Un Veredicto na Fabor dje Derecho di Scoge

NINGUN otro cu e Personahe mas ilustre di henter e universo ta apoyá hende su derecho di scoge despues di a ricibí un splicacion di loke ta enbolbí. E ta nos Creador. Siendo cu e tin un conocimentu sin límite dje necesidadnan humano, e ta duna un abundancia di instruccion, spiertamentu i guia relacioná cu e curso sabí pa tuma. Tog, e no ta ignorá e boluntad liber cu cua el a dota su criaturanan inteligente. Su profeta, Moises, a reflehá e punto di bista di Dios: “Mi a pone bida i morto bo dilanti, e bendicion i e maldicion; i bo tin cu scoge bida pa bo por keda na bida, abo i bo desendencia.”—Deuteronomio 30:19.

E principio aki tin influencia riba e tereno di medicina. E concepto di scoge pa un tratamentu of consentí cuné despues di a ricibí un splicacion di loke e ta enbolbé, ta hañando aceptacion gradualmente na Hapon i otro paisnan unda den pasado e no tabata algu comun. Dr. Michitaro Nakamura a duna e descripcion aki di un consentimentu basá riba splicacion: “E concepto ta encerá cu e dokter ta splica e pashent di su malesa, su prospecto pa recuperacion, e tipo di tratamentu, i e posibel efectonan secundario den un manera simpel pa e pashent comprendé. Asina e ta mustra respet p’e derecho dje pashent di scoge e tipo di tratamentu cu e kier.”—Japan Medical Journal.

Pa añanan largu, dokternan na Hapon a presentá vários motibu pakico nan ta contra e forma aki di trata pashent, i cortenan tabatin e tendencia di bai tras di custumber médico. P’esei, tabata algu histórico ora cu dia 9 di februari 1998, e Hues Principal dje Corte Superior di Tokio, Takeo Inaba, a duna un veredicto na fabor dje derecho di scoge un tratamentu despues di a ricibí splicacion. Kico tabata e veredicto, i cua tabata e cuestion cu a trece e caso dilanti corte?

Aya na juli 1992, Misae Takeda di 63 aña di edad, un Testigo di Jehova, a drenta den contacto cu e hospital dje Instituto di Ciencia Medicinal, Universidad di Tokio. A diagnosticá cu e tabatin un tumor maligno na su higra, i e mester a operá. Deseoso pa obedecé e mandamentu bíblico contra mal uso di sanger, el a splica su dokter bon cla cu e ta deseá solamente tratamentu sin sanger. (Génesis 9:3, 4; Echonan 15:29) E dokternan a aceptá un formulario di exoneracion di responsabilidad, loke ta absolvé nan i e hospital di tur responsabilidad dje consecuencianan di Misae su decision. Nan a sigur’é cu nan lo a cumpli.

Sin embargo, despues dje operacion, miéntras Misae tabata bou di sedante ainda, nan a dun’é transfusion di sanger—net contrali di su deseonan expresá bon cla. Esfuersonan pa tene e transfusion sin autorisacion aki den secreto a cai na awa ora cu aparentemente un empleado dje hospital a laga esaki lek cerca un reportero di noticia. Manera bo por imaginá, e cristian sincero aki a keda aplastá ora el a haña sa cu nan a dun’é transfusion sin su autorisacion. El a confia e staf médico, pensando cu nan lo a cumpli cu nan palabra i respetá su conviccionnan religioso. Debí n’e angustia emocional cu el a pasa aden dor dje violacion flagrante aki di confiansa entre dokter cu pashent, i sperando di establecé un precedente cu lo a spar otro hende di maltrato médico similar, el a hiba e caso dilanti corte.

