pa distribuí Noticia di Reino Num. 34, cu e tema asina apropiado: Di Con Bida Ta Asina Yen di Problema?

Durante e campaña—na un lugá cu yama Pueblo Nuevo—Ciro, un pionero regular, a topa un famia cu a mustra interes. Ora el a bai bek cerca nan tres dia despues, el a logra cuminsá un studio di Bijbel cu nan. Pero ora Ciro cu un compañero a bolbe bek pa sigui studia cu e famia, e homber cabes di cas no tabat’ei. Mas bien, tabatin un grupo di homber cabes tapá ta warda riba e homber pa hacié daño. Nan a puntra Ciro cu su compañero ta kico nan a bin haci i a menasá di mata nan. Despues di haci oracion na Jehova den silencio, e dos cristiannan a splica cu curashi cu nan a bini pa siña e famia tocante Bijbel. Ora nan a tende esei e hombernan cabes tapá a laga nan bai. Pa un of otro motibu, e cabes di cas no a bini cas henter e dia ei.

Un dia, casi tres aña despues, Ciro a keda sorprendí di haña e homber na su porta. Esta felis Ciro a keda ora el a haña sa cu henter e famia a bautisá i cu awor nan tabata forma parti di un congregacion na Guatemala! Un dje yu muhernan tabata asta sirbi como pionero regular.

Aprecio pa Alimento Spiritual

Apesar cu ta sigui tin problema na Chiapas, un superintendente di distrito ta informá cu e Testigonan den e área ei di berdad ta mira e importancia di reuní huntu. (Hebreonan 10:24, 25) E ta relatá loke a sosodé na un dia special di asamblea reciente cu tabata programá pa cuminsá mainta trempan, pa asina tur esnan cu asistí por a bai cas bek den lus di dia, ora cu ta un poco ménos peligroso. Apesar cu mayoria di nan mester a cana mas cu tres ora dor di mondi pa nan yega e lugá caminda a tene e asamblea, tur hende tabata sintá shet’or di mainta. Tabatin seis miembro dje grupo EZLN den auditorio ta scucha i bati man. Parce cu nan tabata disfrutá dje programa. Nan tambe a cana tres ora pa asistí na e asamblea. Binti di nan tambe a bini e Conmemoracion dje morto di Cristo den un Salon di Reino local.

Un otro hóben den e movementu di gueriya a ser asigná dor di su superiornan pa e patruyá un cierto área di mondi. Ora el a yega n’e pueblo ei, el a haña cu tur e habitantenan, di cua mayoria tabata Testigo di Jehova, a hui bai. Pues, el a establecé su mes den un dje casnan bandoná. Ya cu e no tabatin masha cos di haci, el a coge un par di buki cu el a haña den e cas, anto a cuminsá lesa. A resultá cu nan tabata publicacionnan di Watch Tower cu e Testigonan a laga atras. Den su soledad, e hóben tabatin tempu pa meditá riba loke el a lesa. El a dicidí cu e mester a cambia su bida i renunciá arma. El a busca e Testigonan mas pronto posibel i a cuminsá studia Bijbel. Den seis luna, e tabata siña otronan tocante e bon nobo. Awor e i tres otro miembro di su famia cu ántes tabata simpatisá cu e gueriya, ta cristiannan bautisá.

Mira un Banda Positivo

Maske e conflicto a nificá hopi dificultad, de echo e tabatin un influencia positivo riba e actitud di hende tocante e trabou di predicá. Un anciano den e stad net caminda e lucha a cuminsá, ta relatá: “Un cincu dia despues cu e bringamentu a start, nos a organisá e trabou di predicacion tantu den e stad como pafó. E hendenan tabata ansioso pa scucha nos. Nos a laga masha hopi literatura bíblico, i nos a cuminsá vários studio di Bijbel. Den un área, ántes hopi hende tabata oponé e berdad; pero dor dje bringamentu, awor nan ta scucha, nan ta studia Bijbel i asistí na reunion i asambleanan.”

E rumannan ta contentu cu nan por a sigui cu nan actividadnan teocrático apesar di e condicionnan asina instabil. Nan ta sigui tene nan asambleanan cu ta fortalecé nan spiritualmente, i tantu e ehército di gobiernu como EZLN ta na altura. Bishitanan di superintendentenan biahero tambe tabata un estímulo poderoso pa nan a sigui den e trabou di predicá. Interesantemente, nan ta haña animacion asta di esnan cu ta enbolbí den e confrontacion, kendenan hopi bes ta urgi e Testigonan pa nan sigui cu nan trabou di predicá.

Maske e prueba i dificultadnan cu e hendenan di Chiapas mester soportá a baha un poco, nan no a caba. Tog, un cos ta sigur: Testigonan di Jehova ta determiná pa sigui sin baha man den nan esfuerso pa hiba na hende e bon nobo di pas for dje Palabra di Dios, Bijbel. (Echonan 10:34-36; Efesionan 6:15) Nan ta reconocé, mescos cu profeta Jeremías, cu “e caminda di hende terenal no ta pertenecé na dje. No ta pertenecé na hende cu ta cana ni sikiera pa dirigí su paso.” (Jeremías 10:23) Ta solamente e Reino di Dios den man di su Yu Jesucristo, por trece e solucion pa e inhusticia i pobresa cu tin na mundu.—Mateo 6:10.

[Mapa na página 9]

(Pa e teksto den su formato kompleto, wak e publikashon)

Golfo di México

CHIAPAS

GUATEMALA

Océano Pacífico

[Rekonosementu]

Mountain High Maps® Copyright © 1997 Digital Wisdom, Inc.

[Plachi na página 9]

Testigonan bayendo den e ministerio den e cerunan di Chiapas