Maria A Muri di Causa Natural?

SEGUN e korant di Vaticano L’Osservatore Romano, e doctrina católico di asuncion ta bisa: “E Bírgen Inmaculá, conserbá liber di tur mancha di picá original, a ser tumá den gloria celestial cu curpa i alma, ora su bida terenal a terminá.” E korant ta bisa cu e siñansa aki a pone cu algun teólogonan católico ta pretendé cu Maria “no a muri, sino cu el a pasa directamente for di bida terenal pa gloria celestial.”a

Recientemente, Papa Juan Pablo II a tira un lus diferente riba e asuntu. Durante e Audiencia General na Vaticano, dia 25 di juni 1997, el a bisa: “E Testament Nobo no ta duna ningun informacion dje circunstancianan relacioná cu Maria su morto. E silencio aki ta pone hende suponé cu el a bai di un forma natural, sin ningun particularidad digno di mencion. . . . E conceptonan cu ta incliná na excluí e echo cu el a muri di causa natural, ta parce di ta infundá.”

Papa Juan Pablo su declaracion a causa un sker profundo den e dogma dje Concepcion Inmaculá. Si Jesus su mama tabata “conserbá liber di mancha di picá original,” con Maria por a muri di “causa natural,” loke ta e resultado di picá cu Adam imperfecto a pasa pa hende? (Romanonan 5:12) E dilema teológico aki a bin dor dje punto di bista trocí cu Iglesia Católico tin dje mama di Jesus. Nada straño cu e asuntu aki a lanta division i confusion den Iglesia Católico.

Aunke Bijbel ta describí Maria como un persona humilde, fiel i deboto, e no ta atribuí e cualidadnan aki na un “concepcion inmaculá.” (Lucas 1:38; Echonan 1:13, 14) Bijbel ta bisa simplemente: “Tur a peca i no ta alcansá e gloria di Dios.” (Romanonan 3:23) Sí, Maria a heredá picá i imperfeccion mescos cu e resto di humanidad, i no tin ningun evidencia di cu el a muri di algu otro cu no ta causa natural.—Compará cu 1 Juan 1:8-10.

[Nota]