Ora Curasonnan di Piedra Bira Moli

NA 1989, TESTIGONAN DI JEHOVA NA POLONIA a haña reconocimentu legal como organisacion religioso. Gradualmente Testigonan cu tabata cerá pa motibu di nan neutralidad cristian, a haña nan libertad, lagando atras hopi prezu cu a anhelá pa siña mas tocante Bijbel for di nan. Aki ta sigui un relato con, den un prizon asina, Testigonan di Jehova ta haci esfuerso pa yuda esnan cu na un tempu tabatin curason di piedra, reaccioná na e poder dje Palabra di Dios.

NA WOŁÓW, un pueblo di 12.000 habitante den zuidwest di Polonia, tin un prizon di 200 aña bieu, caminda algun dje pió criminalnan di Polonia ta cerá. Desde e reconocimentu oficial di nan obra, Testigonan di Jehova a haci esfuerso pa hiba e bon nobo di Reino na e prezunan einan, i nan ta hacié cu hopi entusiasmo.

Loke a prepará e caminda tabata un carta cu e Ministerio di Husticia a emití na februari 1990 dirigí na tur director di prizon na Polonia. E carta a bisa pa nan “no causa dificultad” pa ningun prezu cu kier a ricibí publicacionnan di Watch Tower of cu kier a reuní cu Testigonan di Jehova. E Testigonan, di ken algun a pasa hopi aña den e prizon di Wołów, tabata conocé bon hopi dje prezunan curason duru djei. Sin embargo, nan a confia cu Jehova lo bendicioná nan esfuerso pa laga e berdad di Bijbel suavisá e curason duru dje otro prezunan.

Con e Trabou Ta Cuminsá

Ruman Czesław di Wrocław, un stad rond di 40 kilometer leu, kende a ser autorisá pa bishitá e prizon na Wołów, ta bisa: “Tabata difícil pa cuminsá e programa. Nos tabatin hopi combersacion largu cu funcionarionan di prizon pa convencé nan cu nos ‘sirbishinan religioso’ ta bon pa e prizoneronan.”

Ruman Paweł, compañero di Czesław, ta conta cu, pa complicá e asuntu, “un funcionario di rango haltu a insistí cu e prezunan tabata usa e sirbishinan religioso solamente como excuus pa haña ganashi material.” Pero ora tres prizonero cu na un tempu tabata criminalnan peligroso a presentá pa bautismo na 1991, e autoridadnan di prizon a cambia di actitud i a duna mas cooperacion.

“Nos a cuminsá cu predicá na e prezunan, na nan famia cu a bin bishitá nan den prizon, i tambe na e personal dje prizon,” Czesław ta splica. “Despues nan a permití nos predicá e bon nobo di cel pa cel, loke ta un excepcion masha poco comun. Finalmente, ora nos a haña e promé hendenan interesá, nan a duna nos permit pa usa un cuarto chikitu pa conducí studio di Bijbel i pa tene reunionnan cristian.” Sí, Jehova a habri e caminda pa yega n’e curason di piedra dje prizoneronan.

Un Programa Educacional Eficas

Pronto e cuarto ei a bira muchu chikitu. Ya cu tantu e prizoneronan bautisá como e rumannan cu ta bini di pafó a participá den e trabou di predicá, te cu 50 prezu a cuminsá asistí na e reunionnan. Un dje ancianonan local ta splica: “Nos a tene tur e reunionnan pa mas cu tres aña eiden, i e prizoneronan tabata asistí tur siman regularmente.” Pues, na mei 1995 nan a haña permit pa usa un cuarto mas grandi.

Con e rumannan responsabel ta determiná ken por asistí na e reunionnan den prizon? Rumannan Czesław i Zdzisław ta splica: “Nos tin un lista di prizonero cu ta mustra interes sincero den e berdad. Si un prezu no ta haci progreso of ta falta reunion sin motibu válido, loke ta mustra cu e no tin masha aprecio pa e percuracionnan aki, nos ta skrap su nomber for dje lista i ta informá e director di prizon.”

Durante nan studio di Bijbel, e rumannan ta siña e prizoneronan tambe con pa prepará bon pa e reunionnan i con pa usa nos literatura eficasmente. Di manera cu ora e prezunan bini reunion, nan ta bon prepará i ta participá libremente. Nan ta duna comentario animador, ta usa nan Bijbel ábilmente i ta aplicá e conseho na nan mes. Hopi bes nan ta bisa den nan comentarionan algu manera: ‘Mi ta wak cu mi mester haci tal i tal cos.’

