“Subi Laman ora Tin Mal Tempu”

BO NO ta haña cu un aventura riscante asina ta algu scogí na mal ora, algu bobo i cu asta lo por ta desastroso? Tog, den sentido figurativo, algun hende ta hinca nan mes den un situacion parecido. Con asina? E autor di siglo 17, Thomas Fuller, a bisa: “No tuma accion ora bo ta furioso. E ta mescos cu subi laman ora tin mal tempu.”

Tuma accion miéntras cu bo ta den estado di rabia incontrolabel por tin consecuencianan trágico. Un suceso registrá den Bijbel ta confirmá esaki. Simeon i Levi, e yu hombernan di e patriarca Jacob, a reaccioná n’e violacion di nan ruman muher, Dina, dor di explotá di furia den un vengansa. E resultado tabata matansa i plundermentu na granèl. No ta nada straño cu Jacob a condená nan acto malbado, bisando: “Boso a trece maldicion pa mi dor di haci mi un holó stinki pa e habitantenan dje tera.”—Génesis 34:25-30.

Sabiamente, e Palabra di Dios, Bijbel, ta recomendá un curso diferente. E ta bisa: “Laga rabia para i bandoná furia; no mustra bo mes excitá solamente pa haci malu.” (Salmo 37:8) Dor di sigui e conseho ei, picánan grandi por ser evitá.—Eclesiástes 10:4; mira tambe Proverbionan 22:24, 25.