Decididu pa Sigui Dios Su Caminda di Bida

E congresonan “Dios Su Caminda di Bida” tabatin masha hopi cos di ofrecé na hende cu kier sirbi Dios! Un delegado a describí e congreso como “un periodo maraviyoso di instruccion, animacion i iluminacion.”

UN OTRO delegado a bisa cu “tabatin masha hopi cos di mira i tende, di meditá ariba i di asimilá.” Laga nos repasá e programa mes awor.

Jesucristo—E Caminda, e Berdad i e Bida

Esaki tabata tema dje promé dia di congreso. (Juan 14:6) E promé discurso a cuminsá na splica e propósito di nos binimentu huntu n’e congreso: pa siña mas tocante e mihó caminda di bida cu por tin, Dios su caminda di bida. Jehova ta siña su pueblo con pa cana den su camindanan. E ta haci esaki pa medio di Bijbel, “e esclabo fiel i discreto” i spiritu santu. (Mateo 24:45-47; Lucas 4:1; 2 Timoteo 3:16) Ki un privilegio pa ser instruí dor dje Soberano di universo!

Na armonia cu e tema dje dia, e discurso clave tabata “E Rescate di Cristo—Dios Su Caminda di Salbacion.” Pa cumpli cu e normanan di Dios su caminda di bida, ta vital pa reconocé e papel di Jesucristo den e propósito di Jehova. E orador a bisa: “Sin e sacrificio di rescate di Jesucristo, ningun hende, sea cual sea su creencia of obranan, no por ricibí bida eterno for di Dios.” Anto el a cita Juan 3:16, cu ta declará: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” Pa ehercé fe den e sacrificio di rescate di Cristo nos tin cu yega na un conocimentu exacto dje berdad. E ta encerá tambe dedicá nos bida na Jehova, simbolisá esaki mediante bautismo bou di awa, i biba na armonia cu e ehempel cu Jesucristo a laga pa nos.—1 Pedro 2:21.

E sesion di atardi a cuminsá cu un discurso titulá “E Caminda di Amor Nunca Ta Faya.” Esaki a incluí un consideracion versículo pa versículo di Pablo su descripcion conmovedor di amor, registrá na 1 Corintionan 13:4-8. A recordá e auditorio cu amor di sacrificio propio ta un rasgo di identificacion di cristianismo i cu amor pa Dios i pa próhimo ta rasgonan esencial dje adoracion cu Jehova ta aprobá.

Siguientemente a bini un simposio di tres parti titulá “Mayornan—Inculcá Dios Su Caminda den Boso Yunan.” Mayornan por yuda nan yunan sirbi Dios dor di pone un bon ehempel den lesa i studia su Palabra. Nan por inculcá e berdad den nan yunan mediante un studio regular di famia, adaptando esaki n’e necesidadnan dje famia. Ta importante tambe pa yuda yunan participá den actividadnan di congregacion i e ministerio di veld. Aunke ta un reto pa lanta yu temeroso di Dios den e mundu malbado aki, e ta masha recompensador.

Despues dje simposio aki tabatin e discurso “Laga Jehova Forma Bo pa Uso Onorabel.” Mescos cu un trahadó di klei ta forma un pochi, asina Dios ta forma esnan cu ta deseá di sirbié. (Romanonan 9:20, 21) E ta haci esaki dor di duna conseho den su Palabra i atrabes di su organisacion. Jehova lo yuda nos usa nos abilidadnan plenamente si nos haci nos mes disponibel, si nos haci uso di oportunidadnan cu presentá i si nos ta dispuesto pa lagu’e dirigí nos pasonan.

Awor a sigui un parti emocionante dje programa: “Sirbishi den e Campo di Misionero.” Actualmente tin 2.390 minister cristian nombrá como misionero den 148 pais. Nan ta pone un ehempel sublime di lealtad i celo i ta profundamente gradicidu pa nan privilegio di sirbi den camponan stranhero. N’e congresonan internacional, durante e parti aki dje programa, misioneronan a papia dje desafio i gosonan dje bida di misionero.