E secretario dje congregacion ta bisa: “E rumannan ta conduciendo un total di 20 studio di Bijbel den e prizon na Wołów. Ocho di nan ta ser conducí dor di tres publicadó prizonero.” Nan tabatin bon resultado tambe predicando di cel pa cel i durante nan caminata den curá dje prizon. Por ehempel, den dies luna, for di september 1993 te na juni 1994, nan a distribuí 235 buki, casi 300 foyeto i 1.700 revista. Poco tempu pasá, dos funcionario di prizon a pidi studio di Bijbel.

Asambleanan Special Ta Trece Goso

Cu tempu, a agregá un elemento mas na e programa educacional den e prizon ei, esta, asambleanan special. Superintendentenan biahero i otro rumannan cualificá tabata presentá e partinan principal dje asamblea di circuito i dje programa di dia special di asamblea den e sala di ehercicio dje prizon. Nan a tene e promé asamblea special na october 1993. Cincuenta prezu a asistí, i “famianan completo, incluyendo hende muher i mucha, a bini for di Wrocław,” e korant Słowo Polskie ta informá, loke a pone cu e asistencia total a yega 139. E pausa den e programa di asamblea a duna oportunidad pa disfrutá di un cuminda prepará dor di e ruman muhernan, i tambe tempu pa dushi asociacion cristian.

Desde e tempu ei a tene shete asamblea special mas, i e beneficionan a alcansá, no solamente esnan cu ta den prizon, sino tambe esnan pafó. Ora un ruman muher Testigo a yama na cas di un ex-prezu di Wołów cu awor ta biba den e pueblo, e tabata masha negativo na cuminsamentu. Pero ora e ruman a bis’é cu un cierto prizonero a bira Testigo, e homber no por a kere loke e ta tende: “E asesino ei ta awor un Testigo?” E resultado tabata cu e homber a aceptá un studio di Bijbel.

Transformacionnan Maraviyoso

Di berdad e programa educacional grandi aki a suavisá e curason di piedra di prizonero? Laga nan conta nan relato.

“Nunca mi a conocé mi mayornan, pasobra nan a bandoná mi tempu mi tabata chikitu, i mi a haña masha hopi falta di sinti cu hende stimá mi,” Zdzisław ta confesá, un homber cu di naturalesa ta pensativo. “Na un edad hopi yong, mi a hañá mi enbolbí den crímen, i finalmente mi a cometé un asesinato. E sintimentu di culpa a forsá mi pensa pa mata mi mes i mi tabata buscando desesperadamente pa haña un berdadero speransa. Anto, na 1987, mi a topa cu e revista E Toren di Vigilancia. For di dje mi a siña dje speransa di resureccion i di bida eterno. Realisando cu no ta tur cos ta perdí, mi a kita e idea di suicidio for di mi cabes i a cuminsá studia Bijbel. Awor mi a siña conocé e nificacion dje amor di parti di Jehova i dje rumannan.” For di 1993, e ex-asesino aki ta un sirbidó ministerial i pionero auxiliar den e prizon, anto aña pasá el a bira pionero regular.

En cambio, Tomasz a aceptá un studio di Bijbel mesora. “Pero mi intencion no tabata sincero,” e ta confesá. “Mi tabata studia djis pasobra mi tabata gusta broma cu mi por splica e creencianan di Testigonan di Jehova na otronan. Pero mi no tabata haci mashá cu e berdad di Bijbel. Un dia, mi a dicidí di bai un reunion cristian. E prizoneronan bautisá a duná mi un caluroso bon biní. Mi a realisá cu en bes di purba broma cu conocimentu, mi tabatin cu suavisá mi curason duru i transformá mi mente.” Tomasz a cuminsá bisti e personalidad cristian nobo. (Efesionan 4:22-24) Awe e ta un Testigo dedicá i bautisá i ta sinti goso den predicá di cel pa cel.

