Biba i Predicá den Sombra di un Volcan

“E TA un experencia spantoso. Bo por wel compar’é cu e fin di mundu di cua Bijbel ta papia. Nos tin cu keda alerto i den un bon posicion dilanti Jehova na tur momento.” Eseinan ta palabranan di Víctor, un Testigo di Jehova, relatando e experencia cu e tabatin bibando hopi cerca dje volcan Popocatépetl, yamá Popo den boca di pueblo na México.

For di 1994, noticianan internacional ta mencioná e volcan aki cu ta saca zonido.a Autoridadnan a declará tur área cu ta denter di un radio di 30 kilometer for dje krater, como zona di alto rísico. Foral e área parti sur dje volcan ta peligroso, pasobra e krater ta incliná den e direccion ei, i n’e parti ei tin un cantidad di ravina profundo via cua lava i lodo lo por basha for di e krater.

Naturalmente, hopi hende ta puntra nan mes kico lo pasa cu Cuidad di México, dado caso e volcan haci un erupcion grandi. E stad ei ta na peliger? Anto, tin tambe tur e personanan den e estado di Morelos, parti sur dje volcan. Tur hende cu ta biba den e área ei tambe ta core peliger? I kico kier men biba den sombra di e volcan, sin sa kico lo por sosodé un dia pa otro?

E Menasa di e Volcan

E centro di Cuidad di México ta mas o ménos 70 kilometer nortwest di Popocatépetl, aunke algun suburbio ta na un distancia di 40 kilometer for di dje. Teoréticamente, henter e área metropolitano cu tin un poblacion di 20 miyon hende, ta cai pafó dje zona di peliger. Sin embargo, dependiendo dje direccion dje bientu, e área aki por ser afectá si e volcan saca un gran cantidad di shinishi.

Generalmente, e efectonan di shinishi dje volcan ta mas serio n’e parti oost dje volcan. Den e área aki tin e stad di Puebla i un cantidad di stad i pueblo mas chikitu, ademas di e rond di 200.000 hendenan cu ta biba den e área di alto rísico. Diadomingo, 11 di mei 1997, e volcan a scupi tonelada di shinishi den laira i esaki a plama den henter e área, alcansando asta e estado di Veracruz, mas cu 300 kilometer den direccion oost. Den e área na parti sur dje volcan, den e estado di Morelos, tin diferente stad i pueblo, huntu cu rond di 40.000 habitante, cu tambe lo por ta core peliger serio.

Testigonan di Jehova ta biba i traha meimei di tur e situacion aki. Den Cuidad di México tin mas cu 90.000 Testigo repartí den un 1.700 congregacion asina. E sucursal di Sociedad Watch Tower ta situá pafó di México City, parti nortoost, na un distancia di 100 kilometer for dje volcan. Einan tin mas cu 800 boluntario ta sirbi n’e sucursal, ademas dje rond di 500 boluntarionan cu ta traha riba un proyecto grandi di construccion. Nan tur ta cai pafó dje zona di rísico.

Den e estado di Morelos, tin rond di 50 congregacion di Testigonan di Jehova cu mas di 2.000 publicadó di Reino. Algun dje congregacionnan aki, situá na Tetela del Volcán i Hueyapan, ta na un distancia di 20 kilometer so for dje krater. Ademas, n’e parti oost, den e estado di Puebla, tin congregacionnan cu rond di 600 publicadó cu ta biba na un distancia di 20 pa 30 kilometer for di e volcan. Di mes, esakinan lo por ta den peliger serio.

Testigonan di Jehova Ta Keda Activo

Apesar dje menasa constante, Testigonan di Jehova no a stop di predicá den e área aki. Tambe nan a sigui mantené e rutina di nan reunionnan cristian, loke ta duna nan un sentido di unidad i confiansa den e circunstancianan fastioso aki. (Hebreonan 10:24, 25) Un informe procedente di un dje congregacionnan ta bisa: “A bin un cambio remarcabel den e actitud dje pueblo pa cu e bon nobo di Reino. Por ehempel, recientemente, 18 persona di un pueblito a aceptá un studio di Bijbel na cas.”

Un otro congregacion, situá 20 kilometer for di e volcan ta informá: “Tabatin un aumento sobresaliente. E congregacion aki a keda formá na november 1996. Den e seis lunanan cu a sigui, 10 persona a cualificá pa participá den e ministerio di veld. Algun publicadó ta biba solamente un 20 kilometer for dje krater. Nan ta tene reunionnan cristian einan, i nan tin un asistencia di mas o ménos 40 persona.”

Magdalena, kende ta biba na San Agustín Ixtahuixtla, Puebla, 25 kilometer so for dje volcan, a keda masha activo conduciendo su studionan. E ta conta kico a sosodé despues cu tabatin un erupcion grandi.

“Nos a haña aviso cu nos mester a bandoná nos cas, loke nos a haci—den yobida di shinishi. Maske con urgente e situacion tabata, mi a corda riba famia Dorado cu kendenan mi tabatin un studio di Bijbel. Ami i algun ruman a bai n’e cas di famia Dorado pa yuda nan bai un lugá mas sigur. Den e stad bisiña, Puebla, e comité di auxilio di Testigonan di Jehova ya caba a cuminsá funcioná. Famia Dorado a keda masha impresioná pa e trato cu nos tur a haña einan. Di antemano, nos rumannan cristian a prepará acomodacion na diferente lugá pa nos. Aunke nos tabata leu for di cas, nos no a falta nada. E famia aki a yega di bishitá algun reunion na Salon di Reino, pero nan a keda sorprendí p’e amor cu rumannan cu nan no a yega di mira nunca, a mustra na nan. Algun siman despues ora nos a regresá cas, e famia aki a cuminsá asistí regularmente n’e reunionnan. No tarda mashá cu nan a cualificá como publicadó dje bon nobo. Awor, dos di nan ta bautisá. Nan a traha algun luna como pionero auxiliar i nan ta planea pa drenta sirbishi di pionero regular.”