E discurso final riba e promé dia tabata titulá “Tin Bida Despues di Morto?” E pregunta aki a confundí humanidad pa miles di aña. Hende den tur sociedad tabatin problema cu e tema. Supuesto contestanan tin na granèl. Nan ta mes variá cu e custumber i religionnan di esnan cu ta duna e contestanan. Sin embargo, hende tin cu siña e berdad.

Despues di esei, e orador a anunciá publicacion dje foyeto colorido nobo di 32 página Kico Ta Sosodé cu Nos ora Nos Muri? E foyeto aki ta splica orígen dje siñansa di inmortalidad di alma i ta mustra con e concepto a bira algu central den casi tur religion di mundu awe. Den un manera cla i atractivo, e ta examiná loke Bijbel ta bisa tocante alma, pakico nos ta muri i kico ta sosodé cu nos ora nos muri. E foyeto ta splica tambe ki speransa tin p’e mortonan i p’e bibunan. Ki un bendicion e publicacion aki lo ta pa buscadónan dje berdad tur caminda!

Vigilá Cuidadosamente Con Bo Ta Cana

Ki un tema apropiado esaki tabata pa e di dos dia dje congreso! (Efesionan 5:15) E programa di mainta a enfocá riba e trabou di predicá i haci disipel. Despues di un consideracion dje texto di dia, e programa a continuá cu e discurso “Yuda Hende Subi Riba e Caminda pa Bida.” Ora di haci e trabou urgente aki, ta importante pa nos tin un actitud positivo i reconocé cu ta tantu un privilegio como un deber pa compartí e berdad cu otro hende. Den e promé siglo E.C., mayoria hende a rechasá e Palabra di Dios. Sin embargo, apesar di oposicion, tabatin esnan “cu tabata corectamente dispuesto pa bida eterno [cu] a bira creyente.” (Echonan 13:48, 50; 14:1-5) E situacion ta idéntico awe. Aunke hopi hende ta rechasá e berdad di Bijbel, nos ta sigui busca esnan cu lo respondé faborablemente.—Mateo 10:11-13.

E siguiente discurso a trata cu e desafio di alcansá otro hende cu e mensahe di bida. Ya cu a bira mas difícil awor pa haña hende na cas, nos mester ta meticuloso i ingenioso si nos kier alcansá mas tantu hende posibel cu e mensahe di Reino. Den hopi pais, publicadónan dje bon nobo ta logra resultadonan excelente cu dunamentu di testimonio via telefon i dor di predicá den teritorio di negoshi, alcansando asina esnan cu di otro manera ta difícil pa localisá.

E discurso titulá “Siña Disipelnan Tur Loke Cristo A Manda” a enfocá riba e importancia di bira ábil den nos ministerio. Nos abilidadnan di siña otro hende ta bira mas skerpi segun cu nos ta siña for di otronan i ta aplicá e entrenamentu excelente cu nos ta ricibí na reunionnan di congregacion. Segun cu nos ta bira mas ábil den nos trabou di siña, nos ta haña mas goso i satisfaccion den nos trabou di yuda hende siña e berdad di Bijbel.

E sesion di mainta a terminá cu un discurso riba e nificacion di dedicacion i bautismo. Un dje puntonan cu e orador a trece padilanti tabata cu si nos confia completamente den Dios i nos haci esfuerso diligente pa cumpli cu su boluntad, lo e bendicioná nos i sostené nos. E homber sabí a skirbi: “Den tur bo camindanan tuma nota di [Dios], i e mes lo haci bo camindanan stret.” (Proverbionan 3:6) E bautismo gososo riba su mes tabata un rasgo sobresaliente dje congreso cu a demostrá cu hopi persona a cuminsá ahustá nan mes na Dios su caminda di bida.

Despues di un pausa di merdia, e sesion di atardi a cuminsá cu e discurso “Sirbi cu Bida Sin Fin na Bista.” Dios su propósito pa hende obediente sirbié pa semper riba tera, lo cumpli. Ta masha apropiado anto, pa nos enfocá nos pensamentu, plannan i speransa riba sirbi Jehova cu mira riba eternidad! Aunke nos kier tene e “dia di Jehova” bon na mente, ta vital pa corda cu nos meta ta pa sirbié pa eternidad. (2 Pedro 3:12) E echo cu nos no sa e tempu exacto cu Jesus lo ehecutá e vengansa di Dios, ta mantené nos alerto i ta duna nos oportunidad tur dia pa mustra cu nos ta sirbi Jehova cu motibunan inegoista.

