Bijbel Por Yuda Nos Awe?

“SI TUMA Bijbel den su totalidad, rond di 1 porciento ta bale la pena lesa, pero e resto ta irelevante i anticuá.” Asina un yoncuman a bisa. Hopi hende lo ta di acuerdo cuné. Aunke Bijbel ta ketu bai un dje bukinan mas bendí rond mundu, miyones di hende casi no ta haci caso di dje i no conocé su siñansanan.

Den su edicion di Pascu di 1996, e korant aleman Süddeutsche Zeitung a comentá cu Bijbel “tin cada bes ménos lector. Den e era di ciencia natural i di un mundu mas i mas seglar, hopi hende ta haña e relatonan di Bijbel straño i difícil pa comprendé.” Encuestanan ta confirmá e informe aki. Algun estudio ta revelá cu un gran cantidad di mucha no sa mes ken Jesus ta exactamente. Den un encuesta, ménos cu mitar dje hendenan entrevistá por a relatá e historianan bíblico dje yu perdí i e bon samaritano.

E publicacion Reformiertes Forum di Iglesia Evangélico Suiso ta declará cu na Suisa e demanda pa Bijbel no ta loke e sa ta. Asta entre esnan cu tin un ehemplar di Bijbel, hopi bes e ta para coge stof riba reki. Na Gran Bretania e situacion no ta muchu diferente. Segun un encuesta, aunke masha hopi hende tin un Bijbel, e gran mayoria apénas a yega di les’é.

Di otro banda, miyones di hende rond mundu tin un otro opinion tocante Bijbel. Nan ta mir’é como e Palabra di Dios i ta hañ’é balioso i beneficioso. P’esei, nan ta les’é regularmente. Un señora yong a skirbi: “Mi ta purba lesa un of dos capítulo di Bijbel tur dia. Mi ta gusta esei mashá.” Hende asina ta tuma bon nota di loke Bijbel ta siña, i nan ta purba aplicá su conseho den nan bida. Nan ta convencí cu Bijbel por yuda nan den e mundu turbulento djawe.

Kico ta bo opinion? Bijbel ta irelevante den e tempu moderno aki? Of e ta balioso i beneficioso? Bijbel por yuda nos awe?