Un Trabou cu “sin Duda Ta Incitá Respet”

APOSTEL Pedro a amonestá su compañeronan cristian: “Mantené boso conducta excelente entre e nacionnan, pa cu, den loke nan ta papia contra boso como malechor, nan, como testigo ocular di boso obranan excelente, por glorificá Dios.” (1 Pedro 2:12) Pa hopi aña caba, Testigonan di Jehova na Italia a desplegá públicamente un conducta excelente asina. Di acuerdo cu Jesus su instruccion pa ‘predicá for di daknan di cas,’ nan ta efectuá tur nan actividadnan cristian abiertamente, den pleno bista público. (Mateo 10:27; Juan 18:20) P’esei, ora un abogado italiano i un pastor a publicá acusacionnan den cua nan ta bisa cu Testigonan di Jehova ta “un secta religioso falsu” i a pone nan riba e mésun liña cu “sociedadnan secreto cu ta engañá hende,” e Testigonan a dicidí di tuma pasonan legal debí na declaracionnan difamatorio.

Den e promé caso, corte a concluí cu e abogado i e pastor no a falta cu ley. Sin embargo, dia 17 di juli 1997, e Corte di Apelacion di Venecia a anulá e sentencia dje corte di promé instancia i a declará tur dos acusado culpabel. E Corte di Apelacion a declará: “Tur dos artículo en cuestion publicá ta contené expresion i frasenan cu sigur por daña e reputacion dje miembronan dje religion di ‘Testigonan di Jehova.’ Evidentemente ta parce cu e intencion dje artículonan ta pa exponé e Testigonan na desprecio público.” Corte a bisa cu den e artículonan “no a aplicá legítimamente e derecho di informá i lansa criticá.” Corte a duna e dos difamadónan un boet i tambe a ordená nan pa paga tur gastu di corte, incluso gastu di abogado dje Testigonan pa tur dos caso.

Den su veredicto skirbí, e Corte di Apelacion di Venecia a comentá: “Solamente dor di balansá i salbaguardiá tur derecho garantisá pa e Constitucion [italiano], ta posibel pa prevení formanan di intolerancia i fanatismo religioso.” E veredicto ta reconocé cu e actividad di Testigonan di Jehova no ta algu ni secreto ni religiosamente falsu. “Si bo clasificá Testigonan entre e sociedadnan secreto,” segun corte, “bo no ta ni sikiera respetá e criterio di berdad histórico, ya cu e religion en cuestion ta presente den hopi stad, i e trabou mundial di combertimentu di hende cu su miembronan ta haci, foral riba diadomingo i dianan liber, ta bon conocí. I e trabou aki sin duda ta incitá respet pa e esfuersonan cu nan ta haci, sea cual sea e opinion cu bo tin tocante e doctrina cu nan ta predicá.” Pues, e registro di predicacion celoso i conducta ehemplar di Testigonan di Jehova na Italia a yuda kita prehuicio contra nan.—Mateo 5:14-16; 1 Pedro 2:15.