Preshon di Ex-Amigunan

Esnan cu a siña e berdad di Bijbel den prizon a haña nan bou di hopi preshon di parti di ex-amigunan den e cel i for di funcionarionan di prizon. Un di nan ta corda: “Nan tabata ridiculisá mi i haci bofon di mi constantemente. Pero mi tabata tene e palabranan di animacion dje rumannan na mente. ‘Sigui haci oracion na Jehova,’ nan a bisá mi. ‘Lesa bo Bijbel i lo bo sinti un pas interno.’ Esei a yuda hopi.”

“E otro prizoneronan tabata haci comentarionan skerpi contra mi sin stop,” Ryszard ta bisa, un ruman bautisá robusto. “Nan tabata spiertá mi: ‘Bo por bai bo reunionnan numa, pero no purba sobresalí i haci manera bo ta mihó, bon?’ Ora mi a haci cambio den mi bida dor di aplicá principionan bíblico, mi mester a sufri pa esei. Nan tabata boltu mi cama, zwai mi literatura bíblico i bruha tur cos den mi banda di cel. Mi tabata pidi Jehova forsa pa controlá mi mes i despues mi tabata bai drecha e cosnan sin bisa nada. Cu tempu e atakenan ei a stop.”

“Ora e otro prizoneronan mira cu nos ta determiná pa sirbi Jehova,” un otro prizonero bautisá ta relatá, “e preshon ta cambia. Nan ta bisa cos manera: ‘Corda cu bo no mag bebe, ni huma ni gaña mas.’ E tipo di preshon ei ta yuda nos dominá nos mes, i p’esei nos ta libra hopi lihé di cualkier bicio i adiccion. Tambe e ta yuda nos cultivá e frutanan di spiritu.”—Galationan 5:22, 23.

Birando Sirbidónan Dedicá di Dios

Cu permit dje autoridadnan di prizon, e promé bautismo a tuma lugá den e sala di ehercicio den e primavera di 1991. Zdzisław tabata e felis candidato. Diesdos prezu a asistí, i 21 ruman di pafó a bini pa e ocasion. E reunion tabatin un efecto animador riba e prizoneronan. Vários di nan a haci asina hopi progreso cu dos otro prezu a bautisá mas despues e aña ei. Dos aña despues, na 1993, a tene dos bautismo, i shete prezu mas a simbolisá nan dedicacion na Jehova!

Den su reportahe dje bautismo cu a tuma lugá na december, e korant local, Wieczór Wrocławia, a remarcá: “Hende tabata sigui drenta e sala di ehercicio, cumindando otro i dunando otro man. Niun hende tabata un desconocí aki. Nan ta forma un famia grandi, uní den pensamentu, den nan estilo di bida, i den sirbi un solo Dios, Jehova.” E “famia grandi” ei a consistí di 135 hende, incluyendo 50 prezu. Laga nos cera conocí cu algun di nan.

Jerzy, cu a bautisá na juni 1993, ta conta: “Aunke mi a haña contacto cu e berdad di Bijbel añanan pasá, mi tabatin un berdadero curason di piedra. Mi bida tabata asina: fraude, divorcio di mi promé casá, relacion ilegítimo cu Krystyna, un yu djafó i cai cerá hopi biaha.” Ora el a mira con otro criminalnan duru a bira Testigo miéntras nan ta den prizon, el a cuminsá puntra su mes: ‘I ami no por bira un mihó hende?’ El a pidi un studio di Bijbel i a cuminsá bai reunion. Sin embargo, e punto crucial a bini ora el a haña sa dje fiscal cu Krystyna a bira un Testigo di Jehova tres aña promé. “Mi a keda totalmente sorprendí!” Jerzy ta bisa. “Mi a pensa: ‘Kico di mi? Kico ami ta haciendo?’ Mi a realisá cu pa mi por haña e aprobacion di Jehova, mi mester a drecha mi bida.” Como resultado, e tabatin un reencuentro felis den prizon cu Krystyna i Marzena, nan yu muher di 11 aña. No a tarda hopi cu nan a legalisá nan matrimonio. Aunke e ta den prizon ainda, i sa tin su momentonan difícil de bes en cuando, recientemente Jerzy a siña idioma di seña pa por yuda prizoneronan surdu.

