Un Suceso Inolvidabel na Francia

“BISA NO NA UN STAD DI JEHOVA!” Esei ta loke posternan pegá na tur parti den e stad a declará. Un grupo opositor a exhortá: “Laga Nos Tur Bai Contra e Proyecto Jehova.” Literalmente cientos di artículo den prensa a forsa e público bira conciente dje asuntu. Hende a firma cartanan di protesta, i un avalancha di mas cu mei miyon pamfleta cu a mencioná e proyecto a inundá brievenbusnan local. Kico tabata e proyecto aki, cu a perturbá e trankilidad di Louviers, na nortwest di Francia, cu normalmente ta un stad trankil? E plan pa construí un sucursal i residencia di Testigonan di Jehova.

Jehova Ta Hacié Crece

E actividad di Testigonan di Jehova ta data for di final di siglo 19. Na 1905 nan a habri e promé depósito pa literatura bíblico na Beauvène, sur di Francia. I na 1919 un oficina chikitu a cuminsá funcioná na Paris. Un sucursal a habri oficialmente einan na 1930, i e aña siguiente e staf dje oficina a bai biba den un cas di Betel situá na Enghien-les-Bains, nort di Paris. Despues di Guera Mundial II, e famia di Betel a muda bek pa Paris, i na 1959, a transferí e sucursal pa un edificio di cincu piso na Boulogne-Billancourt, den un distrito net pafó dje capital den parti west.

Debí na e expansion dje trabou di predicá e Reino, na 1973 a transferí e departamentonan di manda carga i di imprenta pa Louviers, 100 kilometer west di Paris, miéntras cu e oficinistanan a keda na Boulogne-Billancourt. Sin embargo, debí n’e aumento den e cantidad di publicadó, e facilidadnan na Louviers a bira chikitu, apesar cu nan a amplia esakinan na 1978 i 1985. P’esei a dicidí di expandé e lugá i trece henter e famia di Betel huntu den un localidad. Manera a ser mencioná na principio, no ta tur hende a gusta e proyecto aki. Apesar dje oposicion ei, a haña un sitio djis un kilometer i mei for di e imprenta. E rumannan a traha seis aña duru riba dje, i por fin, despues di tabata separá pa 23 aña, henter e famia di Betel a ser uní na Louviers na augustus 1996.

Pues, tabata cu gran goso cu e multitud di 1.187 hende, incluyendo e 300 miembronan dje famia di Betel di Francia, plus 329 delegado for di 42 otro sucursal, a reuní diasabra, 15 di november 1997, pa scucha e discurso di dedicacion cu Ruman Lloyd Barry, miembro dje Cuerpo Gobernante, a duna. Sin embargo, en bista cu e dedicacion aki tabata tumando lugá den un tempu di hostilidad i ora tabatin campaña largu di parti di medionan di prensa pa difamá Testigonan di Jehova rond Francia, e rumannan a haña cu tur Testigo na Francia mester por a celebrá e victoria aki. P’esei, diadomingo, 16 di november, nan a organisá un reunion special cu e tema “Permanecé den e Amor di Cristo” na e Centro di Exhibicion Villepinte, djis nort di Paris. Tur Testigo di Jehova na Francia, huntu cu e Testigonan di abla frances na Bélgica i Suisa tabata invitá, i tambe e congregacionnan na Alemania, Gran Bretania, Hulanda i Luxemburgo.

Un Reunion Histórico

Preparacionnan pa e reunimentu a cuminsá seis luna di antemano. Anto, net dos siman promé cu e dedicacion, shofernan di truck na Francia a cuminsá welga, poniendo baricada riba e mayoria dje careteranan principal i na e pompnan di gasolin. Stul i ekiponan lo a yega na tempu? E careteranan blokeá lo a stroba e rumannan di bini? Tur hende a hala un rosea di alivio ora cu e welga a stop denter di un siman, i cu nan a habri caminda pa tráfico atrobe. Diabierne anochi promé cu e fin di siman dje dedicacion, 38 truck a entregá 84.000 stul na e dos salanan spacioso cu a huur p’e ocasion. Mas cu 800 ruman homber i muher a traha duru henter anochi te cu diasabra, mitar di dies di mainta, pa nan instalá e stulnan, plataforma, ekipo di zonido i nuebe pantaya gigante.

Diadomingo 6:00 a.m., a habri e portanan, i e multitudnan a cuminsá basha drenta paden. Un total di 17 trein, specialmente di charter, a trece mas cu 13.000 Testigo na e capital. Mas cu shen ruman homber i muher local tabata presente na e stacion di trein pa saludá e biaheronan i hiba nan n’e sitio dje congreso. Un ruman muher a bisa cu e areglo amoroso aki a duna nan un “sintimentu di siguridad i bienestar.”

Otronan a bini Paris cu avion of cu auto. Sin embargo, e mayoria a bini den 953 bus, miéntras cu Testigonan den e área di Paris a haci uso di transporte público pa bai e Centro di Exhibicion. Hopi hende a biaha henter anochi of a sali cas den mardugá, pero tog nan excitacion pa asistí na e reunion aki tabata bisto. Gritunan di alegria i abrasonan caluroso a compañá e reencuentro di amigunan cu pa añanan no a mira otro. Trahenan nacional colorido a duna e multitud alegre un toke internacional. Sin duda, algu extraordinario tabata bai sosodé.

