Bo Ta Corda?

Bo a apreciá di por a lesa e edicionnan recien di E Toren di Vigilancia? Wel, wak si bo por contestá e siguiente preguntanan:

◻ Di con e expresion di Pablo “embahador substituto pa Cristo” ta unu apropiado pa cristiannan ungí? (2 Corintionan 5:20)

Den tempu antiguo, tabata despachá embahadornan principalmente durante periodo di hostilidad pa mira si por a evitá guera. (Lucas 14:31, 32) Ya cu e mundu pecaminoso di humanidad ta alehá for di Dios, el a manda su embahadornan ungí pa informá hende di su condicionnan pa reconciliá cuné, urgiendo nan pa haci pas cu Dios.—15/12, página 18.

◻ Cua ta e cuater cosnan cu a fortalecé Abraham su fe?

Di promé, el a demostrá su fe den Jehova dor di haci caso ora Dios a papia (Hebreonan 11:8); di dos, su fe tabata estrechamente relacioná su cu speransa (Romanonan 4:18); di tres, hopi bes Abraham a papia cu Jehova; i di cuater, Jehova a duna Abraham apoyo ora el a sigui guia di Dios. E mésun cosnan por fortalecé nos fe awe. —1/1, página 17, 18.

◻ Kico e expresion “No hinca nos den tentacion” ta nificá? (Mateo 6:13)

Nos ta pidiendo Dios pa no laga nos faya ora nos haña tentacion pa desobedec’é. Jehova por guia nos pa nos no sucumbí i pa Satanas, “e malbado,” no pone nos peca. (1 Corintionan 10:13)—15/1, página 14.

◻ Kico un persona tin cu haci pa Dios pordon’é pa su malecho?

Confesion na Dios mester ta compañá cu repentimentu i “frutanan cu ta pas cu repentimentu.” (Lucas 3:8) Un spiritu repentí i un deseo pa corigí e malu tambe lo impulsá un persona pa busca yudansa spiritual di anciano cristian. (Santiago 5:13-15)—15/1, página 19.

◻ Pakico nos mester haci esfuerso pa ta humilde?

Un persona humilde tin gran pacenshi, i e no ta pensa cu e ta masha cos. Humildad ta atraé berdadero amigu cu ta stima bo. Mas cu esei, e ta trece Jehova su bendicion. (Proverbionan 22:4)—1/2, página 7.

◻ Kico ta un diferencia crucial entre e morto di Jesus i esun di Adam?

Adam su morto tabata merecí pasobra el a desobedecé su Creador deliberadamente. (Génesis 2:16, 17) Na contraste, Jesus su morto tabata totalmente inmerecí pasobra “e no a cometé picá.” (1 Pedro 2:22) P’esei, ora Jesus a muri e tabatin algu di inmenso balor cu e pecadó Adam no tabata poseé ora el a muri, esta, e derecho riba bida humano perfecto. Pues, Jesus su morto tabatin un balor sacrificial pa rescatá humanidad.—15/2, página 15, 16.

◻ Kico e stad den e vision profético di Ezekiel ta prefigurá?

Ya cu e stad ta keda meimei di tera profano (no-sagrado), e mester ta algu terenal. P’esei, e stad ta parce di prefigurá e administracion terenal cu ta beneficiá tur esnan cu lo componé e sociedad terenal hustu.—1/3, página 18.

◻ Di con Jesus a laba pia di su disipelnan n’e celebracion di Pascu na 33 E.C.?

Jesus no tabata instituyendo un rito di labamentu di pia. Mas bien, el a yuda su disipelnan adoptá un otro actitud, unu humilde i dispuesto pa cumpli cu e tareanan di mas humilde na fabor di nan rumannan.—1/3, página 30.

◻ Ora nos ta siña otronan, kico ta mas importante cu abilidad natural?

Eseinan ta e cualidadnan cu nos ta poseé i e hábitonan spiritual cu nos a cultivá pa studiantenan por imitá. (Lucas 6:40; 2 Pedro 3:11)—15/3, página 11, 12.

◻ Con oradornan público por mehorá nan abilidad di lesa Bijbel?

Cu práctica. Sí, dor di lesa na bos haltu bes tras bes te ora cu bo alcansá afluencia. Si tin caset di Bijbel disponibel den bo idioma, ta sabí pa presta atencion na e lesadó su énfasis i su modulacion, i nota con e ta pronunciá nomber i palabra straño.—15/3, página 20.

◻ Con un hende su ‘spiritu ta bolbe cerca Dios’ ora e muri? (Eclesiástes 12:7)

Ya cu spiritu ta e forsa di bida, e ta “bolbe na e Dios berdadero” den e sentido cu cualkier speransa pa bida den futuro ta keda henteramente den Dios su man. Ta Dios so por restorá e spiritu, of forsa di bida, i pone un hende bolbe na bida. (Salmo 104:30)—1/4, página 17.