Moral i Orden Público

Tres hues dje Corte di Distrito di Tokio a tende e caso i nan a dicta fayo na fabor dje dokternan i, pues, contra e derecho dje pashent di consentí of scoge un tratamentu despues di a haña splicacion. Den e veredicto cu nan a duna dia 12 di mart 1997, nan a declará cu tur intento pa cera un contract pa un tratamentu completamente sin sanger tabata inválido. Nan a razoná cu un dokter lo tabata violando kojo ryozoku,a esta e normanan dje sociedad, si e bai di acuerdo cu un areglo special pa no duna sanger asta si un situacion crítico presentá. Nan a opiná cu e obligacion principal di un dokter ta di salba bida den e mihó manera cu e por, pues un acuerdo asina lo tabata inválido desde principio, sin importá e conviccionnan religioso dje pashent. Nan a decretá cu den e análisis final, e opinion profesional di un dokter mester prevalecé riba cualkier peticion médico cu un pashent por a haci.

Ademas, e huesnan a declará cu pa e mésun motibunan, aunke ta ser sperá pa un dokter splica e procedura básico, e consecuencia i peligernan di un operacion planeá, e “por a keda sin bisa si e ta bai duna transfusion di sanger of no.” Nan decision tabata: “No por definí como ilegal ni tampoco como incorecto e echo cu dokternan como e Acusadonan a comprendé deseo dje Demandante pa no aceptá sanger bou di ningun circunstancia, i cu nan a haci como si fuera nan lo a cumpli cu su deseo i asina pone cu el a aceptá e operacion en cuestion.” Nan a pensa cu si e dokternan a actua di otro forma, e pashent lo por a nenga e operacion i bandoná e hospital.

E sentencia di corte ei a shok i desanimá esnan cu tabata boga pa e derecho di un pashent pa duna su consentimentu pa un of otro tratamentu despues di un splicacion. Considerando e veredicto dje caso Takeda i su implicacionnan p’e derecho di un pashent na Hapon pa duna consentimentu pa un tratamentu despues di a haña un splicacion, Profesor Takao Yamada, un famoso autoridad riba e tereno di ley civil, a skirbi: “Si permití e razonamentu aki keda na vigor, nengamentu di transfusion di sanger i e principio legal di e derecho di duna consentimentu pa un tratamentu, tiki-tiki lo caba na nada.” (Boletin legal Hogaku Kyoshitsu) Cu palabranan fuerte el a condená e transfusion di sanger obligá como “un violacion flagrante di confiansa cu ta similar na un atake traicionero.” Profesor Yamada a agregá cu “hamas i nunca mester permití” un acto cu ta destruí confiansa asina.

Dor cu Misae tabatin un caracter modesto, tabata difícil p’e bini padilanti. Pero realisando cu e por a participá den defendé Jehova su nomber i normanan hustu relacioná cu santidad di sanger, e tabata dicididu pa cumpli cu su parti. El a skirbi su abogado: “Mi no ta mas cu stof, asta ménos. Mi ta puntra mi mes con útil un persona incompetente manera ami ta. Pero ora mi haci esfuerso pa haci net loke Jehova ta bisa, esun cu por laga piedranan sclama, lo e duná mi poder.” (Mateo 10:18; Lucas 19:40) Riba e banki di testigo durante e huicio, el a describí cu un bos cu ta tembla e trauma emocional cu el a experenciá debí n’e traicion. “Mi a sinti mi violá, manera un muher cu nan a violá sexualmente.” Su testimonio a pone awa basha for di wowo di hopi hende den sala di corte.

Un Animacion Inesperá

En bista dje veredicto dje Corte di Distrito, a apelá e caso na Corte Superior mesora. E argumentonan di apertura den e corte di apelacion a cuminsá na juli 1997. I Misae, awor un persona pálido pero dicididu, tabata presente den rolstoel. E cancer a bolbe lanta cabes, i Misae tabata birando mas swak. Misae a sintié mashá animá ora cu e hues principal a tuma un paso no-usual i a detayá e rumbo cu e corte tabatin intencion di tuma. El a mustra bon cla cu e corte di apelacion no tabata di acuerdo cu e sentencia dje corte den promé instancia, esta, cu un dokter tabatin e derecho di ignorá deseo di pashent, i haci como si fuera e ta bai cumpli, pero cu na secreto e ta dicididu pa haci algu otro. E hues principal a bisa cu e corte lo no a apoyá e ética paternalista di “Shirashimu bekarazu, yorashimu beshi,”b cu ta nificá: “Tene nan ignorante i dependiente” riba tereno di medicina. Misae a bisa despues: “Mi ta masha contentu di tende e hues su comentario onesto cu ta completamente diferente for di e decision anterior dje Corte di Distrito.” El a agregá: “Esaki ta loke mi tabata pidi Jehova den oracion.”

