Namibia Tin Piedra Precioso Bibu!

NAMIBIA ta extendé casi 1.500 kilometer a lo largu dje costa zuidwest di Africa. Henter e pais su costa ta consistí di duin di santu, ceritu yen di baranca i yanuranan inmenso di greis. Namibia tin playanan cu na lugá di santu tin piedra chikitu. Entre e piedranan aki tin piedra precioso di tur color cu bo por imaginá. De bes en cuando hende sa haña asta diamanta entre nan. Pero e pais tin algu hopi mas precioso cu e piedranan aki. Namibia tin piedra precioso bibu, esta, e hendenan dje hopi gruponan nacional.

E promé-promé habitantenan di Namibia a papia vários idioma famia di otro cu yama khoisan. Nan abla tabata conocí pa e zonido ‘klik’ cu nan ta haci. Entre e pueblonan cu ta papia khoisan awe tin e damara di color scur, e hendenan color cla di estatura chikitu cu yama nama i e famoso yagdónan bushman. Den siglonan mas recien, hopi tribu pretu tambe a bin biba na Namibia. Esakinan ta cai bou di tres grupo nacional principal: ovambo (e grupo étnico mas grandi na Namibia), herero i kavango. Durante siglo 19 e europeonan a cuminsá establecé nan mes na Namibia. Despues cu a descubrí diamanta den e desierto di santu, mas imigrante a bini.

E habitantenan di Namibia ta precioso pasobra nan ta parti dje mundu di humanidad pa cua Dios a duna su Yu, habriendo asina e caminda pa bida eterno. (Juan 3:16) Ya caba cientos di namibio di hopi tribu a reaccioná faborabel riba e mensahe di salbacion. Por compará e hendenan aki cu piedra precioso bibu, pasobra nan ta entre “e cosnan deseabel di tur e nacionnan” cu awor ta ser reuní na Jehova su cas di adoracion.—Ageo 2:7.

Ta Cuminsá Traha den e Mina Spiritual

Tabata na aña 1928 cu a cuminsá extraé e piedranan precioso spiritual di Namibia. Durante e aña ei e sucursal di Sur Africa di Sociedad Watch Tower a manda via post 50.000 publicacion bíblico pa hende plamá den henter e pais. E siguiente aña Lenie Theron, un ruman muher cristian ungí di Sur Africa, a rebishitá e personanan cu a mustra interes. Den cuater luna el a pasa dor di henter e pais su so, lagando mas cu 6.000 publicacion pa yuda studia Bijbel na idioma afrikaans, ingles i aleman. Tur e trabou aki sigur no tabata por nada.

Por ehempel, tuma Bernard Baade, un minero aleman. Na 1929 el a ricibí un caha di webu for di un cunukero cu a lora cada webu den un página di un publicacion di Watch Tower. Bernard a lesa cada página ansiosamente, puntrando su mes ta ken a skirbi e buki. Por fin el a yega na e último página, cu a duna un adres aleman di Sociedad Watch Tower. Bernard a manda pidi mas literatura i a bira e promé namibio cu a tuma su posicion na banda dje berdad.

Trahadónan di Tempu Completo Ta Yega

Na 1950, cuater misionero entrená na e Scol Bíblico di Galad di Watchtower a yega Namibia. Pa 1953, e cantidad di misionero a bira ocho. Entre nan tabatin Dick i Coralie Waldron, un pareha di Australia, kendenan ta sirbi fielmente aki ainda. Tambe hopi otro proclamadó di Reino di tempu completo di Sur Africa i di exterior a participá den extraé e piedranan precioso spiritual di Namibia. A manda otro misioneronan, i tambe graduadonan dje Scol di Entrenamentu Ministerial, na Namibia.

Un otro factor cu a contribuí n’e crecementu spiritual na Namibia ta e traduccion i publicacion di literatura bíblico den e idiomanan local principal, manera herero, kwangali, kwanyama, nama/damara i ndonga. Desde 1990 tin un bunita oficina di traduccion i un cas pa boluntarionan di tempu completo na e capital, Windhoek. Karen Deppisch, kende a traha den e trabou di evangelisá di tempu completo huntu cu su casá na vários parti di Namibia, ta bisa: “Hopi hende ta keda asombrá ora nos ofrecé nan literatura den nan mes idioma, foral ora tin masha tiki buki mes den e idioma ei.”

Ta Pòlish e Piedranan Precioso

Atrabes di miles di aña, e movementu di ola i santu a pòlish algun dje piedranan precioso literal di Namibia. Pero claro cu e procesonan natural ei no ta producí piedra precioso bibu. Ta rekerí esfuerso pa hende imperfecto “kita e personalidad bieu” i bisti un personalidad nobo semehante na esun di Cristo. (Efesionan 4:20-24) Por ehempel, venerá antepasado ta un tradicion fuerte entre e hopi tribunan di Namibia. Hopi bes miembronan di famia i bisiña ta persiguí esnan cu no ta efectuá actonan di adoracion di antepasado. Ora personanan siña for di Bijbel cu e mortonan “no ta conciente di nada en absoluto,” nan ta haña nan cu un prueba. (Eclesiástes 9:5) Den ki manera?

Un Testigo dje tribu herero ta splica: “Tabata un desafio grandi pa obedecé e berdad. Mi a aceptá un studio di Bijbel cu Testigonan di Jehova, pero a tuma tempu pa mi aplicá e cosnan cu mi tabata siña. Promé, mi tabatin cu verificá si ta safe pa mi keda sin practicá creencianan tradicional. Por ehempel, mi tabata core pasa cu auto dilanti cierto lugánan na Namibia sin stop pa pone un piedra riba un graf of sin hisa mi sombré pa cumindá e mortonan. Poco-poco, mi a bira convencí cu nada no ta pasa cu mi si mi stop di adorá e antepasadonan morto. Mi ta masha contentu mes cu Jehova a bendicioná mi esfuersonan pa yuda mi famia i otro personanan interesá siña conocé e berdad!”

Tin Mester di Minero Spiritual

Promé cu yegada dje misioneronan na 1950, tabatin un solo publicadó dje bon nobo na Namibia. E cantidad a aumentá constantemente te na un máximo di 995. Sin embargo, ainda tin hopi trabou pa haci. De facto, tin regionnan cu apénas a mishi cu nan. Abo ta den posicion pa sirbi caminda tin gran necesidad di proclamadónan di Reino celoso? Si ta asina, por fabor, bini Namibia i yuda nos haña i pòlish mas piedra precioso spiritual.—Compará cu Echonan 16:9.

[Map/​Plachinan na página 26]

(Pa e teksto den su formato kompleto, wak e publikashon)

AFRICA

NAMIBIA

[Plachinan]

Namibia ta un pais di piedra precioso bunita

[Rekonosementu]

Mapanan: Mountain High Maps® Copyright © 1997 Digital Wisdom, Inc.; Diamantanan: Cortesia di Namdek Diamond Corporation

[Plachi na página 26]

Ta predicá e bon nobo na tur e gruponan étnico di Namibia

[Plachi na página 28]

Abo por bai sirbi caminda tin mas mester di proclamadó di Reino?