Martha, un hóben di 20 aña cu ta biba 21 kilometer for dje krater, no a laga un hendikep cu e tabatin strob’é di probechá di tur oportunidad pa predicá. El a haña e berdad 3 aña pasá, ora e volcan a bira activo un biaha mas. En bes di usa un rolstoel, loke lo ta difícil pa manehá riba e tereno steil unda e ta biba, e ta participá den e trabou di predicá coriendo riba un buricu. E ta bai su reunionnan tambe riba buricu. Martha ta mashá gradicidu na Jehova, p’e echo cu e ta forma parti dje hermandad amoroso, ya cu e ta dependé riba ruman muhernan den e congregacion pa baha i subi e buricu. Tur luna e ta dedicá mas cu 15 ora den sirbishi.

Den e áreanan isolá aki, hopi biaha Testigonan di Jehova ta haña nan confrontá cu bisiñanan cu ta presioná nan pa djoin nan den celebracion di fiestanan religioso. Na Tulcingo, un pueblo cu ta situá rond di 20 kilometer for dje volcan, a asigná un homber pa bishitá Testigonan pa pidi donacion p’e celebracionnan. Cu pacenshi, e rumannan a splik’é pakico nan no por a participá den e dianan di fiesta religioso ei. E homber tabata asina persistente den su intento pa saca placa for di e rumannan, cu el a cuminsá asociá cu nan. Asina el a siña conocé algun di nan creencianan. El a keda contentu cu el a haña contesta pa su preguntanan den su mes Bijbel católico. E, huntu cu su casá i yu muher, tin un aña ta asistí regularmente n’e reunionnan i el a expresá e deseo pa bira un publicadó dje bon nobo.

Con Bo Por Ta Prepará?

Volcanólogonan a haci investigacion i nan a emití un informe oficial tocante Popocatépetl cu ta menasando, pero niun hende sa realmente kico lo sosodé ni ki ora. Segun medionan di comunicacion, i hendenan cu ta biba ei banda, e volcan por cuminsá un erupcion un ora pa otro. E menasa ta real. Naturalmente, autoridadnan ta hopi preocupá i nan kier haci tur loke nan por pa ta prepará den caso cu surgi un emergencia. Pero ta comprendibel cu nan kier ta cauteloso pa bati alarma, ya cu nan no kier causa un éxodo masal si no tin peliger inminente. Kico anto, un persona mester haci?

“Spiertu ta esun cu a mira e calamidad i a bai na sconde su mes, pero esun inexperto a sigui padilanti i mester sufri e castigu,” un proverbio bíblico ta bisa. (Proverbionan 22:3) P’esei, e curso sabí ta pa tuma e pasonan necesario pa garantisá bo siguridad miéntras cu tin oportunidad ainda, i no “sigui padilanti” como si fuera nada lo pasa i sinta warda te ora tin erupcion pa tuma accion. Esaki ta e punto di bista di Testigonan di Jehova den e área.

Recientemente, representantenan di e sucursal di Sociedad Watch Tower a reuní cu superintendentenan biahero den e estado di Puebla, kendenan tin contacto directo cu e congregacionnan den e zona di peliger. A haci areglo pa superintendentenan biahero i miembronan dje comité di auxilio bishitá tur famia cu ta biba te cu 25 kilometer for di e krater. A yuda e famianan aki considerá e opcion di muda bai for dje zona di peliger promé cu e volcan cuminsá un erupcion. A haci areglo pa transportacion i acomodacion pa asina reubicá 1.500 persona p’e stad di Puebla. Algun famia a bai biba cerca nan famianan den otro stadnan.

Spiertamentu Riba un Escala Mas Grandi

E huma, candela i zonidonan cu ta sali for di Popocatépetl ta indicacionnan claro cu e ta cerca di bai cuminsá un erupcion. Tur hende cu kier scapa tin cu tuma na serio e spiertamentunan cu autoridadnan a emití, i dal e pasonan necesario. Testigonan di Jehova cu ta biba den e área cerca dje volcan ta constantemente alerto pa di tal forma nan por garantisá nan mes siguridad i tambe yuda otro hende mira e peliger i tuma medida promé cu ta demasiado lat.

Riba un escala mas grandi, Testigonan di Jehova ta alerto tambe pa cu sucesonan di mundu segun cu esakinan ta cumpli cu profecia bíblico. Guera, temblor, hamber, malesa i crímen ta mes significativo cu e actividadnan dje volcan. Nan ta elementonan cu ta componé un señal cu, manera Jesucristo a predicí, lo marca e “conclusion dje sistema di cosnan.” Aunke nos niun no sa exactamente ki dia e fin lo yega, no tin duda cu e ta biniendo i cu e ta masha-masha cerca.—Mateo 24:3, 7-14, 32-39.

Awe tin un necesidad urgente pa hende rond mundu tuma masha na serio Jesus su spiertamentu: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente.” (Lucas 21:34) Esaki ta claramente e curso sabí pa tuma. Mescos cu no mester tuma e señalnan spiertador dje volcan levemente, nos no mester ignorá e punto di bista dje Yu di hende, Jesucristo, kende a urgi: “P’e motibu aki, boso tambe demostrá cu boso ta cla, pasobra na un ora cu boso no ta pensa cu e ta, e Yu di hende ta bini.”—Mateo 24:44.

[Nota]

[Plachinan na página 23]

Martha (riba buricu) i otronan ta predicá den sombra di Popocatépetl