E dos discursonan cu a sigui a examiná capítulo cuater dje carta di Pablo n’e efesionan. Entre e cosnan cu a considerá tabata e bendicion cu nos tin den “donnan den hende,” hombernan spiritualmente cualificá nombrá pa spiritu santu. E ancianonan aki ta duna conseho i guia pa nos beneficio spiritual. Tambe Pablo su carta inspirá ta urgi cristiannan pa bisti “e personalidad nobo.” (Efesionan 4:8, 24) Un personalidad creá dor di Dios ta encerá cualidadnan manera compasion, bondad, humildad di mente, suavedad, gran pacenshi i amor.—Colosensenan 3:12-14.

Vigilá cuidadosamente con nos ta cana ta encerá mantené nos mes sin mancha di mundu. Esei tabata tema dje siguiente discurso. Balansa ta necesario den loke nos ta scoge como entretenimentu, actividad social i empeñonan material. Dor di aplicá e conseho na Santiago 1:27 pa keda sin mancha di mundu, nos tin un posicion limpi dilanti Dios i un bon concenshi. Tambe nos por tin un bida yen di propósito i lo ser bendicioná cu pas, prosperidad spiritual i asociacion maraviyoso.

Despues a bini un simposio di tres parti titulá “Hóbennan—Sigui Dios Su Caminda.” Sabiendo cu Dios ta stima nan i ta apreciá nan esfuerso pa sostené adoracion puru, hóbennan mester entrená nan facultadnan perceptivo pa sirbié fielmente. Un manera pa desaroyá facultadnan perceptivo ta dor di lesa e Palabra di Dios tur dia i meditá riba dje. Si nos haci esei, nos por yega na conocé Jehova su camindanan. (Salmo 119:9-11) Tambe hóbennan por desaroyá nan facultadnan perceptivo dor di aceptá conseho maduro for di mayornan, ancianonan i e publicacionnan di Sociedad. Dor di usa nan facultadnan perceptivo den e manera corecto, hóbennan ta resistí e preocupacion cu posesion material, abla impuru i excesonan den recreo cu ta caracterisá e mundu aki alehá for di Dios. Dor di sigui Dios su caminda di bida, tantu hóben como bieu por tin berdadero éxito.

E discurso final dje dia ei tabata “E Creador—Su Personalidad i Su Camindanan.” Despues di mustra cu miles di miyones di hende no conocé e Creador, e orador a bisa: “Berdadero nificacion den bida ta relacioná cu conocé e Creador, nos Dios como persona, reconocé su personalidad i cooperá cu su camindanan. . . . Tin echonan tocante nos mundu i tocante nos mes cu bo por usa pa yuda hende aceptá e Creador i conocé ken e ta.” E ora ei e orador a considerá evidencia cu ta señalá n’e existencia di un Creador sabí i amoroso. E discurso a culminá cu presentacion di un buki nobo: ¿Existe un Creador que se interesa por nosotros? (Tin un Creador Cu Ta Interesá den Bo?)

“Esaki Ta e Caminda. Cana den Dje”

Esaki tabata tema dje di tres dia di congreso. (Isaías 30:21) E programa a cuminsá cu un simposio emocionante di tres discurso cu a enfocá riba e vision di tempel cu Ezekiel a mira. E vision aki tin gran nificacion p’e pueblo di Dios awe, ya cu e ta relacioná cu adoracion puru den nos tempu. Un clave pa comprendé e vision ta esaki: Jehova su gran tempel spiritual ta representá su areglo pa adoracion puru. Segun cu tabata considerá e rasgonan dje vision, oyentenan tabata refleccioná riba nan actividad cu ta apoyá e trabou cu superintendente amoroso dje resto ungí i miembro prospectivo dje clase di cabesante ta haci.

