Un Buki Cu Mayoria Hóben No Ta Interesá Aden

“CON mi por sa si Bijbel realmente ta e Palabra di Dios? Como buki, e no ta interesá mi,” un mucha muher cu yama Beate a bisa.

Na Alemania, caminda Beate ta biba, mayoria hóben ta pensa mescos cuné; p’esei, nan no ta duna muchu importancia na lesa Bijbel. Un encuesta recien hací einan a revelá cu rond di 1 porciento di hóben ta lesa Bijbel masha hopi bes, 2 porciento hopi bes, 19 porciento masha poco, i casi 80 porciento nunca mes. Probablemente e estadísticanan ta mescos den otro pais, tal bes caminda abo ta biba tambe. Ta bisto anto cu Bijbel ta un buki cu mayoria hóben no ta interesá aden.

Nada straño anto cu, por lo general, e generacion mas hóben sa masha poco tocante Bijbel! Na cuminsamentu di aña 2000, e korant Lausitzer Rundschau a duna un reportahe riba un encuesta cu a revelá cuantu hende conocé e Dies Mandamentu i ta usa nan como guia den bida. Dje generacion di riba 60 aña, 67 porciento conocé e mandamentunan i ta mira esakinan como un guia pa nan; pa esnan bou di 30 aña, e cifra ta apénas 28 porciento. Sí, pa hopi hóben, e Palabra di Dios ta un materia desconocí.

Algun Tin Otro Opinion

Di otro banda, rond mundu, tin miyones di hóben cu sí ta haña cu e Palabra di Dios ta sumamente balioso. Por ehempel, Alexander tin 19 aña di edad i ta lesa Bijbel tur mainta promé cu e bai trabou. “Mi no por imaginá un mihó manera pa cuminsá e dia,” e ta remarcá. Sandra tin e custumber di lesa un parti di Bijbel tur anochi. “Esei a bira parti di mi rutina diario,” e ta splica. I Julia, cu tin 13 aña di edad, ya caba a desaroyá un patronchi di lesa por lo ménos un capítulo di Bijbel promé cu e bai drumi anochi. “Mi gusta mashá, i mi kier sigui cu e custumber ei den futuro.”

Cua punto di bista ta corecto i sabí? Bijbel ta ègt bale la pena pa lesa? E ta balioso i importante p’e generacion mas hóben? Kico abo ta pensa?