E siguiente luna Misae a fayecé, den compania di miembronan di famia amoroso i e staf médico di un otro hospital, unda nan a comprendé i a respetá su conviccionnan sincero. Aunke nan tabata hopi tristu p’e morto di Misae, su yu homber, Masami, i otro miembronan di famia tabata dicididu pa percurá pa e caso yega te na su final, na armonia cu Misae su deseo.

E Veredicto

Finalmente, dia 9 di februari 1998, e tres huesnan di Corte Superior a dicta fayo, revocando e veredicto di corte den promé instancia. E sala di corte chikitu tabata yen di reportero, académico i otro hende cu a sigui e caso fielmente. Korant i canalnan principal di television a duna un reportahe dje veredicto. Algun dje titularnan tabata bisa: “Segun Corte: Pashent Por Nenga Tratamentu,” “Corte Superior: Transfusion Ta un Violacion di Derecho,” “Dokter Cu A Efectuá un Transfusion di Sanger Forsá Ta Perde Caso den Corte” i “Testigo di Jehova Ta Ricibí Daño i Perhuicio pa Transfusion.”

Den mayoria caso, reportahenan riba e veredicto tabata exacto i faborabel. E korant The Daily Yomiuri a informá: “Hues Takeo Inaba a bisa cu dokternan a actua robes dor di efectuá proceduranan cu un pashent a rechasá.” Tambe e korant a mustra bon cla: “E dokternan cu a duna [e transfusion di sanger] a priva e señora di su oportunidad di scoge su tratamentu.”

E korant Asahi Shimbun a señalá cu aunke den e caso aki corte a pensa cu no tabatin suficiente evidencia di cu a existí un combenio den cua tur dos partido a bai di acuerdo cu lo no a usa sanger asta den un situacion di bida of morto, e huesnan no tabata di acuerdo cu e corte den promé instancia pa loke ta e legalidad di e contract ei: “Si tin un acuerdo cla den cua a cumbiní cu lo no a duna transfusion di sanger bou di ningun circunstancia, e Corte aki no ta hañ’é algu contra órden público i p’esei e ta inválido.” Ademas, e korant a señalá n’e punto di bista dje hues di cu “tur hende tin cu muri un dia, i cada individuo tin mag di dicidí tocante e proceso cu ta hiba na e momento ei.”

En efecto, Testigonan di Jehova a investigá e materia aki i nan ta convencí cu nan ta scogiendo e mihó manera pa biba. Esei ta incluí rechasá peligernan conocí di transfusion di sanger i en bes di esei aceptá tratamentunan sin sanger cu ta ampliamente usá den hopi pais i cu ta na armonia cu Dios su ley. (Echonan 21:25) Un famoso profesor hapones di ley constitucional a señalá: “En realidad, e nengamentu di tratamentu [e transfusion di sanger] en cuestion no ta un cuestion di scoge ‘con pa muri,’ sino, mas bien, unu di con pa biba.”

E veredicto dje Corte Superior mester alertá dokternan dje echo cu nan derecho pa tuma decision no ta asina amplio manera algun di nan lo por a kere. I lo e mester pone cu hopi mas hospital ta establecé normanan ético. Aunke hende en general a aceptá e sentencia aki di corte, i cu e ta un animacion pa pashentnan cu no tabatin mashá di bisa ora di scoge nan tratamentu, no ta tur partido a acept’é completamente. E hospital di gobiernu i e tres dokternan a apelá e caso den Corte Supremo. Pues nos tin cu warda pa mira si e corte di mas haltu di Hapon tambe lo apoyá e derechonan dje pashent, mescos cu e Soberano di universo ta haci.

[Nota]