Pa ora cu e programa a cuminsá, 10:00 a.m., no tabatin mas stul bashí, pero tog pa minuut tabatin cientos di hende cu tabata sigui drenta. Unda cu bo a wak, bo tabata topa yen di cara sonriente. Miles di hende a sea keda para of a sinta riba e flur di cement. Na armonia cu e tema dje asamblea, hopi hóben tabata asina amoroso cu nan a para, pa asina permití esnan mas grandi sinta. Un pareha a skirbi: “Nos tabata felis pa duna nos stul na rumannan cu nos no tabata conocé, pero cu ta masha kerí pa nos!” Hopi ruman a desplegá un excelente actitud di sacrificio propio: “Nos a para henter dia banda dje stulnan cu nos a yuda pone henter diabierne anochi. Pero e echo so cu nos tabata presente, a yena nos cu gratitud pa cu Jehova.”

Apesar di a sinti nan cansá of incómodo, delegadonan a scucha cu sumo atencion n’e informe di otro paisnan i na e discursonan di Lloyd Barry i Daniel Sydlik, kende tambe ta miembro dje Cuerpo Gobernante. Ruman Barry a desaroyá e tema: “Jehova Ta Haci Pleno Potencia Abundá,” i el a resaltá gráficamente con Jehova a bendicioná su pueblo cu aumento apesar di vários prueba. Ruman Sydlik su discurso tabatin e tema “Felis Ta e Pueblo Kende Su Dios Ta Jehova!” En bista dje oposicion cu Testigonan di Jehova na Francia tabata enfrentando n’e momentonan ei, tur dos discurso tabata masha oportuno. Ruman Sydlik a mustra cu berdadero felicidad no ta dependé di factornan externo, ma di nos relacion cu Jehova i nos actitud pa cu bida. E auditorio a contestá su pregunta “Boso ta felis?” cu un tremendo aplauso.

Un ruman muher cu “a perde su goso” a skirbi despues: “Di ripiente mi a realisá cu mi por a logra haña felicidad. Mi tabata dirigí mi esfuersonan robes i mediante e discurso aki, Jehova a mustrá mi con mi mester a haci cambio.” Un otro ruman homber a declará: “Awor mi kier lucha pa haci Jehova su curason alegrá. Mi no kier laga nada kita e goso interno profundo cu mi a cuminsá sinti.”

Ora e reunion tabata yegando na su fin, tabata cu un gran entusiasmo cu e presidente a anunciá e asistencia: 95.888—e reunion di mas grandi cu Testigonan di Jehova a yega di tene na Francia!

Despues dje cantica di conclusion, cu hopi a canta cu wowonan yen di lágrima di goso, i e oracion di conclusion, e rumannan a cuminsá nan biahe di regreso pa cas cu sintimentunan mixto. E ambiente caluroso i amigabel dje reunimentu no a pasa forbij sin cu otro hende a not’é. Shofernan di bus tabatin hopi comentarionan positivo tocante e conducta dje delegadonan. Loke a impresioná nan tambe ta e manera cu cosnan tabata organisá di tal manera cu tur e 953 busnan por a bandoná e Centro di Exhibicion sin niun pegamentu di tráfico! E empleadonan di stacion di trein i transporte público tambe a apreciá e conducta dje delegadonan mashá. Hopi combersacion excelente a sigui, i un bon testimonio a ser duná.

“Un Oásis den Desierto”

Apostel Pablo a urgi compañeronan cristian: “Laga nos considerá un e otro pa incitá otro na amor i na obranan excelente, . . . animando un e otro, i tantu mas segun cu boso ta contemplá e dia yegando cerca.” (Hebreonan 10:24, 25) E reunion special aki sigur-sigur tabata pa tur cu a asistí, un fuente di animacion, “un oásis den desierto” manera un ruman muher a describié. “Nos a sali for di einan yená cu vigor, animá, fortificá, i mas determiná cu nunca pa alegrá den e sirbishi di Jehova,” rumannan dje sucursal di Togo a skirbi. Un superintendente di circuito a bisa: “Esnan cu tabata abatí a bai cas felis.” Un otro a declará: “E rumannan a ser stimulá i fortalecé.” Un pareha a ser conmoví pa skirbi: “Nunca promé nos a sinti nos asina pegá na Jehova su organisacion.

“Mi mes pia siguramente lo para riba un lugá plat; entre e multitudnan congregá lo mi bendicioná Jehova,” e salmista a bisa. (Salmo 26:12) Reunimentunan cristian asina ta yuda tur cu asistí, recobrá un cierto nivel spiritual pa enfrentá obstáculo. “Sea cual sea e tribulacion,” un ruman muher a confirmá, “e momentonan extraordinario aki ta profundamente grabá den nos curason i semper nan lo keda ei pa consolá nos.” Den e mésun liña di pensamentu ei, un superintendente biahero a skirbi: “Ora tempunan difícil presentá, e recuerdo dje bista adelantá aki dje Paradijs, lo yuda nos trata cu nan.”

“Atribuí na Jehova, O famianan di pueblo, atribuí na Jehova gloria i fortalesa,” Salmo 96:7 ta exhortá. No tin duda cu e dedicacion dje facilidadnan dje sucursal nobo na Francia ta un victoria resonante pa Jehova. E so por a realisá un proyecto cu a enfrentá un oposicion asina persistente i extenso. Testigonan di Jehova na Francia ta mas dicididu cu nunca pa ‘permanecé den e amor di Cristo’ i pa ‘laga nan lus briya.’ (Juan 15:9; Mateo 5:16) Tur cu a asistí n’e programa di dedicacion ta compartí sin ningun reserva e sintimentu dje salmista: “Ta Jehova a haci esaki sosodé; den nos wowonan e ta maraviyoso.”—Salmo 118:23.

[Plachi na página 26]

Lloyd Barry

[Plachi na página 26]

Daniel Sydlik

[Plachi na página 26]

95.888 persona a asistí n’e programa special na e Centro di Exhibicion di Villepinte

[Plachinan na página 28]

Miles di esnan cu a asistí a sea para of sinta riba flur pa scucha