Mirosław tabata enbolbí den actonan criminal for di tempu cu e tabata bai scol básico. E tabata admirá mashá loke su amigunan tabata haci, i pronto el a cuminsá haci mescos cu nan. Ta hopi hende el a atracá i golpia. Finalmente el a cai cerá. “Ora mi a hañá mi den prizon, mi a acudí na pastor pa yudansa,” Mirosław ta confesá. “Pero mi a keda sumamente decepcioná. Di manera cu mi a pensa di mata mi mes dor di bebe veneno.” Net riba e dia cu el a planea pa kita su bida, el a ser transferí pa un otro cel. Ei el a haña un copia di E Toren di Vigilancia cu a papia dje propósito di bida. “E informacion simpel i claro tabata net loke mi tabatin mester,” e ta agregá. “Awor mi kier a biba! Di manera cu mi a haci oracion na Jehova i a pidi e Testigonan pa un studio di Bijbel.” El a haci progreso rápido den su studio di Bijbel i a bautisá na 1991. Awor e ta sirbi como pionero auxiliar den prizon, i tin e privilegio di predicá di cel pa cel.

Te asina leu un total di 15 prizonero a bautisá. Nan sentencianan contá huntu ta yega na casi 260 aña. Algun a sali promé cu nan a completá nan sentencia. Nan a baha e sentencia di un prizonero, di 25 aña pa 10 aña. I vários cu a mustra interes tempu nan tabata den prizon a bira Testigo bautisá despues cu nan a sali. Ademas, tin cuater prezu mas cu ta preparando pa bautismo.

Autoridadnan di Prizon Ta Duna Reconocimentu

Un informe di prizon ta declará: “E cambio den e actitud dje prezunan tabata masha riparabel mes. Hopi a stop di huma i nan ta tene nan cel limpi. Cambionan asina ta bisto den e comportacion di hopi prezu.”

E korant Życie Warszawy ta raportá cu e gerencia dje prizon na Wołów ta reconocé cu “esnan cu a combertí ta disipliná; nan no ta causa problema pa e wardadónan di prezu.” E artículo ta sigui bisa cu esnan cu a sali promé cu nan a caba di sinta nan sentencia ta integrá bon den e círculo di Testigonan di Jehova i no ta cai bek den e caminda di crímen.

I ki opinion e director mes tin? E ta bisa: “E trabou di Testigonan di Jehova den e prizon aki ta excelente i masha útil.” E director ta reconocé cu “den transcurso di nan studio di Bijbel [cu e Testigonan], e normanan dje prezunan ta cambia, loke ta duna nan un forsa guiador nobo den nan bida. Nan tin masha bon manera i ta usa tacto. Nan ta trahadó diligente cu casi no ta causa problema.” Naturalmente, ta un satisfaccion pa e Testigonan cu ta traha cu e prezunan den e prizon di Wołów tende comentarionan faborabel asina di parti dje autoridadnan.

E Testigonan cu ta bishitá e prezunan ta masha conciente dje palabranan aki di Jesus: “Mi conocé mi carnénan i mi carnénan conocé mi. . . . Nan lo scucha mi bos, i nan lo bira un solo tou, un solo wardadó.” (Juan 10:14, 16) Ni sikiera e murayanan di prizon por stroba e Wardadó Excelente, Jesucristo, di reuní personanan mansu manera carné. E Testigonan na Wołów ta gradicidu cu nan tin e privilegio di participá den e sirbishi gososo aki. I nan ta confia cu Jehova lo sigui bendicioná nan pa yuda hopi mas curason di piedra reaccioná na e bon nobo di Reino promé cu e fin yega.—Mateo 24:14.

[Kuadro na página 27]

E Problema di “Mucha Adulto”

E Testigonan cu ta traha den e prizon di Wołów ta comentá: “Despues di a biba den prizon pa basta tempu, hopi bes un prezu ta perde e sentido di loke ta nificá biba den libertad of riba su mes. Básicamente nos tin e problema di ‘mucha adulto,’ esta, un persona cu ta sali di prizon, i cu no sa con pa soru pa su mes. P’esei e papel dje congregacion ta bai mas leu cu solamente siñ’é e berdad di Bijbel. Nos tin cu prepar’é pa bira parti dje comunidad, spiert’é pa e peliger i tentacionnan nobo cu lo e por bai enfrentá. Aunke nos ta soru pa nos no ta demasiado protectivo, nos tin cu yud’é p’e cuminsá di nobo den bida.”