Ken Ta Culpabel?

Hopi hende ta culpa Dios pa nan problemanan. Un proverbio bíblico ta declará: “Bobedat di un hende ta daña su kaminda, i e tin rabia den su kurason kontra SEÑOR.” (Proverbionan 19:3, Editorial Evangélica) Pero, tene Dios responsabel pa problemanan di hende ta igual cu culpa un fabricante di auto p’e echo cu tin asina tantu accidente di auto causá dor di shofernan burachi.

Dios a duna humanidad guia balioso den su Palabra, Bijbel. Dor di studia e biblioteca divino aki i biba di acuerdo cu e ley i principionan cu e ta trece padilanti, nos por evitá hopi problema di bida. En cambio, actua contrario cu Dios su guia ta desastroso. Por ehempel, hopi biaha hende cu ta come muchu, huma, bebe di mas of ta cometé inmoralidad, ta sufri di consecuencianan trágico di nan salú. (Lucas 21:34; 1 Corintionan 6:18; 2 Corintionan 7:1) E apostel cristian, Pablo a skirbi: “Kico cu hende sembra, esaki lo e cosechá tambe; pasobra esun cu sembra cu su carni na bista lo cosechá corupcion for di su carni, pero esun cu sembra cu e spiritu na bista lo cosechá bida eterno for dje spiritu.”—Galationan 6:7, 8.

Ta cuantu mas mihó pa biba di acuerdo cu Dios su ley i principionan! Si nos haci esei, nos lo experenciá e realidad di Dios su promesa cu el a haci mediante su profeta Isaías: “Ami, Jehova, ta bo Dios, Esun cu ta siñá bo beneficiá bo mes, Esun cu ta hací bo stap den e caminda den cua bo mester cana. O, si bo realmente presta atencion na mi mandamentunan! E ora ei bo pas lo yega di ta mescos cu un riu, i bo husticia manera e olanan di laman.”—Isaías 48:17, 18.