Mas lat parti mainta, tabatin un drama bíblico colorido cu actornan bistí na trahe di tempu bíblico. E drama tabata titulá “Famianan—Haci Lesamentu di Bijbel Tur Dia Parti di Boso Bida!” El a presentá e fe i curashi dje tres hebreonan cu a nenga di buig dilanti e imágen di oro cu Rey Nabucodonosor di Babilonia a construí. E propósito dje drama tabata pa demostrá cu Bijbel no ta solamente un buki di historia antiguo, sino cu su conseho ta berdaderamente beneficioso pa tantu hóben como adulto awe.

E sesion di atardi tabata ora pa e discurso público “E Unico Caminda cu Ta Hiba na Bida Eterno.” Despues di repasá e historia di humanidad su caida den picá i morto, e orador a concluí cu e siguiente palabranan cu a pone tur presente pensa seriamente: “E texto central pa e dia di congreso djawe tabata Isaías capítulo 30, versículo 21, cu ta bisa: ‘Bo propio oreanan lo tende un palabra bo tras ta bisa: “Esaki ta e caminda. Cana den dje,” den caso cu boso mester bai na banda drechi of den caso cu boso mester bai na banda robes.’ Con nos ta tende e bos aki? Esei ta dor di scucha n’e Palabra di Dios, Bijbel Santu, i sigui e guia cu nos Maraviyoso Instructor, Jehova Dios, ta duna mediante dje i mediante su organisacion cristian di tempu actual. Sí, esaki ta e único caminda cu ta hiba na bida eterno.”

Despues di un resúmen dje artículo di studio dje Toren di Vigilancia p’e siman, a sigui e discurso final titulá “Sigui Cana den e Caminda di Jehova.” Un parti di dje a bai na repasá e puntonan principal dje programa. Despues e orador a presentá un resolucion cu a expresá determinacion pa sigui cana den Dios su caminda di bida.

E resolucion a concluí cu e palabranan conmovedor aki: “Nos ta convencí cu biba segun e principionan, conseho i amonestacion bíblico ta e mihó manera di biba awe i ta pone un bon fundeshi pa futuro, di manera cu nos por haña un gara firme riba e berdadero bida. Riba tur cos, nos ta adoptá e resolucion aki pasobra nos ta stima Jehova Dios cu henter nos curason, alma, mente i forsa!” Tur presente a mustra cu nan ta di acuerdo cu un SI resonante!

[Kuadro/​Plachi na página 8]

Tin un Creador Cu Ta Interesá den Bo?

E buki nobo cu ta carga e título aki ta presentá evidencia convincente dje existencia dje Creador, Jehova, i ta considerá su cualidadnan. E buki ta diseñá specialmente pa personanan cu ta bon educá den asuntunan seglar pero cu no ta kere den Dios. Tambe, e buki di 192 página aki lo profundisá e fe di hende cu ya caba ta kere den Dios, edificando aprecio pa su personalidad i camindanan.

¿Existe un Creador que se interesa por nosotros? no ta asumí cu e lector ta kere den Dios. Mas bien, e ta mustra con descubrimentu i conceptonan científico recien ta duna prueba dje existencia dje Creador. Entre e capítulonan tin esnan titulá “Kico Por Agregá Nificacion na Bo Bida?” “Con Nos Universo A Yega di Existí?—E Controversia” i “Ki Unico Bo Ta!” Otro capítulonan ta considerá pakico nos por ta sigur cu Bijbel ta inspirá pa Dios. Tambe e buki nobo ta duna un repaso general di Bijbel, cu ta revelá e Creador su personalidad i camindanan. E buki ta mustra no solamente pakico Dios a permití asina tantu sufrimentu, sino tambe e ta splica den ki manera Dios lo caba cuné pa semper.

[Plachinan na página 7]

Hopi hende a bautisá

[Plachinan na página 7]

A. D. Schroeder, miembro dje Cuerpo Gobernante di Testigonan di Jehova, a presentá e foyeto nobo

[Plachinan na página 8, 9]

Un drama conmovedor a animá nos pa lesa Bijbel tur dia